《我老婆唔係我女朋友》【那些年／日常／校園】 第一至三章: 【第一章】 K歌奇緣（２）
「喂，放學有無地方去先，無？去唱K啦。」下午放break時，馬飛又吹雞放學唱K，他今天似乎比平日特別出力，主動四出綁架人質，唔知真係以為個K場佢有股份。
「嗱～你放學無埞去㗎啦？唱K好唔好先？」食咗幾碗西面閉門羹，條粉皮終於走來問我了。
「唔好！」我沒好氣的跟他說，乘機潤一潤佢。「除非你叫埋黎G去啦，我出錢請埋你又～～如～～何？」
「喂呀，唔好噉啦，今日book到加州紅呀，仲有6送1包飲品，最多我幫你畀埋啦，6送1除開都平過平時㗎。嗱，阿May都係你同學啦，今日佢大壽你都要畀面去吓啩。」馬飛使出混身解數，猛落嘴頭。
哦，你鹵味原來唔夠人～
「唉，你都係放過我罷啦，我又唔唱，你捉我去齋坐替死咩，不如你問吓其他人好過啦。」話晒而家retake都仍要靠馬飛關照，我都唔敢太過決絕。
「霋時間點叫GIGI出嚟啫，人哋明星嚟㗎嘛，不如將就啲，叫其他同學陪你一齊去好唔好？」條友精甩辮，見我並未真正反枱，眼珠一轉，加碼繼續死𦧲。
連GIGI都叫得出口扮熟，人無恥真係無敵嘅。「睇吓點先啦，最好你搵到其他人去，唱K我真係唔啱哩。」我只好隨口敷衍。
「得啦，一陣實有人陪你，包喺我身上。」馬飛一副胸有成竹而又陰陰濕濕的表情，又唔知諗到乜嘢計，邊說邊行出班房繼續擄人勒索。