《我老婆唔係我女朋友》【那些年／日常／校園】 第一至三章: 【第一章】 K歌奇緣（５）
既然連阿心都被擄成為人質，我就正式變成被勒索的苦主，亦無力再反對這個活動了，正當他們有初步共識要打的還是坐地鐵時，我赫然才想起今天要等Leon（A1班）落堂，要還CD給他。馬上截斷馬飛他們的討論：「喂，sorry呀，我唔可以同你哋一齊去呀。」
馬飛一干人等即時起哄。「喂！你唔係玩嘢下嘛？搵齊人仲有人陪你嘞，又話唔去？」馬飛非常緊張的樣子，連阿心都有點驚訝我突然話唔去。
我好整以暇，學足馬飛的口吻慢慢的說：「此言差矣，唔係唔去，係遲啲去，我要等一等A1班交收啲嘢啫。」
馬飛歸心似箭，沒有耐性再說：「得喇得喇，總之你嚟就得啦，我哋行先喇。嗱，你一陣自己去Red Box喎，灣仔世紀酒店呀。」
我趁著他們行動時，走到阿心旁邊輕聲說：「妳跟佢哋過去先啦，我遲少少嚟吖。」
她橫我一眼：「畀你嚇嚫，唔好咁遲呀。」看著她跟大隊走了，不知為何，感覺好像向她交帶兩句安心一點，可能…或者…有機會…是因為她是來陪我吧。
跟Leon交收完CD，極速坐地鐵去世紀酒店，途中一直在想阿心說的「畀你嚇嚫」，究竟嚇嚫啲咩嘢呢？會唔會係怕我唔去？我知我知…又是肥毒的FF嘛…無可能吖嘛。
步出灣仔站差不多6點，竟然下起傾盆大雨，暗暗慶幸老媽堅持要我帶遮，撐著縮骨遮，找到世紀酒店，還好沿途都有瓦遮頭，未有嚴重濕身。落地庫Red Box問一問，自己摸入去他們那一間房，還未開門就已經聽到班「歌手」在鬼叫。
唉～天呀～點解要受埋呢啲苦呢？
入到K房，除了馬飛跟我打聲招呼，表現出因為「終於交足優惠人數」，而放下心頭大石的樣子外，其他人都忙於演唱、搶咪、揀歌等，當年K房的設備比較單調，無骰盅大話骰之類，好寡真是齋唱為主。馬飛撳鐘仔叫侍應入來點人數，順便幫我叫飲品：「喂～飲乜嘢呀，包一杯飲品嘅，酒都得喎。」
「橙汁吧。」費事一陣酒馟，返屋企老媽又問長問短。