《我將一位宅女變成女神，然後再將自己變成佢隻兵》: 下集 (2)
有一日。
我地幾個男仔照舊食Lunch傾計，當作賽後報告。
『我都差唔多放棄咁濟，依條女我媾唔過。』阿龍說。
『媾唔過定係媾唔到先?』阿Sam串阿龍。
『你地真係廢，好似我咁，一直都順順利利! 琴晚我同阿雪仲傾到凌晨三點幾!』
『你個死仔! 日日都講到阿雪好似天上有，地下無! 講到我對阿雪都心思思! 不如我都去追佢!』阿龍說。
『你要追我無所謂架! 公平競爭! 不過阿雪呢~同你就....哈哈! 好有出入囉! 我同佢既關係依家簡直就係完美!』我自豪地說。
『巴屎閉啦你!』
『話時話，你都拖左好耐，你幾時得手呀? 就放Sem break la!』阿Sam說。
『黎近聖誕節，我決定上啦!』
『你要表白?』阿言說。
『無錯! 依世仔都未試過親口表白，我覺得時機到啦!』講講下，一提到表白都覺得自己有D緊張。以前追女仔都未試過親口表白。
『你唔SMS表白?』阿言問。
『所以話你毒撚就岩! 表白用SMS? 你玩呀? 衰梗! 』阿Sam說。
『無錯啦! 我Plan好啦! 約佢去海邊! 之後表明心跡! WOW! 完美! 』
『祝你好運啦!』阿Sam說。
其實我都無Plan過，只係亂up一下，不過暫時我觀察所得，我同阿雪真係可以一齊，我諗唔到有咩理由可以唔得，街我地又出過，佢又唔討厭我，我地關係又好好，SMS又成日傾，連莊務都痴埋我做，其實大家都係差一句說話就一齊啦? 係咪?
黎近聖誕節，我決定左要同阿雪表白。
由於Sem break關係，我都無再返HALL，返返屋企住。自自然然對多左阿靜，而且都成日去佢屋企食飯。但感覺都係陌生左好多，總覺得返唔到以前個種關係同感覺。
『黎近聖誕節有咩做?』 阿靜邊洗碗邊問。
『無呀，年年都係咁過架啦，一大班人為出街而出街，唔出會比人當毒撚，出左又唔知做咩好，周圍行下打發下時間咁囉。』
『但一班人出去玩都幾開心呀。』
『年年都係個班人出，咩都玩過哂! 仲有咩好做! 係呢，咁你呢?』
『無呀，留係屋企囉!』
『阿風無約你咩?』我問。
『你講到佢好似我男朋友咁，我唔係囉! 同埋唔好成日將我同佢講埋一齊啦!』阿靜似乎有D嬲。
『全世界都知佢鐘意你啦，聖誕節係食女既最佳時機，佢實做野架啦!
『點解聖誕節係食女既最佳時機?』阿靜問。
『依D大時大節既氣氛最令人感到寂寞，最需要有另一伴係身邊，通常依個節日最岩拍拖，單身既人都好易接受對方。』所以，基於依點，我選擇依個節日同阿雪表白。
『車......咁你咪係個節日同你心上人表白囉!』
『哈哈哈! 唔知架! 你都係啦! 咪咁毒啦! 脆脆地答應阿風囉! 人地又有錢! 讀書又叻! 捉棋又勁! 完美條件呀!』
阿靜聽到後望一望我 :『你唔係好憎阿風咩?』
『憎架! 但為左你既幸福無計啦! 唔通有個好男人係你面前，我叫唔好上就唔上咩!』
『但係我覺得阿風唔係咁岩我......始終我同佢識左唔係好耐。』阿靜似乎有點憂慮。
『喂! 如果識得耐既話就結婚啦! 依家拍拖之嘛! 可以一路拍一路增進感情，認識對方架!』
『但如果拍左拖發覺唔岩咁點?』阿靜問。
