《我老婆唔係我女朋友》【那些年／日常／校園】 第一至三章: 【第二章】 龍珠，九龍城都有啦（６）
在龍三基本上我只會去兩間舗襯吓，樓梯口325的【K-One】，老細Ken哥（厚鏡中佬）由紅白機年代已經是我的啟蒙老師，條友自己有研發抄game轉game的技術，有時候一些冷門的遊戲或是過氣的機種，就只有佢獨市有得抄，雖然現在已經升級玩超任，但如果有玩開的紅白後續作品，都會照抄嚟開返舊機玩，所以我最記得上個月剛剛出的那隻紅白機龍珠game《七龍珠ZIII 烈戰人造人》（ドラゴンボールZIII 烈戦人造人間），真係搵勻全港九腦場，得佢獨家有抄，而佢出新game的速度又往往比其他場都快，不過今天沒有開舗。
另一間313【恆昌】就會去買影印攻略，老細兩公婆會細心地將遊戲雜誌刊登的攻略收集和剪輯好，再影印賣10蚊雞一份。
我沒有帶阿心一齊上來這層的原因，除了是這裡「女色罕至」外，還有就是呢啲舗頭係乜隱都有得抄的，有時也會貼出啲露骨的海報，PC-9801的經典H-Game《龍騎士》、《同級生》，超任的陳N倫、飯島愛寫真集等等，一來玩game她唔會有興趣（我講玩game佢無興趣，寫真我無問佢），二來如果無知少女問你乜嘢係H-Game，我都唔知點答（可能答佢happy game吧，如果佢再問有幾happy呢？），三來你唔會想你心儀嘅女生上嚟這層畀啲MK和厚鏡阿叔睇蝕晒的。
其實今天根本無特別東西要買，純粹因為阿心要來九龍城，所以才「順路」過來【龍珠】，所以在龍三兜了一圈無特別發現，就極速返樓下跟她匯合了。
「咦，咁啱嘅？等人呀。嘻嘻…」今次輪到我用這句開場白了，順利在租書店門口找回她。
「咁快嘅，無嘢睇咩？」她奇怪我這麼快回來找她。
「係呀，走喇。咦，你見唔見到鄭E健呀？」我梗係唔會爆響口，驚佢畀人睇蝕啦。
她橫我一眼，笑罵：「癡線仔～」