我嘅工作就係揀我鍾意嘅女仔拍拖: 初嘗Speed Dating
第二日我返到公司，James一見我返嚟就捉咗我出Pantry 問我當日返生嘅事。
「你唔好扮呀，我問佢，佢話佢唔係係k房過夜嫁」
「屌你啦，我鬼知佢去邊度過夜咩」我答。
「真係咩...，唔撚信！」佢邊斟水邊講。
「講咩你都唔信嫁啦，End Topic～完全冇討論嘅價值」我話。
「屌你真係冇鬼用，餵到埋口都唔食？」佢飲咗啖水之後講。
「我似你咁癲咩，因住玩出火呀」我開打雪櫃。
「喂，講真。飲得酒，預咗啦下話。唉，同你講都唒氣，早知比我算」佢話。
「挑，你拎去囉咁叻」我口係咁講，但係心入面都唔想James食咗佢。因為呢條友雖然鳩下鳩下，但講溝女真係有一手。佢個樣唔算好靚仔，但勝在面皮夠厚同口花。
「我廢時臭朵啦，你知佢係我大學同學。係同一個池釣魚係溝女大忌」
「講經啦，方死你會放過佢咩，你條友冇人性」我再試探。
「傻撚咗咩..呢啲...」佢講到一半，有另一個女同事行咗過嚟。
「呢啲客呀....唔搞得嫁..。跟咗會好長手尾」佢即刻改口。
「聽你講住先啦，一陣你唔夠數咪又係會搵佢」我配合佢，但係大家都知道唔係講緊公事。
「你地傾緊咩呀？」呀欣問我地。呀欣係隔離Marketing Team算係最靚女嘅Team花，一米五七嘅佢加上可愛嘅短髮，令公司好多男人都對佢有意思，佢有個朵叫Marketing界林明禎。因為佢同我地年齡差唔多，我地當然唔介意同佢fd。
「冇呀，講緊啲好麻煩嘅客姐」我話。
「哦～好彩我唔洗對啲客姐。係喎，你地有冇興趣去speed dating？」佢問。
「哇，你想玩呢啲咩？」James問。
「唔係呀..，Kathy話想我陪佢去喎...但係我又驚驚地，咪問下你地。到時如果真係玩，我都有幾個熟人可以傾下嘛..。你知我怕生嫁啦」佢話。
「不如簡單啲，我Date你咪算囉~」James又嚟。
「你知我鍾意高啲嘅男仔嫁～」呀欣話。
「車～咁我地去囉。比你睇下矮仔點溝女~」James話。
「呀文呢？」呀欣擘大對眼望住我，好似好期待我去。
「哦...去試下囉，我都未試過呢啲。我當同你地去玩下囉～」
「好呀！！咁我地book今個星期五嫁啦～記住唔好約人呀」呀欣話。
星期五 -
今日我平比時更加早起身，話唒第一次玩speed dating，都想執靚仔少少。返到公司之後，好明顯地，我、James、呀欣同Kathy都冇心機返工，大家似乎都幾期待今晚嘅dating。
放工嘅時候我地四個約埋一齊走，之後直接去灣仔。搭緊車嘅時候呀欣同我地解釋咗個活動。原來今次唔係淨係一對一嘅配對，佢地亦都有食飯、玩board game之類嘅活動。呢次呀欣幫我地報嘅係十二人對十二人，所以總共會有廿四個人，都算幾多。
我對speed dating嘅認識好少，曾經聽過啲fd講入面好多女仔都麻麻地。「因為靚嘅女仔一早比人溝咗啦」、「好多都差唔多三十幾歲，好少後生女」、「而家啲人都用交友app啦，邊有人去..」等等等等，呢啲我都聽唔少。所以我都本住一個識下人嘅心態去玩，反而冇咩特別期待。如果真係咁，我地同事自己圍威喂玩下board game就算。
「等陣我地前後腳入去」Kathy去到樓下嘅時候同我地講。
「是但啦，咁麻煩」James話。
「你唔好阻住我地搵食呀！」Kathy半搞笑半認真咁講。
「得啦你地上去先」我講話。講完佢就同呀欣上咗去先，我同James行咗幾步，佢拎起咗支煙。
「忍下啦，一陣啲女聞到你陣煙味」我話。
「唉，麻鳩煩..」佢收返起支煙。
「你有冇玩過speed dating ？」我問佢。
「老實講真係冇，對呢樣嘢冇咩特別好感。如果唔係呀欣叫，我真係彩佢都傻」
「如果一陣啲女都唔得，不如我地提早收皮去happy hour算」我提議。
「就咁話，到時睇我眼色～上去啦」佢講完我地就一齊上咗去。
一上到去，見到一間幾有特色嘅樓上cafe。燈光偏黃亦都偏暗，可能想營造一個浪漫啲嘅氣氛。門口有個寫住Full booking嘅牌，然後有個女人行出嚟睇核實下身份就帶咗我地入去。一入到去我同James企咗係一邊，因為我地早咗到，所以活動未正式開始。
我對眼好快咁望下在場嘅所有女人，發現有部分係算唔差嘅，當然亦都有部分係不可食用...，但始終都未見到個真係好靚女嘅女仔。我心入面苦笑一下，心諗：真係女神又點會嚟。
過咗一陣就有個主持出咗嚟講解下今晚嘅流程，鳩噏幾句冇人想聽嘅廢話就叫做開始咗。
首先係食飯嘅環節，主辦單位先隨機安排大家就坐。Cafe都算大，佢地分咗兩個area。一邊係由好多張二人枱去組成，而另一邊就係留比board game環節嘅六至八人枱，再上多幾張卡位。我比人分咗去呀欣隔離枱，坐低咗一陣就有個女人坐係我面前。
就咁睇樣我會將佢歸類為「唔差」，五官都算端正，但係冇咩特別吸引嘅地方。不過呢個時候，我嘅注意力唔係佢度，而係一個岩岩遲到入嚟嘅女仔....
點解佢會係度...