『Hey!!都唔知你驚咩! 依家人地追你，你無野好輸架! 最緊要唔好失身比佢呀!』
阿靜聽到後，個腦諗左一陣，有少少面紅地說: 『失咩身呀.....核突。』
『女人既價值會升都會趺，升可以因為你既外表，內心性格而升，跌都可以因為你外表! 但你知唔知有咩野會令到女人既價值趺到好似金融風暴咁呀?』
『係咩呀?』
『唔係處囉! 你一唔係處! 你既價值就無左一大半! 你同你伴侶愈攪得多野! 你既價值就慢慢~慢慢咁跌! 跌到係個市埸上低哂價! 對我地男人黎講! 真係扣哂分! 都唔會點珍惜! 所以呀……你諗清楚先比人呀!』
『又係高登成日講D處女論! 你鐘意個人定鐘意個處女膜?』
『男人係一個好自私既仆街! 又要條女係處又要想攪野! 係咁自私架啦! 我鐘意個人自然鐘意埋佢個處架啦! 突然間無左樣野比我鐘意! 個心點都頂住頂住!』
『唔同你講依D!』阿靜繼續專心洗碗。
望住阿靜，我都估唔到自己會講得出依堆說話，竟然會叫佢諗下阿風，不過都好既! 唔試又點知岩唔岩。加上我最近對阿雪既感覺愈黎愈強烈，慢慢將阿靜係我腦入面慢慢消除，既然係咁，我好應該以朋友既身份同阿靜講，搵下佢既幸福。
返到屋企，對於我從來無同人親口表白既經驗，唯有上下網問下人，同時都搵下一班網友傾下點表白! 同埋覺得突然約人地出黎，講一句鐘意你，之後收皮既話真係幾柒! 唔通要人地山長水遠黎聽你廢up一句，就返屋企? 如果食埋飯，仲衰! 叫人地點樣可以拒絕左你之後仲可以同你食飯?
於是我就開始計劃一下，點樣可以更加完美，更加有氣氛。
阿明:
阿雪! 黎近一唔一齊去睇燈飾呀?
阿雪:
好呀^^! 我地叫埋阿龍佢地丫
阿明:
我想同你兩個去
阿雪:
但多D人去開心點嘛!
阿明:
唉= =
阿雪:
= =做咩唉呀?
阿明:
總之就想同你兩個出黎啦
阿雪:
你係唔係有唔開心野要講呀?
我仲以為講到咁明顯，佢實以為我媾佢，但佢竟然Get到我係唔開心先搵佢出黎傾計，雖然唔係咁好，但依個係唯一可以有藉口叫佢出黎。
阿明:
唉! 總之我有野想講
阿雪:
好啦好啦! 我去啦!><唔好咁
阿明:
聽晚八點係尖沙咀海旁等! OK?
阿雪:
OK^^
雖然好似幾衰咁，但唔理啦! 約到佢出黎就得! 我個心突然有一股從來未試過緊張既心情湧上黎! 媽呀! 我大個仔啦! 聽晚要表白啦! 求神拜佛! 一定要比我成功呀!
為左唔好咁單調，我通頂將我同阿雪所認識既經歷一一寫哂出黎，我先check 阿雪同我係Facebook既成為朋友時間，再由M群認識到今日既經歷，我一一寫成一個故事，再去印出黎，再修正大小，終於比我製成一本書。
我再將本書加返唔同既主題，然後親手畫公仔表達個主題，例如《相識》，我就畫左幾隻火柴人，畫埋個對話圈，攪下gag咁! 今次真係花左好多心思同誠意係到，咁大個仔從來都未試過咁認真去表白，仲要係親自表白，真係勁緊張。
我一直都同網友係到商討依件事，佢地就好似我既軍師一樣，一直比意見我，所以我不斷向佢地呻我真係好撚緊張，一諗起表白個個畫面我真係腳都軟埋，阿Sam講得岩，毒撚先會係sms表白，因為咁緊張咁尷尬既埸面，毒撚一定受唔住!
