《我老婆唔係我女朋友》【那些年／日常／校園】 第一至三章: 【第三章】 May the Force be with you（４）
「你知嘛，信得過你先搵你陪我咋喎，呀唔係，係我陪你。我知你唔會害我嘛，你時時都緊張埋我嗰份，我阿爸不知幾安樂呀。」她笑靨如花的娓娓道來。「仲有呢，如果我自己一個人夜返，你實唔放心㗎，係咪？咁啱如果又有其他人送，你話畀唔畀佢送好嘞。」她說的不無道理，街上治安麻麻，確實讓她自己一個人回家我是不放心的，如果再有其他狗公黐埋身就更加不堪設想，我想到此處也就釋然了。
口頭上當然不會放過她了，我扁著嘴說：「唔使再落嘴頭嘞，我有乜嘢著數先？」其實我勁想摺埋屋企繼續煲FF4。
她沉吟了一秒，似有認真思考過：「嗯～嗱，畀你自己食晒一盒家庭裝雪糕喏，就噉用匙羹𢳂，攬住嚟食，雪糕我請好未？」
「妳都癡線嘅，妳個肥妹自己想食雪糕之嘛，聽講妳老竇開士多喎，雪糕要幾多有幾多啦。」
她伸一伸脷：「哎吔，俾你發現咗添，算嘞，聽日陪你巡視業務得喇啩。」
「算妳啦。」得些好意，攞個彩算了，反正就算唔講個衰妹都肯陪我去的。