為了實現媽媽遺願，我成為了女兒國唐僧: Twenty Ninth

Q：「喂，我放咗學要去交換聖誕卡，然後再去商場行下街，但會返嚟食飯，你預七點到啦。」
我：「好呀，無問題。」
超奇怪嘅對話，怪到我唔知點形容好，心裡邊甚至有少少發毛的感覺。
嗱，第一，佢只不過係同我一齊住，實質同我乜關係都無，加上已經配咗鎖匙畀佢，佢去邊，會幾點返嚟其實唔關我事，而我亦都無權干涉。
第二，佢交帶畀我聽，我諗重點係會返屋企食飯呢件事，而且有埋時間，即係話佢expect返到嚟之後過一陣就有得開餐。
第三，佢同friend去行街，我本身唔知佢啲friend有無預喺出街食，但長假開始點都會玩癲啲，諗到佢喺出面要就住就住使，甚至可能要避飯局慳錢，我就非常不自在心裡不是味兒。
第四，佢講嘅口吻，彷彿係叫阿媽煮定飯同埋解釋點解要夜返…喂，妳究竟當我係乜？講真妳只係一個帶畀我大量麻煩嘅右女神，憑乜要我…但我…竟然已經諗緊幾時要返屋企，煮啲乜…
我到底發生乜事？明明我係一個通街躝無王管嘅浪子…浪子又言重得滯，廢青或者街童啫。
但我諗起今朝佢只係著住泳…呀唔係，係內衣嘅look，我就情不自禁…且有點慌張。
吓，女神妳患咗肺癌？得返三個月命！唔緊要，等我切一個肺落嚟送畀妳吖，雖然我成日群埋啲飛仔波友，但我從來都唔食煙㗎，就算二手煙都會保持返一點五米距離，確保我個肺有瑞士阿爾卑斯山嘅品質㗎！




低能，我真係勁弱智，搞乜撚…
唔通我其實係一個絕世好男仔？
荒謬！我只係對妳嘅美色虎視眈眈，隨時攞妳著完啲底衫褲做埋啲卑鄙無恥下流賤格嘅行為，實在係同一個擦白帶黨嘅人渣敗類無異。
咦，有啲繞口喎，好似多咗粒字，邊粒呢…是但啦。
唉，做兵啲人真係低B㗎；嗱，我唔係當兵㗎，被迫㗎咋，無理由見死不救㗎？我起碼都係大將軍，呀，唔係，應該媲美紅十字會，樂施會或者UNICEF先至係。
健：「喂…喂！發乜神經呀？」
我：「做…做乜呀？」
健：「放假喇喎！你重喺度發呆？你平時唔係咁㗎？」佢好似發現外太空生物咁望住我。
我：「無…無呀，諗緊玩乜咋嘛。」
健：「咁要玩啲乜呀？」




我：「未諗到喎…」
健：「你真係好唔妥，嚟啦，去中心hea下先。」