*********************************************************************************
終於到左聽晚，我好早就執正自己個look，實行以最完美既姿態去表白，電腦上既MSN不斷彈出，因為班人都知我係時侯夠鐘出門，令我諗起電車男咁，班網友係咁叫 : " 上呀! 電車! "。有左佢地支持，有左咁完善既計畫，我諗唔會衰。
阿雪:
我出左門啦 ^^
SMS提示響起，意味住我好快就要同阿雪見面，我琴晚訓覺前諗左好多，係到諗下阿雪成為左我女朋友之後，我既生活有咩大轉變? 有左女朋友既生活 又係咩感覺咩? 如果失敗左，我同阿雪又會變成咩關係呢? 我諗左好多好多種假設同結果，但既然都發展到咁，我唔應該再驚前驚後，我唔想後悔，加上新一年都黎，得左定衰左，我都想有個好開始。
我拎住本我精心炮製既"書"，放入袋後，暗暗地對自己說: 『加油!』 就開門出發。
到達火車站時，我琴晚約左佢先係火車站見面，所以一直企係個7仔門前等，由於正值夜晚，加上聖誕節關係，真係超多人，人來人往，突然間令我感到有少少頭暈。不過我明白頭暈唔係因為多人，而係我真係好撚緊張，我手汗都出埋，個心跳得好快好快，腳都軟埋，本來我聽到mp3，都頂唔順除低佢! 隻眼一直望住個出閘口，口水都係咁狂吞，屌你老味，真係好撚緊張! 我曾經有一刻念頭 " 不如算啦!我淆底 "。
但既然堅持到依一刻，點都要繼續落去。仆街!好緊張呀!
突然間，阿雪以一身好靚好靚既打扮從閘口出現，佢係遠處見到我後帶以微笑回禮，佢上身著左件乾濕褸，一條頸巾，加上著上一對黑絲，好靚咁樣行埋黎。好明顯佢今晚真係打扮過黎，我吞一吞口水，因為佢行緊埋黎。
『哈哈! 等左好耐呀? 』阿雪一句甜蜜既聲線打開左我今晚所計劃既序幕。
『唔係丫! 岩岩到之嘛!』
『係呢.....咁…….依家去邊呀?』阿雪問。
我吞一吞口水，然後說 :『咳咳…...首先今晚我就計劃好哂個行程，但依個計劃順唔順利進行，同埋成唔成功，就取決於你。如果唔係，今晚好快就會完。』
『哈哈!!!咩計劃呀? 好呀! 黎啦! 』
『首先…...你伸出一隻手出黎先，但記住! 當你伸出一隻手出黎個陣，個計劃就正式開始，所以你可以唔伸....』我講都未講完，阿雪就伸左隻手出黎 : 『快D啦! 哈哈! 』
聽到阿雪咁講，我即刻伸出一隻手，十指緊扣地拖住阿雪走。阿雪見到我咁既行為好驚訝，於是笑問
『哈哈! 你攪咩呀?』
我轉頭用手指放係咀出面 :『殊.....! 計劃開始左!』
『哈哈! 好好好!』
由火車站行去海旁係有一段既路程，而我就一直拖住阿雪隻手慢慢咁帶佢行去海旁，個腦一直係空白，好似所有野都黎得好急，但我心入面就係到暗爽緊。阿雪隻手好細，好滑，係咁凍既天氣下，原來拖手仔係一件最溫暖既事，佢既體溫從佢隻手傳去我手到，再傳送到身體每一個地方，真係好溫暖。我都係第一次拖女仔隻手拖咁耐。
一路上，我有時見多人，就會大力拉阿雪埋黎，有時侯紅綠燈就會停低，而阿雪都會笑問我做咩事，又話我手汗好多，我都笑笑口回應:『唔好問住!』
一路上，街上都好多對情侶，而我同阿雪係到行，就好似加入埋一群咁，原來拍拖真係好好feel，真係好Sweet，感覺好正。特別我拖住阿雪，阿雪今晚打扮吸引到身旁既人都會望一望佢，我可以感受到身旁既人對我個種葡萄心態，係呀! 阿雪係我女朋友! 唔好提子我!
