《我老婆唔係我女朋友》【那些年／日常／校園】 第一至三章: 【第二章】 還是欠一步（１）
還是欠一步
拿著兩隻缽仔糕和雞蛋仔（魚蛋吃完了），我們離開了「後城寨熟食市集」，由賈炳達道轉回聯合道，繼續朝樂富前行，經過【衣車小學】後又是城寨的圍封區。
沙塵滾滾中，我跟阿心說：「嗱，前面【侯王古廟】啦，我哋再行前少少就有地方買嘢飲嘞。」
於是我們從【侯王古廟】過馬路，在【紋身書苑】運動場旁邊繼續前行，那時候【何家園】已經用鐵絲網圍起來了，裡面雜草叢生。
阿心問我：「欵，呢度入面乜嘢地方嚟㗎？」
「我知道呢度係【何家園】囉，詳細我都唔清楚呀，聽講以前入面係片場拍電影嘅，我知外圍呢幾間係整墓碑嘅，因為以前過嚟時都仲有開工㗎。呢，斜對面係墳場，啲墓碑就係供貨去嗰度。行前啲就【荔枝園】囉，我哋一陣喺嗰度門口坐吓。」我對這些歷史古跡自然不甚了了（那時候已經公佈了這裡是保育古跡），反而石廠跟墳場我就幾清楚，事關以前成日喺墳場對面𥄫女。咳，聽清楚——係對面，唔是喺墳場𥄫！
【何家園】的範圍已經荒廢和被圍封了相當一段時間，行人經過都不會留意，反而【荔枝園】當時仍有居民在生活，清拆時就引起熱烈的社會討論；今天【何家園】被改造成【石屋家園】，成為遊人週末摸住咖啡杯底，好chill地打卡的熱點，而【荔枝園】則被完全清拆，改建成為【兆基創意書院】了。