《我老婆唔係我女朋友》【那些年／日常／校園】 第一至三章: 【第二章】 還是欠一步（３）
半晌後她拿了兩支維他奶回來，我們就在那小休憩處，對著墳場開餐了（荔枝園對面馬路是華人基督教墳場）。「阿吳賣嘢都算平喎，賺得好微，佢用電飯煲『坐』熱啲奶，唔太嘥電都係一個好方法。」士多太子女以業界人士身份評論。「我乘機瞄過士多隔離巷仔，又唔見『多妮』啫。」說時她搣了一塊雞蛋仔放入口。「嗯～我覺得都係南山邨嗰檔好食啲。」
我發現她有雞蛋仔吃時會很開心。
「欵，你試吓係唔係吖。」她將雞蛋仔遞給我。「係喎，九龍城你就話熟路啫，點解嚟到呢度你又好熟噉嘅？」
「咪都係嗰班朋友啫，以前我哋會去城寨嗰啲茶檔食嘢嘛，呢度【荔枝園】呢，就係嚟𥄫女嘅。」剛巧有兩個【衣車書苑】的粉紅學生妹由村內行出來。「就係呢間女校囉，佢哋有條秘道經【荔枝園】直接出嚟聯合道，坐呢度就實有嘢睇。」
所以我們以前絕對不是在墳場𥄫女，而是在「對面」；話說剛才在龍三，有得抄超任寫真集嗰位索女明星，都是【衣車書苑】的舊生，我們以前成日FF，會不會剛好碰到她返舊校呢。
「嘖，真無聊，成班金魚佬～」她笑著橫了我一眼。「喂，我問你吖，你中學時成日周圍玩，你估我哋以前有無見過呢？」
「我諗應該無嘞，妳個村姑樣我都無乜印象。」豈止是無印象呢，我中學時代跟女生說話的機會，5隻手指都數完啦。我有點奇怪：「點解噉問呢？妳有印象見過我咩？」
「呵～唔知呢，我都係問吓啫。」她久唔久都會有啲模稜兩可的回應。