地下鐵的約會: 終點站
終點站
「心太軟、楊枝甘露」侍應放下甜品
「哇...你又知我鍾意食心太軟嘅？」玥婷問
「其實...我睇過晒你啲IG posts，發現有好多心太軟...」我越說越低頭
「係唔係好變態...」我問
「都唔係啊...好窩心喎」玥婷樂滋滋地說
「係呢...妳有無鍾意嘅人啊」我試探地問
「有㗎」我心一沉
「佢係點㗎？」我強忍著撕裂的心問
「佢好細心，雖然唔靚仔，浪漫又唔夠，但係勝在同我有共鳴」她一邊吃著她的心太軟說
「欸，你做乜唔食啊？」玥婷叫醒正在沉思的我
「哦哦...宜家食」我連忙吃著
心房的碎片一塊一塊地劃過那些回憶，傷疤的現形令人總提不起勁。
吃完後，氣氛總是尷尷尬尬，打不開話匣子。
「不如...行返去？」我問
「好啊...」
雖已入夜，海濱長廊仍有不少人跑步、放狗。這好像不適合表白；不，是送死呢...
「我有啲嘢想同你講」
「我有啲嘢想同妳講」
「妳講先啦...」
「唔好...都係你講先」
「呃...其實我地都唔係識左好耐，幾日入面我好多謝妳咁信任我，唔當我變態。我又唔靚仔，又唔係高，妳肯同我傾計已經係我緣分，同時我地又有相同嘅品味，妳仲要同我睇戲，係我第一次同異性睇戲。我真係好緊張，每一刻每一秒我都緊張緊究竟自己襯唔襯你，諗緊點樣可以再細心啲。今日聽到妳有心上人，我好開心，同時好傷心，好似好矛盾？因為妳有妳嘅愛人，但係我嘅暗戀故事都到此為止...」
我接著說，不讓玥婷有辯駁和質問的機會。
「不過...不過我都係想同妳講，就算你拒絕都好，就當圓我一個遺憾。梁玥婷，我鍾意妳。」一口氣說出心底話，眼都紅了，感覺舒暢。
「好啦，我講完喇」我強忍著淚水，看著星星閃爍的夜空說
周遭的人依舊進行著他們的活動，剩下一男一女對著對方，默默地等待愛神的審判。
「你知唔知鍾意一個人有咩感覺？」
「以前，我會覺得鍾意一個人，就係即使佢唔知道你鍾意佢，你都肯默默付出，睇到佢得到心上人，你係應該要開心、默默離場」
「但係，宜家我會覺得，點解我地唔可以行多一步呢？唔通真係等到離場先遺憾？」
「你鐘意佢就更加應該令佢知道你嘅心意啦，佢係你心上人喎」
「就算結果不如所料，都叫做無憾，留返個羞澀嘅回憶都好吖，更何況...」欲言又止
「我都鐘意你，李 浩 然！」
我先是怔了一怔，然後問：「你點知我姓咩㗎？」
------------------分隔線--------------------
他先是怔了一怔，然後問：「妳點知我姓咩㗎？」
他，就是不懂浪漫，沒有180的——我的男朋友。
「你可唔可以浪漫啲啊...」我倒抽一口涼氣
「sor...sorry啊，我真係唔太識」看見他傻裡傻氣的樣子，我禁不住笑了出來
我的笑容，從沒那麼燦爛過。
「咁我寧願你唔識浪漫喇」我倆開始慢步踏上歸途
「吓...即係點」浩然真的很傻，我也很傻。
「仲即係點？宜家我係你女朋友啊，使唔使講到咁直白啊」我搖頭嘆息
「真係嘅？」看到浩然發自內心的笑容，那口氣也消失得無影無蹤。
也許，這就是愛情的魔力。看見自己愛的人幸福快樂何嘗不是一件樂事？
歸途裡，我們倆的距離由兩個肩膀的距離變到肩並肩，甚至可以倚偎在他身上，使人小鹿亂撞；兩隻小手時而碰上，卻總是突破不了心裡的關卡，飛快地收回。
突然...
「浪漫...係唔係咁㗎？」浩然一邊問，一邊僵硬地拖起我的手說
「噗...傻仔，拖到好似結婚老豆拖住我入教堂咁多手汗。做咩咁緊張啫，唔想放咩？」這種「驚喜」的浪漫，也未嘗不可。
畢竟，我們都是第一次經歷愛情的人。
「如果可以，我想拖到結婚」
「傻仔，我地DSE都未考，大學都未讀，講咁遠？」
「咁18歲就即刻註冊咯」
「邊個話要同你結婚喎，可能中學未畢業就分左手呢～」我雖然故作姿態，其實心裡卻甜滋滋的
「妳走唔到㗎喇，哈哈哈哈」
發了個好夢，星期五過後，懶洋洋的一日假日又開始了。我和浩然踏上了熟悉不過的地鐵，來了一次真正的約會，男女朋友名義的約會。脫去尷尬的身分，這次可以更率直更自然地走著。這次再也不怕扶不穩扶手了，因為我有人肉扶手牽著我。
「喂，記唔記得我地最初定立嘅規矩啊？」我問浩然
「呃...記得，坐地鐵聽歌一齊聽吖嘛，快樂雙倍」他說
「醒目喎～」
「但係...拍拖就梗係唔聽啦，聽我唱俾妳聽咪得咯」浩然自豪地說
「你夠膽你咪唱...」我們打情罵俏著，對比上次的壁咚，即使也是地鐵，這次卻不再覺得尷尬，反而窩心。
「下一站奧運，Next stop Olympic」 煩人的廣播也變得動聽起來，愛情的魔力哈哈哈。
「唔記得落車添，大件事」浩然突然驚呼
「哈哈哈哈哈，傻仔今日星期六啊，啱啱讚完你就出事」
「唔記得咋嘛，咁..都可以照去奧海城陪我靚靚女朋友行街啫。行啦」 浩然一手牽著我下車去，拖到進入商場仍不捨得放手
「拖左咁耐，肯放手未啊變態？蝕晒俾你啦」我打趣地說
「我驚一放手你就會走」
「走，梗係即刻走，嫌棄你添啦直頭」
「咁我唯有繼續拖啦，拖實左，未來每一分每一秒都唔會放㗎喇」
小情侶相視一笑，即使面對未來的未知，明眸裡仍沒有半點猶豫。
《地下鐵的約會》全文完