《我老婆唔係我女朋友》【那些年／日常／校園】 第一至三章: 【第一章】 無名分的浪漫（１）
無名分的浪漫
出了酒店大門，外面仍然斷續的下著大雨，繼續慶幸袋中有遮，正準備取出來時，瞄見她一副悠然自在的模樣：「咦，妳無帶遮咩？」
「無呀，都話無諗過出街喏，頭先嚟時又係坐的士嘅，你有咪得囉。」阿心毫不擔心。
我心諗又會咁老定的…打好傘後一齊出發，大家都知縮骨遮可以有幾大把吖，一個肥毒加個纖瘦女生擠著共用，肯定其中有一個人半邊身會曝露在遮外淋濕，此情此景濕身的當然是我了。
「哎呀，行埋啲啦，你濕晒喇。不如你將把遮放大家中間啦。」她體貼的嚷著。
我轉用靠近她的手擔遮，將遮撐在大家中間，她竟然自動波的翹著我手臂，搞到我有點受寵若驚。我怕她被人看到說閒話，帶著疑惑的眼神望向她，她反而大方的笑道：「落雨嘛，唔怕啦，頭先你拖我咁耐，宜家咪拖返你當補數囉。」
妳唔怕時我更加唔怕了，相視一笑，盡在不言中。這個雨天，兩個人依偎著同行，兩顆心亦愈靠愈近。
上了地鐵（大庭廣眾，無藉口再拖住了），我半邊身濕透，直可以滴出水來，不禁抱怨下雨天的不便。阿心反而開解我：「你知道嘛，落雨有分春雨同秋雨喎，而家11月落嘅叫秋雨，落秋雨係為咗令泥土變得鬆軟，噉先可以播種，有利耕種㗎。」
我搔搔頭：「而家都無乜人耕田啦。」
「此言差矣…嘻…」又用某人的口頭蟬，只是話未說完她已經笑了出來。「嗯～其實都可以將耕種譬喻成人與人之間嘅關係㗎，要不停灌溉滋潤先會成長噉囉。」她看著我眨眨眼續說：「如果唔係因為落大雨，我哋都唔會咁多嘢傾啦，係咪？」