行到海旁，我慢慢放開手，然後一直望住個海。心入面緊張到仆街，而阿雪都問: 『下?完左啦? 之後點呀?』
『之後......就有說話想同你講。有樣野屈左我心入面好耐好耐，好辛苦，好想講出黎。』
阿雪見我心情突然沉重，於是問:『如果有咩唔開心既野，可以同我講架!』
『係開學個陣時，有一個女仔我見到佢既時侯，就已經好留意佢，估唔到會同佢O camp同一組，估唔到佢會成為我既同學。佢心地好好，性格好好，個人又靚，簡直就係一個優質股票。佢好吸引我，但我怕佢唔會接受我，於是依幾個月黎，我同佢出過街，一齊玩，每一日都SMS對方，什至一齊做功課，一齊上莊......依段時間我地都好開心，我好想佢永遠都係我身邊，好想…….好想佢成為我既女朋友。』
我轉身向住阿雪認真說一句:『我所講既女仔......就係你。我鐘意你。』
今年二十一歲既我，第一次咁認真面對一個自己鐘意既人，講出一句發自內心，真誠既說話。當我由口中講出"我鐘意你"既時侯，時間好似停止左咁，氣氛突然間變得沉靜，靜得可以聽到自己既心跳聲，全身由本來既緊張，慢慢放鬆起黎，一直等待對方既回覆。
阿雪聽到我表白後，面色一沉，本來雙手掂住海旁邊既欄杆，慢慢放開雙手，腳步後移數步。當我見到佢有咁既反應時，我大概已經知道答案。
『如果....如果...我知道你會講依D野既......我一定唔會出黎......』阿雪慢慢說出。
『阿雪.......』睇到阿雪既臉色，大概我既說話已經傷左阿雪既心，我好似呃左佢出黎咁。但我個一刻其實對阿雪既反應有點不太明白，唔通佢完全無諗過我咩?
『我......要走......』阿雪轉身便走。
『唔....唔好! 阿雪! 你聽我講!』我上去拉住阿雪隻手，阿雪即時嚇得退後數步，而且雙手推出，好似要同我劃出一定既距離，唔想再同我有任何身體接觸。
見到阿雪咁，我好心痛，真係好心痛，佢咁既反應好明顯.....好明顯.........佢怕左我。
『你......做咩呀?阿雪。』
『如果....如果...我知道你會講依D野既......我一定唔會出黎.........如果...我知道你會講依D野既......我一定唔會出黎........』阿雪不斷重覆依兩句說話，佢既反應嚇怕左我，同時令我感到好無奈。
『阿雪呀......唔通你對我一D感覺都無咩?』
阿雪不斷搖頭，眼淚開始流下，面對咁樣既阿雪，我更覺無奈。
『點解呀.......點解你講依D野呀.....』阿雪喊了，佢雙眼變得好紅，聲音開始沙啞。
『我........鐘意你，所以......所以我咪同你講囉。』我發現我聲音都開始變得沙啞，雙眼好熱，好熱.......
『你.......知唔知講左依D野，會返唔到轉頭架!!!!』
『我唔明呀!!!』
『你明呀!你明呀!!』阿雪不斷雙手打我的胸前，我既視線開始被淚水弄得模糊，但近距離可以睇到，阿雪既頸巾已經被眼淚所弄濕。
『唔通你對我一D感覺都無咩? 我一定會好好咁對你，一定專一咁對你......』個一刻，我已經唔知自己講緊咩，個一刻，我腦海浮現緊咩出黎，我就講咩出黎，完全無經過大腦既思考。
阿雪再一次搖頭，然後說出一句，令我永遠記得既一句，永遠....永遠都記得既一句。一句對我今生今世都好大影響既一句。
『我知你好好，你係一個好好…….好好既男仔，不過.......不過我唔可以因為你既好而同你起埋一齊。如果對方係一個衰人，就算幾壞都好，只要有感覺，我都會同佢起埋一齊。』
由細到大，阿媽就一直教我，做男人，一定要對自己老婆好好，要做一個好男人! 要專一! 要鍚佢! 要比幸福佢! 唔好比佢傷心，唔好做出一D傷害大家既事，一定一定要鍚對方。自細一直都阿媽灌輸依種價值觀，而我一直都聽阿媽講，要做一個好男人。但原來.......係感情上，好男人唔係輸比壞男人，而係輸比感覺。
我聽到阿雪講依句說話後，我呆左，我真係呆左。自己一直堅持住既價值觀，就比阿雪一句說話狠狠咁打破左。而我......更加估唔到阿雪係一個依感覺去鐘意人，係學校我成日聽到阿雪讚我好好人，話邊個做我女朋友一定好幸福，令我覺得阿雪係會鐘意一個好男人，但原來唔係。
聽到阿雪依說話後，我苦笑了，輕輕說出 :『估唔到你會派好人卡比我。』
『我唔係呀.....我唔係要派卡呀.....我真心講架.....唉.....』阿雪喊到講唔到落去，一直係我面前喊.....喊.....喊。但我唔明阿雪究竟點解會喊，佢喊係為左咩? 佢係為我而喊嗎?
