《我老婆唔係我女朋友》【那些年／日常／校園】 第一至三章: 【第三章】 May the Force be with you（２）
順口試探她一句：「咁畀心機扮靚，今晚有男仔去㗎？」明知她是「師姑庵」出身的，舊同學都順理成章是女生吧。
「嗯？應該無嘅，都係約返以前玩開嗰幾個女仔啫。」突然她煞有介事的問我：「你今晚出街都應該起碼去到11點啦，呵？」
我莫名其妙：「乜嘢呀？我無端端點會去街呀，係妳約咗同學食飯咋喎。」我剛剛還在盤算，今晚回家安樂打機，起碼玩他三五七個鐘。
她的樣子似強忍笑意，仍一本正經的說：「嗱，你今晚都唔好玩太夜嘞，最多都係11點鐘左右好喇，我見咁夜你一個男仔都危險喎，我過嚟搵你一齊走吖，最多送埋你返屋企嘞。」
我腦袋仍未轉過來：「我都話唔出街喏，乜嘢你送我呀，九唔搭八。」我見她在偷笑，終於醒覺她又在整蠱做怪講反話。「妳個黐線妹，唔得呀，我無端端做乜出街喎。」
她見奸計不成又出軟功：「嗯～噉如果啲同學有人送，唯有睇吓人哋方唔方便囉，可能其他男仔大方啲嘅。」屯門風化案搞到滿城風雨，女生夜歸有人送回家是頗為平常的。
她頓了一頓再問我一遍：「欵，乜你今晚真～係唔出街咩？不如諗清楚啲啦。」
個衰妹漸漸地多了倚賴我，亦願意主動講出她想怎樣，於我來說是開心的，起碼唔使成日估來估去，而且倚賴我就即是要成日粘住我啦；但她同時亦摸清我的脾性，知道我緊張她，又看穿我對她無甚反抗能力，種種形勢令我覺得自己愈來愈似做「兵」。所以話「港產公主」其實都是風土病，全因為被男朋友…呀，仲未係…係被男同學縱壞晒。