我嘅工作就係揀我鍾意嘅女仔拍拖: 為你心動
「話說呢...」我同Rainbow講。
我由五年前失戀去唱K比Cherine半醉口爆，去到speed dating 見返Cherine開始講。
Speed dating 之後嗰日我同Cherine就開始有Whatsapp傾計。平時返工手機一響我就會望下係唔係佢，然後不斷好似等緊佢嘅message咁。James好快就睇穿咗我溝緊女，成日想chok我究竟溝緊邊個。
「屌～死仔，快啲講啦，又唔會同你爭食」James話。
「溝到再算啦～唔想咁揚」我話。
「驚咩姐，你又唔係溝公司同事」
「得啦屌，到時再同你講啦」我唔係好想比佢知係Cherine，但係冇幾耐，公司熟嗰幾個都好似知道咗我係speed dating 度識咗個女仔。
「嗱～都話跟我去有你著數啦～」放lunch嘅時候Kathy陰陰嘴笑望住我。
「你地唔好聽James亂噏啦...」我無奈咁話。
「唉..我同嗰幾個男仔傾咗一陣都冇咩好講。明明嗰日傾嘅時候都好多話題，唔知點解一Whatsapp 就好似好耐先覆，仲要覆得幾個字」Kathy頹頹地咁話。佢算係喺我地班人入面最老，印象中大概35左右，一直都好急住搵個男朋友同佢過世。
「慢慢嚟啦Kathy姐，...呢啲唔急得嫁嘛。不過我都冇諗過最後呀文會係大贏家～」呀欣笑一笑抽我水咁話。
「識個朋友姐..」我話。
「得啦得啦，識朋友～」James講完之後拍咗我幾下膊頭。望住呢啲仆街仔有時真係好想打鳩佢，不過佢勝在好有義氣。佢講完就同Kathy 行係前面，呀欣就專登收慢腳步同我平排一齊行。
「係咪上次你睇中嗰個？」呀欣係我耳仔邊細細聲問。
「...嗯」我話。
「哇...！你地一齊咗？」呀欣好驚訝咁講。
「殊....，未啦...！邊有咁快，都唔知人地鍾唔鍾意我」我苦笑咗下。
「加油呀～我撐你嫁」佢笑一笑。
「哈哈，多謝你」我話。
「叮～」我望一望手機：
「我都放lunch啦，自己周圍睇下有咩食」Cherine覆我。
「你唔同同事食咩？」我Whatsapp問佢。
「我公司好少同事會一齊食嫁，多數都係自己食炸～」佢加咗個唔開心樣嘅emoji。
「你係邊頭返工呀？」我問。
「我多數Work from home，間唔使洗office就灣仔嗰頭」佢話。
「係喎，你返咩？」
「冇呀～你當係類似freelance 咁，我做design 嘅」佢話。
「聽落咁犀利嘅～哈哈」
「唔係啦..，會越做越窮～ lol」佢話。「我養你囉！」，傻啦，我點敢咁樣覆。
「我都有啲fd做design，不過應該design都好廣啦」我其實冇fd做design...，純粹R水吹。
「係嫁～可以好唔同嫁，我就咩都做下咁囉～」
「icic，好啦我食飯先啦」我話。
「好啦...，我自己睇下有咩食啦」佢send咁個唔開心嘅emoji。
「哈哈，最多下次陪你食」呢啲時候有位唔入正傻仔，同時可以試下水溫。
「好呀，得閒可以搵你食～」佢話。我心入面暗爽緊，至少佢比咗個機會我地單獨食飯。雖然我唔會好似細個嗰陣，覺得女仔肯同你去食飯就覺得得米，不過都算係個好開始。我幾享受同Cherine而家呢種關係，佢唔會抗拒我追佢，我想同佢可以慢慢咁進一步。
就係咁，我同佢keep住每日都會傾計，每朝都會講早晨，每晚都會講早唞。然後我follow咗佢ig，第一時間就stock唒佢之前啲post，等我可以了解佢多啲。「Follow」呢個掣其實好似一條連結兩個人嘅繩，當大家都係對方嘅Follower嘅時候，同對方嘅聯繫就會慢慢建立咗。最神奇嘅地方係，當你每日都keep住睇佢story嘅時候，你發現自己係不知不覺間已經進入咗佢嘅生活一部份。今日佢同一班女人食咗間好好食嘅壽司、琴日佢係西環嘅某間cafe飲咗杯latte，個咖啡師拉咗隻佢覺得好可愛嘅熊仔比佢、前日佢call咗架uber但唔知點解等咗好耐都唔到...，一切關於佢嘅生活好似不斷投射緊係我嘅螢光幕前面。我只要透過手機，就已經可以感受緊佢嘅生活。不過社交媒體雖然方便，但係比起呢啲文字、圖像、影片，我更加想嘅係同佢嘅交流、互動。我想望住佢，由佢把口講比我聽嗰間日本餐廳好好食。我想同佢去嗰間cafe，一人一杯咖啡，然後我地鬥我地嗰兩杯，邊杯拉花拉得好睇啲。我想陪佢一齊呻，鬧下個uber司機亂兜路，然後攬住佢講唔緊要。我想我想好想....，全部都只不係而家訓咗係床上面嘅我嘅諗法。唔得...！既然我係鍾意佢，我應該要再主動啲搵佢。
我透過佢ig知道佢鍾意飲咖啡，然後我send咗啲我朋友推薦過嘅cafe比佢。過咗一陣，佢覆咗我：
「呢間好似幾正！」加咗個心心眼。
「我都覺！！應該幾正哈哈」
「不過好似有啲唔就腳...」佢話。
「下次一齊去試下囉～我可以揸車呀」我諗咗一陣，決定改咗「下次」佢，先再send過。
「係喎～下星期六一齊去囉～我可以揸車呀」我都係想試下約實佢，因為如果講下次，都唔知幾時先可以約到。
「呼....」我呼咗口氣，吞一吞口水...，然後一直好緊張咗望住ig嘅chat room...。Seen........，咁耐都仲未覆嘅..。呢一刻，我好似親身體驗緊狹義相對論，因為時間變得好慢...。終於..唔知過咗幾耐，Typing...
「我星期六唔得呀」....等咗咁耐佢就係覆咗我呢句，但係我完唔知應該點覆。唉屌..，我都估到會係咁。人地咁靚，我邊度襯得起佢。我開始怪自己點解會咁急約人，應該傾耐啲先..，唉我真係好蠢。點知，過咗一陣：
「不過我星期日可以吖～」佢又話。
「好呀～咁星期日見」我加咗個開心嘅emoji。
我自從出咗嚟做嘢之後，好耐冇試過因為女人而咁開心。遇到佢好似令我感受返久違嘅初戀心動，我地開頭因為一次意外而認識。而我冇諗過嘅係，我會咁鍾意佢，甚至連自己都唔知道究竟係由幾時開始鍾意佢。可能第一眼見佢訓覺嘅時候就比佢外表吸引住，之後亦都因為同佢相處而更加想了解佢。
Oh...Babe 長時期為你分憂
無名無份地相處似漂流
從來只有一個要求
別再扮朋友 直接地回覆都夠