《我老婆唔係我女朋友》【那些年／日常／校園】 第一至三章: 【第一章】 是好感，還是好奇？（２）
車頭方向束馬尾的女生聞聲轉過頭來，自然就是昨天我「跟蹤」的心姐了。我知機的快步向她行過去，一邊揚手示好，一邊賣口乖：「心姐，妳好。」
阿心是個體型纖瘦的女生，身高大約169—170左右，驟眼看來她高度跟我差不多，有時我稍一「寒背」，她就顯得比我高了。輕淡娥眉配上一雙眼眸澄澈的大眼睛，無戴眼鏡和耳環的，白皙瓜子臉形，臉頰泛著微紅，看來有暗瘡的問題，小嘴螢潤似乎有搽點潤唇膏，招牌的中馬尾八字瀏海添加了幾分嬌俏，臉蛋輪廓標誌可人，出落得秀雅脫俗，就算不施脂粉仍給人一種乾淨清新的感覺，不過美中不足的是她的長髮微黃有點乾旱。
她秀眉一蹙輕輕說：「叫阿心啦，唔好叫到咁老。你係阿仁？佢哋話你retake，所以比較緊張喎。」
都未開始講說話，就已經被人一槍爆頭，我幾乎想搵窿捐，只好硬著頭皮囁嚅：「…誒…一時失手嘛，係呀，所以要謹慎啲囉。」既問非所答，又九唔搭八。
「噉呢科真係好難咩？你搞到我都有啲點擔心喎。」阿心一臉憂心忡忡。
幸好她似乎不是為了挖苦而揭我瘡疤的，避過了傷口再次受鹽醃的危機後，我半癱的腦袋回復了少許運算機能：「妳梗唔怕啦，妳哋咁畀心機上堂，又聰明伶俐，點似我呢啲廢柴，放心啦。」乘機拍拍馬屁。