《我老婆唔係我女朋友》【那些年／日常／校園】 第一至三章: 【第三章】 陰晴不定的舞會前夕（１）
陰晴不定的舞會前夕
舞會前兩天，阿心打電話給我，聲音有點不安：「蘇菲啱啱搵我呀，話安排咗架私家車喺石硤尾直接車我哋班同學去會場呀。」
我尚未意識到有甚麼問題，隨口答道：「哦，噉咪各有各去囉。」
她有點忟憎：「唔係呀～你唔係要陪住我㗎咩？我唔要對住嗰啲唔知乜嘢人呀～噫呀～」小野蠻蠢蠢欲動。
我乘機落井下石：「噉人哋帶妳溝仔嘛，話唔定有筍盤呢。」
嘿嘿，驚死喇咩？
「噫～咁核突，呢啲嘢自己一手一腳去『搵』嘅先啱心水嘛，垂手可得嘅點會好呢，都唔珍貴啦，況且如果佢哋咁筍，都唔使去到先等人介紹啦。」我當時並無細味和體會她這番說話，只是覺得她用「搵」這個字眼有點奇怪，不過林心穎的刁鑽古怪都司空見慣了。
事實上我有跟「濕狗諸葛亮」討論過入場安排，既要保持低調（阿心要求），又要盡快匯合（我的要求），不能讓她落單，所以一早已經有了腹稿，遂滋油淡定的回答：「妳都有道理嘅，妳啲同學有無約partner去㗎，佢哋點安排呢？」
「好似都係約喺場入面等，但我唔想囉，一陣佢哋見我無partner又拉埋啲騎籬怪過嚟呀～哎～」她的聲音非常不安。
我有點不忍，說到底她也是想我湊她而已，於是將擬定的方案說出來：「嗱，我約妳喺酒店大堂等嘞好唔好呀？有梳化坐住等唔怕等得耐啦。」
「蘇菲係籌備單位，我好似要跟佢哋入咗場先喎…我試吓入咗去再出返來啦。」她似乎稍稍鬆了口氣。
嘿，果然是「蘇妃御妻隊」！