屍殺某街50號: 屍殺某街50號 (十六) #攔桿
好，第6個轉角喇，仲差兩個就到地下喇，逃出生天喇，可以去搵間消防局BBQ喇。
一路諗一路好自然咁加速，如果個故事喺呢度Ending你話幾好呢。
但跟住發生嘅事，繼續嚇到我標屎。
我喺最後一個轉角，用黎摸實條鐵攔桿探路嘅左手，摸到了迎面而黎嘅一隻右手。
我仆你個街，你哋有冇玩過過山車呀，試下幻想下，當過山車去到個圈圈嘅最頂部，而你又倒釣緊嗰陣，成架過山車飛脫落黎。
嗰一秒，我諗我嘅心情都係差唔多。
點解我個腦 Run 得咁快，Run慢啲，可能唔識即刻驚。
但嗰一刻，我的確係一閃之間，就排除咗前面嗰個係Jason嘅可能性，Jason而家應該喺前梯受緊靶。
前面呢個好明顯係第四者，隻手好粗，更加唔會係Vanessa，是敵非友。
所以話平時唔好人嚇人，一個人充滿恐懼嘅人，佢嘅力量係可以好大嘅。
我襯對方未比得切反應，大大力一腳伸落去，望都唔望轉身就跑。
亦好彩即跑，因為上返一小段路，後面被我踢嗰件嘢即刻怪叫住追上黎...
我而家識分喇，就咁聽叫聲，件嘢好明顯係人，不過我一樣要跑，肥男人班人一樣鬥唔過。
你老味呀，落4層又要上返唔知幾多層，上上落落偏偏就永遠都去唔到地下門口。
我個腦除咗跑，就一片空白，隻腳勁痛，而且呼吸都有啲困難，第幾層，唔知，唔想知。
算喇，隻抽喇，抽輸就掛我上鐵勾喇。
但就喺哩個時候，比我見到上面嗰層竟然開始有光，重要唔係燈光，而係日光。
續(十七)