『我知你一定唔會再搵我......我....好驚....我真係好驚我地做唔到朋友....我真係好驚呀...點解你要講呀!』
原來阿雪擔心.....係擔心我唔會再理佢，擔心我地之間既關係到此為止，擔心會失去左我依個朋友。
劉啟明，你既角色係咪永遠只係適合做人好朋友，而唔係做人男朋友?
劉啟明，識得哄女仔開心，咁又點? 你只係一個識得哄女仔開心既好朋友。
劉啟明，講到底，你都係無資格鐘意人。
劉啟明，你既自信係邊到黎? 哄人開心 ? 引人笑 ? 定係同你出街就當左人地鐘意你?
劉啟明，你以為每日同你send msg就代表佢對你有好感嗎?
劉啟明......你真係好失敗。
依一刻，我崩潰了。我眼淚不斷湧出，一發不可收恰。我真係好失敗......真係好失敗。
我慢慢退後數步，慢慢轉身對住個海，呆呆地企著。過左一陣，阿雪企係我格離，一直望住個海。我地兩個一直無出聲咁望住個海，除左聽到海浪之外，仲聽到我地索鼻水既聲音。
突然間，我醒起我袋入面，有一個我自製既書，個腦浮現一個想法。
我係袋拎出本書後說 : 『依本書....係我整，係記錄哂我同你既經歷，對話......同埋我既心底話，本書有一部份我無寫，個部份就係結局.......我諗依家唔洗再寫個結局。』
我轉身望一望，慢慢地行去垃圾桶。阿雪見我咁既反應，好明顯知我想掉左佢。
我掉左本書落垃圾桶後，阿雪即時推開我，然後係垃圾桶搵我本書。
我推開阿雪 :『你做咩野呀!』
『行開呀!!』阿雪又推開我，含住淚一直係垃圾桶到搵。終於比佢搵到。
『比返我......』我對阿雪說。
但阿雪將本書緊緊地攬住，唔肯比返我。
『點解.....點解你要Keep住本書? 』
阿雪無出聲，一直緊緊咁攬住本書。我無奈，我行返去海旁欄杆，望住個海。阿雪靜靜地，企係我格離。再一次沉默地望住海。
大概過一小時。
大家都已經冷靜落去，眼淚都流乾了。我望一望阿雪，佢攬得本書好緊....好緊，岩岩喊既樣好可愛，好似一個BB女，驚左人地搶佢玩具一樣，緊緊咁攬住係身邊，唔比其他人搶去。
『我知你唔會再理我。但我唔想無左你，我唔係要收兵，我只係唔想無左你依個好朋友。』阿雪終於講野。
『但你知唔知.......我好難再面對你。』
『我知呀......所以我就好驚會咁呀.....』
『對唔住.......』
過左一陣，望望時間，其實已經好夜，我地咩都無食，阿雪覺得好肚餓，但好可惜，我陪唔到佢去食野。
『依家點.......』阿雪問。
『我想......係到多一陣。』
『咁......我返屋企先。』
『我送你。』
『嗯。』
我地兩個一直都沉默住，一直慢慢行去火車站，一個鐘之前，我同阿雪係好開心咁拖住手行黎，一個鐘之後，我同阿雪竟然分開行，而且沉默住。我唔知道我以後點面對阿雪，我都好明白阿雪既擔心，佢好清楚我份人，佢好清楚.....我為左要忘記佢，一定唔會再理佢，而且.....一定唔會好似之前咁樣對佢。
『我送到依到。』到左火車站，我望住阿雪，佢成身都震緊，但我無問咩原因。
