為了實現媽媽遺願，我成為了女兒國唐僧: 拾

我：「咁妳做乜唔跟住媽咪？」
Q：「我阿媽話同我一齊都唔方便，掉咗我去舅父度住…但佢無乜錢畀佢阿哥，我喺佢哋度又要爭廁所爭電腦用，表姐同表妹都好唔妥我…」
講到嚟呢度佢又喊咁口，睇嚟真係好大委屈。
我：「呢度得我一個人，應該唔使點爭嘅，妳可以放心。」
Q：「哈！你敢同我爭？」
我：「唔敢…妳想點就點啦，我屋企係咁㗎嘞。」
Q：「呢度係咪真係得你一個住㗎？」
我：「年頭嗰陣婆婆都會經常住喺度嘅，至少都會喺度煮飯畀我食，但佢身體越嚟越差，我又唔多使人湊，又唔識照顧返佢住，佢咪返去舅父屋企住囉，我都叫佢唔使過嚟。」
Q：「你都幾乖㗎喎。」
我：「一半半啦，佢喺度其實我都無啖好食…咁我老竇行船嘅，一兩個月先返嚟一次，聖誕同新年啲船期好爆，下次返嚟可能要到二月尾㗎喇。」




Q：「原來係咁，唔怪之得你咁自由…」
我：「都係嘅；咁妳媽佢點？真係唔理妳？」
Q：「佢…搵咗個細佢幾年嘅二世袓投靠…」
我：「吓？男人？」
Q：「嗯…」
我：「咁不得了…老公一走咗…」
Q：「唔好問我啦！我唔想理大人啲嘢呀！」
死火，講錯嘢添。
我：「好好好，唔問喇，但二世袓…妳過埋去應該都無乜難度啫，總好過我呢度咁屈騭。」
Q：「我媽好後生㗎咋，佢廿歲就生我，個男人三十都未夠…我阿媽佢擔心…」




唔係呀話，母女丼咁嚴重？我以為呢啲嘢只會出現喺小說漫畫成人動作片㗎咋喎，睇嚟佢媽咪嘅擔心並唔係無根據嘅，而係真係好危險。
Queenie咁靚女，我諗auntie佢…嗯。
我：「妳放心啦，我對妳無非份之想。」
Q：「唔準呀，我喊㗎！我已經好慘喇！」
我：「咪話咗我無囉…唔好喊啦。」
Q：「嗯…所以我諗會有一段長時間會留喺你呢度。」
唉，頭痛…本來諗住只係招呼佢一兩日，結果原來係長住，我嘅內心都好矛盾，有得同靚女住我當然開心，但跟住落嚟嘅事要點處理我完全唔知；總之，我哋確認咗對方嘅情況大概係點，知道接落嚟嘅時間我哋要同室共對相處一段長時間，返學又見面，放學又一齊。