《我老婆唔係我女朋友》【那些年／日常／校園】 第一至三章: 序章 廿五年後
序章 廿五年後
中年男子饒有趣味的聽著少婦在訴說著自己的近況，沒有丁點兒的不耐煩。畢竟有十多年未見了，一邊聽她咭咭呱呱的講述兒子、老公、工人等日常瑣碎無聊事，一邊細心留意她的變化，嗯…眼睛沒有以前那麼圓和大了，眼角開始有魚尾紋，大概是因為工作吧，薄施脂粉，編了個露出髮根美人尖的公主頭，點綴著一絲半條的白髮，身材依然纖瘦，只是面頰有點飽滿，大概是所謂的「幸福肥」吧。
想起她以前又是有如小吱喳般的說話神態，中佬不其然發出會心微笑，突然她發現了他在細心端詳自己，又有點不懷好意的陰陰嘴在笑，少婦不禁大發嬌嗔：「你笑乜嘢喎，我知自己肥咗，唔使噉嘅！」
突然被踢爆自己在「欣賞」她，只好帶點狼狽的扮無事：「無笑你喎～見你無穿無爛，戥你開心啫。」迫不得已從美好的回憶中跌回現實。
中佬急急將話題帶開，橫豎講開以前，不如加碼來個集體回憶好了。「我send個post畀妳睇吓吖，有個人好似我哋以前噉，不過人哋比我進取啲，外賣埋珍珠奶茶，我就齋兩手揈揈摸上妳屋企。」
少婦在手機上碌了一陣，唉了口氣：「嘩，好彩我阿爸嗰陣無報警話你白撞咋。」
「哈哈，妳唔捨得嘅…」突然醒起這樣講好像有點不妥，始終大家已經不是年輕時的那種關係了。「咳…係呢，兩老幾好嘛？我都好耐無探佢哋嚕。」急忙將那尷尬淡化，希望她沒有察覺吧。
「哦，佢哋都OK呀，咪又係啲老人病囉，年紀大都無辦法啦。」少婦隨口答道，看似沒有留意剛才中佬的失言。
今天是2019年12月31日大除夕，剛巧大家的公司也有放早，所以有空可以約埋吃下午茶，這麼長時間沒有見面，反而是女的第一時間向男的「抄牌」：「我搵過晒都搵唔到你嘅FB、IG，你無開嘅咩？」
男的耐心解釋：「無用真名同大頭相啫，身處黃藍之世，減少數碼足印都安全啲呀，點知幾時有秋後算帳呢？嗱，用呢個名搵啦，呢個嘜頭先係我，另外我有幾個account用嚟招呼同事嘅，咪加錯呀。」女的咕噥道：「咁鬼麻煩！」加了大家FB後，碌了幾下，又再開始講東講西了。
今次輪到中佬反擊了：「點解咁耐唔聯絡吓呀？」
那知道少婦好整以暇：「你都知我人被動啦，其他同學我都無搵呀，喂，仲好講，你轉咗電話又唔出聲，唔知乜水wtsapp我，我差啲以為有人玩電話呀！」
冷不防被反將一軍，中佬連忙說：「噉而家咪我搵你囉，我wtsapp又叫得出妳名，都唔會白撞啦。」
「做乜無端端記起我呀？對上一次唔記得喺街定地鐵撞到，都成十年囉喎。」少婦的表情有點擔心，在懷疑這個老朋友是不是有甚麼毛病不久於人世。
這個尖銳的問題，讓中佬窘態畢露。
「其實時時都想搵妳㗎，但係無事無幹突然搵人，九成係賣保險呀，做傳銷啦，你最開始時都問我係邊個啦，幾𤓓呀。」中佬尷尬的回應著，卻仍然無膽量說出真正的原因，連自己也察覺有點言不由衷，頓了一頓後又再補充：「其實近來市面咁亂，又聽講北方開始有傳染病，早幾日經過大坑西，見到妳以前坐返屋企架巴士，想起好耐無見喏，趁聖誕咪試下聯絡囉，好彩你電話無改咋。」
「噉而家咪出來見面囉。不過就算你賣保險，放心啦，我都唔會幫你買喎，嘻。」少婦得知他不是健康有問題，欣然露出一個俏皮的笑容。
這個魂牽夢縈的笑容，讓中佬看得呆了…年青時每天都看見的。
餐廳所在的商場正在宣傳電影，是那齣搭了十年棚的美國超級英雄片，中庭電影宣傳的聲效驚醒了中佬，唉～都是唔好想太多…於是將話題轉到睇戲。「咦，有無睇End Game呀？」
不幸的是電影中的一句對白又是狠狠的刺痛著中佬，點解我發夢時仍然會夢見她呢？
「When I drift off, I will dream about you.」
「有呀，陪阿仔去睇囉，不過睇完都唔太明，尤其是時間旅行嗰度囉。」少婦皺起眉有點苦惱。唔明都合理嘅，少女時她就對潮流娛樂都不太熱衷，以前自己還時常笑她「鄉下婆」。但這個「鄉下婆」呢，對甚麼事情都不熱衷，卻將整副心思都放在自己身上。
耳中響起熟悉的流行曲，想是餐廳為營造氣氛而播放吧，細心一聽，是張學友的《每天愛你多一些》呢，中佬在想，那些年我們坐地鐵時，也是跟她一人一半耳筒，一起聽這首歌的，今天又一起再聽，真有彷如隔世的感覺。
然而中佬心中實在竊喜不已，一來眼前伊人無穿無爛，而且看來幸福美滿，見面後似乎無因時間而令彼此間生疏了，暗自慶幸自己當初的決定正確，真心喜歡一個人，想讓她得到幸福，應該要令她活得比自己好，選擇比自己優勝的人。
比起當前生活環境的急遽改變，「夢」從來都是不切實際的妄想。每天營營役役，中佬眼下的夢，就只餘偶爾跟她聚首閒話家常，單方面回憶昔日的那份甜了。
原本刻意想抽離這段昔日的思緒，卻一次又一次的被觸動著，不能自制的再次跌入舊記憶中，如果可以重新選一次，中佬會不會作出相同的決定呢？她呢？
如果真有如果…
序章 完