我嘅工作就係揀我鍾意嘅女仔拍拖: 救命稻草

———

我同Cherine 嘅故事就係一個咁奇怪嘅經歷下開始咗。我再點起咗支煙，然後大大力咁吸咗一啖，想將所有嘅負能量全部吸入自己個肺，然後再用力呼返出去。每次當我真係頂唔順嘅時候，我就會用呢個方法去逃避。
用力吸，用力呼，用力去忘記

我回憶嘅過程已經足夠我由旺角行返屋企。返到空蕩蕩嘅屋企已經差唔多天光，我飲咗少少Whiskey 就沖涼訓教。

第二日，我起身已經係四點半。因為我請咗兩個禮拜假所以唔洗返工，而今晚我我約咗一個都好一排冇見嘅女人。我地嘅關係其實有少少神奇，佢由「Ex」變做我朋友再變做....一個我解釋唔到嘅特別存在。

因為時間仲早，我決定周圍行下先。我先去咗港島，兜咗一陣就去咗銅鑼灣。我入咗Time Square，隨便行下街。我比一間專賣香水嘅鋪吸引咗，佢地陣味好自然，唔會好濁好難聞。




「先生有冇想搵啲咩？」有個Sales行咗埋嚟。
「哦冇，我隨便睇下得啦」我笑一笑話。
「好，有咩需要隨便搵我啦」佢好禮貌咁行後。
我試咗幾款，有兩隻我好鍾意，係我會想一直聞嘅香水味。我諗咁咗一陣，決定直接買唒兩支返去。

買完之後我行出Time square，呢個時候嘅銅鑼灣真係好多人。我望住一個個著住恤衫嘅人放工，我諗起曾幾何時，我都係一個著住恤衫，返九點嘅普通打工仔。轉咗工之後嘅我變咗好多，變得好唔似我...甚至乎有少少...
「叮叮～」我手機打斷咗我嘅回憶。
「喂？你到邊啦？」我問。
「我係希慎啦」一把性感嘅女聲話。
「咁，我直接去間餐廳等你？我係Time square」




「好啦，一陣見～」
「好～」我講完就直接去咗我地約好咗嘅一間日本餐廳。我攞咗位先，過咗一陣就見到佢行過嚟。

佢叫Rainbow，雖然我成日笑佢個名同佢完全唔襯，但佢講過個名係佢屋企人改，所以一直都用呢個名。佢今日著咗一件露腰嘅黑色短T恤，下身係條緊身嘅長牛仔褲。可能因為佢有少少鬼妹仔性格嘅關係，佢平時都係習慣著啲比較暴露嘅衫，今日已經算係最保守。以前同佢出街啲男人都會成日望住佢，我有問過佢係咪好享受，佢話冇咩特別感覺，只係想著自己鍾意著嘅衫出街。
「嗨～」我難得咁笑一笑。
「哇，文哥～咁難得約我呀」佢笑住串一串我。
「攞咗假呀嘛，今日第一日假就比咗你～」
「哈哈，咁我咪好榮幸？」
「係嫁～」我話。
「睇你得戚到，哈哈」




「好啦唔玩啦，你睇下想食咩啦」我拎咗個menu比佢。
「你請呀？」佢問。
「不嬲嫁啦，邊有要過你比錢」
「哈哈，循例問下嫁炸，我冇帶銀包～」
「如果下次我話AA呢？」我問。
「咁我唔會再出嚟～」
「頂你..」我知佢講笑。
「好啦，我要....」佢同我講咗佢食咩就比返個menu比我。
「係喎，送比你」我係將櫈令起咗袋嘢比佢。
「傻仔..做咩無啦啦送嘢比我嘅？」佢拎起咗袋嘢，想睇下入面係咩嚟。
「冇呀～想洗下錢但諗唔到點洗。諗諗下洗係你度應該唔會曬」我笑住講。
「你比隔離啲人聽到會以為你包咗我」佢笑住反一反白眼。佢拎咗支香水出嚟聞。
「鍾唔鍾意呀，我覺得呢兩隻都好聞」我問。
「兩支都好正！！多謝～」佢好似真係幾鍾意。
「哈哈，鍾意就好。咁我叫嘢食啦」





因為都有一排冇見，所以食飯嗰陣大家都好多嘢講。食完飯之後佢同我講佢聽日咁啱都放假，所以都唔使太早返屋企。我地由銅鑼灣行咗去灣仔碼頭搭船，去咗尖沙咀。我地行咗去海運中心上面有個望海嘅位坐低咗：
「岩岩未講完！上次呀，有個幾靚仔嘅同事約我，隔離Team嘅。但係點知嗰日佢遲到..！仲要勁唔識做，搞到我燥燥地」佢邊坐低邊話。Rainbow 係其他人面前都幾cool，唯獨是對我嘅時候個人會放開好多。佢話過係因為得我知道唒佢啲秘密，同埋我地每次見面，講嘅話題都講得好deep。
「你要求高姐～」
「唔係啦...，就算靚仔呀，性格唔得都冇用啦」佢話。
「咁又係，最緊要睇下夾唔夾姐」
「咁你呢？係咪仲諗住繼續做呢份工」佢望住個海，轉咗個認真嘅tone問我。
「我唔知..」我話。
「不如算啦」佢話。
「我有諗過」
「我都唔想望住你咁」佢有少少擔心咁講。
「多謝你」我苦笑咗一下，然後攬住佢膊頭。
「...」佢冇出聲，然後慢慢挨個頭落我心口度。
「呢份工都好呀，至少比我遇到你」我嘗試正面啲諗。
「我又唔係會同你過世..你知嫁」佢話。




「至少而家，你陪住我已經好夠」我講完就更加用力攬住佢。今晚，我好需要一個人，一個明白我嘅人係我身邊。而Rainbow，就係我嘅救命稻草。

我地靜靜咁望住個海，過咗一陣，佢抬起頭錫咗我個嘴。我將攬住佢嘅手去摸佢個頭，然後不斷錫佢。
「陪我？」我係佢耳邊問。
「嗯」佢答。
「乖」我摸摸佢塊面，然後好甜咁笑一笑。而家係得佢可以令我放低唒所有唔開心...，雖然呢個角色以前唔係由佢去做..。

多謝你，係我需要嘅時候陪住我

Cos You’re My Superman
你會令難過亦過得好