分手後，遇上你: 狠下心

為左令到佢唔會再傷心，唔會再唔開心，我選擇放棄，我選擇比佢揾個更好既，確定呢個決定之後，我就將同Jessica有關係既野，全部放曬係書包到，之後就去沖涼訓教，準備第二日番學面對Jessica。
一如既往，番學之前，係學校附近既賽西湖食番支煙，食到一半，Jessica又打黎，既然我願意狠下心，我就應該面對佢，我選擇接聽，「喂，咩事？」，可能見我肯聽電話，Jessica異常既激動「咁多日死左去邊丫你，做乜唔聽我電話丫，點解要避我丫你，講丫死人頭。」我吸一啖煙，呼番出黎，令自己冷靜落黎，「你今日如果會番學既話，就中午上天台揾我，記住要食左野先，我費時你一陣胃痛，如果冇食就唔好黎揾我，知唔知？」，最後一次既關心，Jessica聽完立即講「得，咁中午學校見，拜拜。」
我掛左線之後，食完最後一啖煙就起程番學校。中午既時候，一落堂我就上左學校既天台等Jessica，一點半既時候，Jessica出現係天台既門口，而且手拎住我最鐘意食既咖哩牛腩飯，平時我一定即刻搶黎食，不過今日我冇咁做到，我只係想好好地咁望多佢幾眼，因為今日之後，都唔知道仲會唔會有機會見到Jessica。