我嘅工作就係揀我鍾意嘅女仔拍拖: 呷醋

「喂！呀文！」Kylie把聲係電話傳嚟。
「下…？係..！」我太專心諗嘢。
「做咩呀你..係咪好攰阿..？定係我講嘢太悶..？」佢話。
「唔係呀..！唔悶呀，sorry呀我啱啱行開咗」我話。
「哦…，下次同我講聲嘛..，搞到我好似個傻仔咁自言自語..」
「sorry呀..我唔係有心嫁」
「好啦…，我仲以為你已經瞓著咗」佢話。
「而家幾點？」我問。
「哇…，咁快一點幾嘅，我地傾多一陣就收線好冇？」佢問。
「好呀，傾到兩點？」




「嗯！」佢笑一笑。
「係喎！咁你….」
然後我地繼續咩都傾下咁，由屋企講到去佢工作，再傾下音樂，講最近Netflix 有咩好睇等等等等。佢平時講嘢成日細路女咁，但一講到佢嘅工作，就講到頭頭是道咁，而呢種女仔正正就係我好鍾意嘅類型。佢地平時返工嘅樣好專注好認真，但係一放工返到屋企對住自己嘅男朋友就會好乖好可愛，成個小朋友咁要人氹。Kylie呢個反差令到我好不自覺地就會鍾意咗佢，雖然我仲未係佢男朋友，但係我知道佢對我係對其他人唔同。

「咁啱我地聽日有個event，你得閒可以過嚟呀」Kylie話。
「好呀～一係我嚟會展嗰頭搵你食飯？你行唔行得開嫁？」我問。
「下..！你真係嚟呀？我講下嫁炸…」佢好似有啲驚我會嚟。
「我冇所謂呀，聽日我咁啱都要去灣仔嗰頭見客」我隨口噏咗個藉口。
「真係…？好似唔係幾好喎..」
「哈哈，明明啱啱就係你話我得閒可以嚟睇」我笑住講。




「咁..我諗住講下..冇諗過你真係想嚟」
「唔係呀～聽你講個event 幾有趣呀。咪當嚟支持下你囉～」我話。
「咁好啦…，你想食晏？」佢問。
「我都冇所謂呀，睇你schedule」
「咁你預兩點左右？因為我可能嗰陣先得」
「好呀，就咁話啦～」我話。
「咁聽日見啦～」
「好呀～」我講完之後大家靜咗十幾秒。

「喂？」我話。




「係度呀」佢話。
「唔捨得瞓呀？哈哈」
「唔係囉..！而家….哇…！！咁晏嫁啦！！又話傾到兩點嘅..！」佢話。
「係喎..，你一陣間仲要早起」我望一望個鐘，原來已經四點幾。
「死啦..！我得返三個鐘瞓」佢話。
「好啦快啲收線啦..，早唞啦」我話。
「嗯..！早唞」….然後又過咗十秒，都係冇人收線。
「你收線啦～」我話。
「你收線啦…！」佢話。
「下點解你唔收線嘅？」我笑一笑。
「咁..你夠唔收線囉..！」
「我唔想收你線呀嘛～」我話。
「咁都得，搞錯阿..」
「好啦，你瞓啦，我真係收線啦」我講完之後就收咗線。同佢傾計好快就傾咗好耐，本身諗住傾到兩點，點知講講下大家都唔捨得收線。已經好耐冇女仔令我咁樣，我開始投入同佢嘅關係。我好似唔記得咗佢係我嘅客人，唔記得咗我自己真正嘅身份係咩。我呃佢我聽日要去灣仔，但其實我連一份正正經經嘅工都冇..





聽日中午我一點已經到咗會展入面，我周圍行下，想搵下Kylie係邊度。我行咗一陣就見到佢，佢拎住一疊leaflets，但隔離有個男人同佢平排行緊，佢地兩個都貼得幾近。我望到個心有啲唔舒服…，可能係因為佔有慾，我已經當咗佢係自己女朋友咁…。我行遠少少，驚比佢發現我，然後繼續靜靜地觀察。佢地兩個有講有笑，Kylie間唔中仲會打一打個男仔，好似好close咁。我啲醋意開始越嚟越濃，我唔知佢純粹係同男仔易friend 定係佢真係對個男仔有好感，所以我決定一陣試一試探佢。係我諗緊嘢嘅時候，我察覺唔到Kylie已經慢慢行緊過嚟。
「喂～咁早嚟嘅！」佢拍一拍我膊頭笑一笑。
「哇..！嚇親我。我冇呀我見同個客早咗完咪過嚟睇下」我講嘢嘅時候不時望一望佢隔離嗰男人。
「哦～係喎，佢係Jensen，我同事」佢話。
「你好～」我點一點頭。
「Hello」Jensen回應。
「咁不如我地早少少食啦，Jensen你幫我睇住個場得唔得呀..」Kylie話。
「好呀，你地去啦」Jensen好似好無所謂咁講，但我feel到佢嘅敵意。
「好，咁，我地行啦」Kylie同我講。
「嗯，好呀」我話。然後我等佢放返低啲嘢就一齊行出去食飯。

「你同Jensen好friend？」我問。
「唔係呀，咪普通同事咁，做咩？」
「冇呀冇嘢」我話。
「哦..」




「冇呀，見你地好似好close咁嘛」我咁講有啲唔成熟，但我控制唔到自己唔呷醋。
「唔係囉…，邊度有」佢話，然後我冇覆佢。我地行咗一陣，然後佢無啦啦講..
「你…，你呷醋呀..？」佢細細聲問。
「…..痴線..」我話。但呢一刻，我心跳加速咗…，因為我知道，我真係呷醋….。

忘了是怎麼開始
也許就是對你 有一種感覺
忽然間發現自己
已深深愛上你