當問題少年遇上問題少女: 20.開始合拍

球場內，我繼續自己拉筋。自從上次被強迫拉筋之後，我D筋真係鬆左，唯獨係大脾內側果條筋比較緊，果到又唔可以叫班女仔幫我拉，所以我就自己默默係到拉鬆佢
 
正當我拉得好舒服果時，係我面前出現左一對白滑美腿，我抬頭一望，係Polly
 
佢見到我係到拉筋，就非常好心咁幫一幫我
 
而佢所謂幫我就只係一個屁股坐上我背後，用體重幫我將個身再壓低d，務求盡快拉鬆條筋
 
佢亦都係到關心我同Jessie練波情況
 




「今日你地兩個唔好再針鋒相對啦」
 
「咁係佢上次爭波打」
 
「一係咁丫，練完波你約佢食下飯，瞭解下對方先啦」
 
「同佢單獨食飯?不了，最多請佢食下小食」
 
「其實佢好易相處架，咪咁睇佢啦，你主動D啦」
 




“啪啪啪!!!”「開始練習!!!」
 
首先我地又係以拉筋為熱身，當我拉緊果時，望一望距離我不遠嘅Jessie
 
咩話……佢落到一字馬熱身?
 
Jessie發現我望緊佢，佢就用一個眼神串我，”你又落一字馬丫”
 
咁串丫啦!!!我就落俾妳睇!!!我落…我落….我落……唔到
 




我落唔到之餘，仲上唔返去，結果又引黎成班女仔恥笑
 
忽然，Jessie拉一拉我起身
 
「唔…唔該妳」
 
佢冇出聲就轉身行去球場，佢隻手…好細好滑
 
佢依舊拎起塊公家拍，企係我隔離
 
我地之前已經傾好左佢前我後，所以佢一發球之後，我就立即退後去中後場
 
果然不出我所料，上次Michelle同Jeanie食過翻尋味，又再一次用返上次嘅節奏同招數黎打
 
小妹妹，每一場比賽都係獨立，一定有唔同架




 
所以唔需要我留手，Jessie佢已經好快咁係前場用快打方式去迫散打亂佢地嘅節奏
 
偶然間俾佢地回到個波去我地後場，我就會一下殺波殺返過去
 
因為上次練波大敗關係，今次唔可以留情面
 
我殺出一球好快嘅落地波過對面，in
 
Jessie睇完呢球，好少可咁過黎同我講野「你真係唔俾機會佢地反擊?」
 
「妳想?」
 
「可以練習下快速反擊，下球你殺俾佢地回波」
 




「冇問題」
 
既然我個拍檔咁講，總要聽下佢意見，於是第二球殺波，我留左少少力，等Michelle可以殺返過黎俾我
 
就係Michelle殺波，個波飛過我地場區果一刻，Jessie塊拍就到左，佢好快將個波擋返過對面場
 
同時Jeanie亦到係啱嘅時間、企左係啱嘅位置。Jessie檔果球波飛到Jeanie塊拍上，Jeanie將佢彈返過黎
 
然後Jessie再好快一個叉燒，又一分
 
「幾好丫」
 
「下球…到你係後場同 Michelle試長殺?」
 
「冇問題」




 
Jessie一發球，Jeanie就回左過黎，Jessie又大力回去俾Michelle
 
佢見機不可失，立即係後場黎一球扣殺
 
個波直飛過黎，我踏順步，一下扣殺返過去
 
Michelle見狀比較開心，佢亦同我係到扣殺兩三球後
 
Jessie望一望我，我都知知想點
 
當我回左個波過去後，我行前，佢回後
 
Jessie一下扣殺過對面場
 




個波係中間落，in
 
係場邊嘅其他人都呆左，只係兩日，我同Jessie可以變得咁夾
 
其實我同佢暫時唔係叫夾，只係大家用技術補救，同埋對手唔太強
 
真正出去比賽嘅話，好大機會幾場就執包服
 
練習完畢時，比數係21-11