《我老婆唔係我女朋友》【那些年／日常／校園】 第一至三章: 【第一章】 無名分的浪漫（３）
「我要望清楚先喎。」
「你咪望飽佢囉。」她一翻白眼，擺出一副任君觀賞的模樣。
我泛起一種甜蜜的感覺，名正言順又裝模作樣的當面𥄫佢一輪：「嗯～下巴兜兜，似…吳Y漢！」我不假思索的說出來。
當年《吳耀漢攪攪震》剛播完，反應不錯，久唔久都有人討論。
她瞪大本來已頗大的眼睛，眼珠幾乎要跌出來：「𡃁仔，你係唔係玩嘢呀～」說到最後又忍不了笑，而我更一早笑到有腹肌了。
「噢，Sorry，搞錯了，再嚟再嚟，嗯～豬膽鼻幾福相嘅，似朱M咪喎。」她索性擰歪面，一副費事睬你的樣子。我怕玩出火，輪到我笠水了。一口氣將各美女藝人黎G、朱Y…最後我連譚Y瑛姐姐都出埋，但她都不理睬。「喂呀，畀啲貼士啦。」我哀求著。
她面帶笑意的擰回來，仍嘟著嘴扮嬲：「又好，要貼士呀～佢做電影嘅。」
「我都知道一定係靚女啦，畀多少少指示好嗎？」擦鞋話係靚女實無死嘅，點都唔會話自己似朱M咪啦，天才～
「嗯～好啦，台灣人嚟嘅。」
「啊，13姨關C琳？」當時剛好上《黃飛鴻》第二集，所以我隨口便說了出來。
「唔係呀～佢都唔係台灣人。」
「咦？台灣靚女，拍電影的，唔通係…」我福至心靈的突然想起一位拍完《倩女幽魂》系列和經典港產片《賭神》紅到發紫的女星。「王T賢！」
終於她甜笑的點頭：「算你啦。」
其實我心中不大同意的，誠然阿心的眼睛很大，但完全不是王小姐那種嫵媚的氣質，然而不認同還不認同，在缺乏反抗能力下，我只能附和：「嗯，妳眼大大都真係幾似喎。」此後，王T賢就成了我倆之間的magic word，有時候如果惹得她生氣，只要一用這大絕，多數都可以化險為夷。