『你走先。』阿雪說。
『唔得，你走先。』
『我唔想你望我走呀!』阿雪突然激動起來，眼淚再一次流下。
『唔得，你要走先。』我唔知點解突然堅持住依樣野。
『我求下你...阿明...我真係唔想你望我走呀....求下你呀....好唔好呀......』
『阿雪.......我地真係無可能?』
『阿明呀.......』
『真係一D感覺都無咩?』
『.........』阿雪又搖頭。
我心死了，睇黎阿雪真係唔鐘意我，既然係咁，我都唔再逼佢。慢慢轉身走......慢慢走...慢慢走...一直頭也不回地走.....行到一半路，我仲期待好似電影情節咁，阿雪追上黎，但當我忍唔住轉身一望。
咩人都無。
我坐係路邊既椅子，呆呆地望住一對對情侶係我面前走過。
Sms提示響起:
阿雪:
其實我頭先最想講既係多謝，對唔住。我唔知點解連一句多謝都唔敢當面講....你應該唔會想覆我，唔好覆我喇
阿雪:
你係一個好好既男仔，我知你一定會對女朋友好好，但感覺既野好難講，如果只係因為你好而同你一齊，咁對你唔好...........
阿雪再一次提起個一句令我刻骨銘心既說話，我關上手提。慢慢放入褲袋。唔理旁人點樣睇我....
狠狠地哭了。
『先生! 可唔可以幫我地影張相呀?』
我抬頭一望，原來係一對情侶想幫我幫佢地影相，因為佢身後有一堆好靚既燈飾。
當個男仔睇到我雙眼通紅，仲隱若見到我岩岩流既眼淚痕跡，個樣有點驚訝。
我望一望佢身後既女仔，帶以微笑，似乎好期待我幫佢地影相咁。我就答應了。
『嗯。我幫你地影。』
『丫....唔該哂! 禁依個制就可以影!』個男仔教導我點用佢部數碼相機。說罷，就轉身行去佢女友到，攬埋一齊等影相。
當我望見數碼相機螢幕上既佢地，望到佢地身後既燈飾，我先醒覺原來今日係聖誕節。我掛住計劃表白，好似無視左今日係聖誕節，估唔到我聖誕節會落得如此下埸，表白失敗，仲要幫情侶影相。
『笑下....OK! 不如再黎多張!』 我用心幫佢地影相，既然我得唔到阿雪，都想其他情侶可以開開心心咁渡過聖誕節。
拜別左對情侶後，望住佢地背影不禁暗嘆了。我拎部Mp3出黎，不斷係咁搵D慘情既歌可以代表我依一刻既感受，最好有幾慘得幾慘，有幾傷心得咁傷心，好想好想試多次心碎既感覺，夜晚聖誕節街道上，聽住D慘情歌，不知不覺令我有種好正既感覺，我竟然不知不覺享受依一刻心碎既感覺......
返到屋企門口，不自覺留意阿靜會唔會出左街，定係留係屋企? 當日我仲叫佢揀阿風，唔知佢點諗呢?
阿雪無左，阿靜又.......唉
攤係床上，呆呆望住天花板，腦海不斷浮現出岩岩表白既情境，開始冷靜分析一下我失敗原因係邊?
但我答唔出，如果佢話有心上人或者有男朋友我都可以接受，但如果咩都無既時侯，點解唔可以試下大家開始下呢? 我係咪真係差到連一個機會都唔應該有? 我係咪真係咁差.......
*********************************************************************************