我叫張元中，我個妹叫張元英（失敗作，爛左尾，貼上黎做record）: 12

12.


「呼...終於放學！返屋企打fifa先！」


「今日練波呀田鼠！仲想走！」阿玉一手扭住田鼠耳仔







「喂好痛呀喂！我講笑咋阿玉！依家去啦！」



每當有人唔去練波，阿玉一出扭耳仔呢招，基本上個個都就範


女仔之家咁撚大力都係第一次見。







「喂阿琨，練波呀！」大師兄對同班既阿琨講



「黎！我今日實...」


阿琨講都未講完，已經比佢女朋友阿包拉住，跑出走廊







「今日佢要同我補習，練唔到波呀！」


「阿包唔好捉咁實啦喂！！唉拜拜啦咁多位！」



田鼠睇到呢個場面，不禁笑左幾聲


「哈，好彩我冇女朋友姐！去邊都得！」







「你冇女姐！行啦！」




一出班房，果然


又見到果個四眼師妹



「你...做乜響度呀？」







「我話...話左等你架嘛...」



一講呢句，田鼠、阿玉同大師兄都馬上掩起嘴歡呼


「嗚～～～等你喎！！」


「唉拍定手先啦！」







「屌你地收聲啦...你係叫阮真光丫嘛？」我問


「嗯...」



「哦...光師妹！」


三條友起哂哄咁，搞到個光師妹紅都面哂







「屌收皮啦你地...但我依家要練波，唔得閒應酬你喎...」


「吓...哦...」光師妹自己都有啲不知所措



「練乜波丫！作為師兄，你應該要好好幫下光師妹先得架！」


阿玉拉住大師兄同田鼠：「咁我地行先啦，我會同林sir講你比人罰留堂架啦」



「喂！喂！！頂你地個肺丫...」


現場得返我同光師妹響度



我望住光師妹


「唉真係...你做乜咁踴躍去交份功課呢？」



光師妹托一托自己副眼鏡


「因為...miss to話我太內向，所以規定我呢兩個禮拜每日都要黎揾你」



屌...又係miss to



「嗱講明先，我果篇作文呢就諗住求其寫既姐，所以我唔諗住哂時間響度接你放學呀，做埋呢啲無謂野」


「哦...無問題呀...」答得咁乾脆，呢個光師妹應該只係為份功課



「咁我依家呢就去練波，你有興趣就自己跟埋黎啦」


「哦...」



唉，無啦啦多條友跟住



「喂踢波啦喂！」


我嗱嗱脆換好衫，就衝出操場



佢地一見到我，都打左個突


「吓中仔你唔係有約咩？做乜黎踢波呀？」




「咩有約呀真係...唔知你地噏乜鳩！」


我第一時間望向田鼠佢地三個


「喂中仔乜你咁衰架，掉低光師妹？」阿玉怒道


「比哂機會你都唔識上？抵你溝唔到女呀！」肥鼠和應



我馬上指住隔黎既有蓋操場，光師妹正坐響裏面望住我地


「屌，佢咪響入面囉！佢自己話想跟黎既」




一講完，足球隊成班人又起哄


「唔係掛中仔，你咁樣掉低條女？學下阿琨啦！」



「屌，都話唔係我條女咯，miss to要我地玩咩交換作文喎，佢咪跟住黎囉」



成班好似去動物園睇動物既人咁，望住光師妹


「條女...我記得佢上過台架喎」阿康慢慢憶起



「...下？」



「我都記得呀！好似係...全級第一喎！」


周公都好似對呢個光師妹有啲印象




但我，真係對呢個人零印象




「喂仲傾乜計呀！開始練波啦喎！」


隊長同林sir一齊黎到，搞到大家都馬上收口練習



練習途中，我一直好在意響有蓋操場入面既光師妹


練跑果陣眼尾都睇到佢一時響度做緊功課，一時就望過黎，同我四目交投，搞到我專心唔到




「中仔！！守住大師兄！」


練波果陣我同大師兄唔同隊，今次要同佢響右路交鋒



「大師兄～加油呀～～！！」


十幾個大師兄既女fans響一樓睇住，差啲尖叫埋





大師兄響籃球場近中圈位置背住我拎住波


我同大師兄既身型差太遠，根本冇可能同佢用上肢硬碰



眼見暫時中堅阿康未到，大師兄馬上轉身，試圖直接用速度過我



呢個時候，我又再一次望到


光師妹少少肉緊既表情



原本應該集中防守既我，響呢一刻竟然猶豫



「喂！中仔！！」


林sir既一聲大叫，將我喚醒



大師兄已經越過我咁濟，只差四份一身位


依家再追，都未遲！



我馬上發揮自己最出色既速度，回身加速！




「！！！」


雖然大師兄都唔係慢，但比起我，都係差少少


轉身既一刻往往係後衛最致命既弱點，但我可以靠我既速度去彌補！



距離我方門將，乜位都打既後備牛丸


只有一個籃球三分線既距離



大師兄似乎知道自己速度贏唔到我，練波又冇理由用身位直接將我撞低


右腳拉弓，打算直接起腳！！




如果呢球比大師兄起到腳，我響林sir心目中應該又會扣分


「喝呀呀呀呀！！！！」


我已經忘記左自己打緊石屎地，襯個波離腳少少，一野叉落地飛鏟，以左腳將皮球清走！



大師兄距離唔近，當然無比我鏟傷


相反，我就成隻右腳磨哂薑，即刻損哂



「你痴線架！」


「唔好剷傷大師兄呀！」


成班大師兄既女兵即刻屌到我飛起





「中仔，你冇野丫嘛？」大師兄馬上扶起我


「無...無事...」仆街，見撚哂紅




「嘩，咁搏呀中仔...」


阿威走埋黎：「不過傷成咁都好難繼續架啦，你埋去抖下先啦」



「...嗯」我無奈地徐徐行向一邊




「鬥志幾好喎」


戴左黑超既林sir笑左一下：「不過體能方面，自己諗諗佢啦」



「...嗯」



「中仔做乜咁搏呀，睇下！流哂血啦！」


阿玉似乎已經去左醫療室拎左藥箱



「冇事冇事...雖然少少痛」


「咪扮野啦...遞隻腳黎啦！」


平時隊員有受傷，都係由考左急救牌既阿玉幫手搞


但偏偏大師兄就係鐵人黎，未傷過





「嘩好乸呀喂，阿玉你細力啲丫」


阿玉冇理，繼續大大力捽我個傷口消毒



「唔大力點消毒呀！」不過講就咁講姐，多次實戰經驗下，阿玉既手勢已經好純熟



「你又係既，冇啦啦落咩剷呀，練波姐...」




「sorry囉差啲剷傷左你個大師兄」嘿，睇阿玉都係擔心呢樣姐



「你...你講咩呀，收...收聲啦！」一講到大師兄，阿玉又即刻口質質


「我...以為...你係特登想響光師妹面前威威咋」



吓？！




我馬上望入室內既光師妹，佢果然係望住我




想點呀佢...