［為愛瘋狂］《自從同初戀分咗手之後我自甘墮落，不斷搵其他女人做愛》: 十四

「我做曬啦…」

「今日好乖喎，咁你快啲俾我檢查下？IS係你最差嘅一科啊，而且就離大考。啲功課做好啲會容易記好多㗎。」平日子愉就是這樣，要我逐份功課和她對答案，經她教導後今年成績至少提高百分之三十。

因為想自己未來男朋友好？

「哦...好。」

「你有煩惱？」子愉聽出我有異樣。



「冇嘢啊。」

「你呢個人最唔識就係講大話，擺到明有心事啦，聽你點樣講嘢就知道。」她在電話裏頭嘻嘻一笑，直接說我容易被看穿的事實。

任何事都瞞不過子愉。

「我想問妳做咩對我咁好。」

妳越對我好我就越覺得妳完美無瑕，配不起妳。
一個能力不比妳優秀的男人，要妳時刻兼顧，妳會接受嗎？總有一天會厭倦是吧...



我比較想問我有什麼值得妳喜歡

「對朋友好唔得咩？而且我驚你冇咗我唔得啊～」

「我就係唔想咁！我唔想咩事都要妳教我點做，好似湊仔咁啊！妳成日對我咁好想點！」

…我原意並不想這樣...
我想配得上子愉，不用再倚賴她幫助，所以急起上來...
太遲了...



「對唔住...我冇顧及你情緒...我去瞓覺先...」看來子愉被嚇怕，掛斷了電話。

搞砸了...

我陷入比剛才更混亂的思緒。
首先要向子愉說對不起。
嗯，要好好解釋清楚。

我在明天早上提早到便利店買一杯雲呢拿雪糕等待子愉，心想她友善的性格會很快消氣，不過這次情況有點不一樣。

子愉下樓見到我時，馬上調頭走。

「子愉！等埋我啊！」我決定開啟死纏爛打模式。



「唔聽唔聽唔聽！」她闔眼捂耳跑走。

「有雲呢拿雪糕食啊！再唔食就溶㗎啦！」我大叫道。

此話一出，她煞停了腳步，兩手不其然摸摸書包帶，低頭回首，走過來拿走我手上的雪糕，另一隻手放下幾個硬幣。

「冇拖冇欠，俾返錢你。」她說得冷淡。

「唔好咁啦，我琴晚心情唔好先亂講嘢咋。」我牢牢握住她纖細的手腕，不讓最佳道歉時機流走。

「放手啊！」她另一隻無力的右手想扯開我比她粗一倍的手，不過力有不逮，我順勢將她整個身子拉近，手臂在她腰間交叉相扣，形成似是緊箍咒的效果。只要子愉稍有掙脫的跡象我便會箍得更緊，這張可愛的臉蛋就越靠近。

以真摯的眼神表達歉意，大概會原諒我。

「唔俾妳走，我有嘢同妳講。」



「你一定又想鬧我啦...今次又做錯啲咩啊。」她用盡方法不想看見我，臉向左邊扁著嘴抗議。

「妳成日話我傻瓜傻仔，妳自己而家咪同我一樣傻。」

「想同我道歉仲話我傻，冇啲誠意，唔睬你。」

「對唔住啊，琴晚我接受得太多資訊，一時間個腦好亂，處理唔到。嗰啲資訊其實全部都同妳有關。」

我決定婉轉地講出部分感受，暫時把感情問題除外。

「琴日David仔同我講有個人為我做咗一啲嘢搞到我好感動，同時都諗咗好多嘢。」

「邱子愉，由第一日識妳開始妳就好為我諗，幫我逃過啲同學。我唔識做功課，妳從來冇發過我脾氣，無論我幾懶幾唔認真都會耐心教完。平時我有啲咩要戴又會提、溫咩書又會講、我鍾意食啲咩都會陪我食。相比之下，我好似冇為妳做過啲咩咁。我唔想我喺妳眼中係一個要成日提點，不思進取嘅人。」



「而家嘅鍾瀚文，係想成為一個喺邱子愉眼中可以放心，甚至乎欣賞嘅人。妳對我嚟講係一個好重要嘅人，我唔想妳成日擔心我。」

「我會進步、會改，好唔好？」

我們臉對臉看著，誰也不逃避。
其實子愉早已熱淚盈框，抿嘴而笑。
我是首次那麼親近女孩子的臉，很想吻下去。

「死仆街...嗚嗚嗚...」子愉才康復過來的笑容又突然大哭起來。

「嗚嗚嗚...成日都蝦我...嗚嗚嗚...」她因我受下的苦與委屈一次性釋放出來，伏在我肩上嚎啕大哭。

「以後唔蝦啦。」我輕撫她柔順的馬尾。

有笑有淚...



當下我很想說出我愛妳，不過好像未來以一個更浪漫的方式表白更為恰當。

子愉大哭過後仍未忘記我買給她的雲呢拿雪糕，打開盒蓋已是半溶化，剛剛我們相擁時身體的溫度貼著雪糕杯。

「抹咗啲眼淚先食啦。」子愉往日以一個女神氣質、補習老師的風格在我眼前。現在她哭鼻子，埋頭食雪糕的畫面活像一隻啃食蘿蔔的小白兔，惹人憐愛。

「好尷尬啊，我喊完都唔知講咩好。」

「唔知講咩好就返學啦！我哋就遲到啦！」