為了實現媽媽遺願，我成為了女兒國唐僧: Twenty Sixth

我：「Queenie姐姐，你搞乜鬼呀？」
Q：「姐你個頭，乜我大過你咩！」
我：「Queenie妹妹，做乜唔著衫出嚟呀…」
我都怕咗佢，將個頭打側唔望佢。
Q：「邊有唔著衫呀！入面好迫呀，好難抹身，好容易整濕條校裙，所以咪出嚟先著裙囉…啊呀，你怕醜？」
我：「我點好意思望妳喎。」
Q：「我諗住同著泳衣差唔多啫，點呀，我靚唔靚女呀？」
我：「咪玩啦，唔靚點做女神呀？」
Q：「吖！望都唔望你就知靚女，好無誠意喎。」
女神叫到，咁我勉為其難望兩眼啦…今日佢套內衣係淡粉藍色，睇嚟佢都係鍾意粉色系嘅衣著，無乜花邊，只有少少點綴，比較似少女款同運動款。


佢舉高兩隻手用毛巾喺到抹頭，呢個動作非常之靚，拉長咗佢嘅肢體線條，而條腰都會自動挺直，再加埋心口擴張。
問我靚唔靚，梗係靚啦，女神點會唔靚喎，都廢話嚟嘅；不過寫咗兩萬幾字我都無形容過佢個樣係點，你哋啲讀者都可以信佢係女神我都真係佩服你哋…至於有幾靚…
嗱，雖然我唔係理屈，但我真係詞窮，因為我啲中文真係好鬼屎，唔似得其他高端作家可以形容女神塊面蛋都呃到過千字，係不能也，非不為也，係挾泰山以超北海。
咁佢都幾高㗎，只係矮我少少，我諗165左右啦，身材係幾標青嘅…黑長直過膊頭髮，乖乖女咁囉，白白淨淨；整體感覺就…嗯，佢又唔係嬌滴滴可愛路線嗰啲，亦唔係標準大方得體女神嗰隻，比較係走氣質路線，有啲型格…
如果要我用數學公式嚟型容佢嘅美貌，應該係咁…
就係梁開括弧洛施加西童閂括弧除二乘陳法拉得出嚟嘅積再開方；吓？睇唔明，都話要讀多啲書㗎啦，寫埋出嚟畀你哋睇，即係咁呀…
❲梁(洛施+西童)÷2×陳法拉❳^½
再唔明都無計㗎喇。
Q：「咦？！你咁快有反應嘅！」
我：「喂，我聲明，我唔係因為妳嘅美貌而所以咁樣呀，只不過係…我朝早起身急殊殊。」


我都唔想㗎，瞓覺著住三角褲真係會焗死自己，所以我都係得一條波褲喺面。
Q：「去死啦，重以為你受唔住我嘅美色而敬禮。」
我：「嘩…咁我成日對住妳，由朝敬到晚咪好忙？」
Q：「呢啲係對住女神應有嘅態度嚟，嗯，應該係。」一齊住咗兩日，佢真係越嚟越黐線。
我：「咦，原來妳都有個肚腩仔…」
Q：「快啲去屙你嘅尿啦，仆街變態佬。」
我：「噍，妳夠半夜起身屙夜尿咯。」