當問題少年遇上問題少女: 9.退下來的原因

練習完後，我再一次同面前呢對夫婦坐埋一齊
 
「子傑，你覺得Jessie實力如何?」
 
「深不可測」我飲一飲奶茶後答
 
「不過佢脾氣真係好古怪」
 
「Jessie?係呀，佢真係好孤癖，完全唔鍾意同人講野」
 




「佢連上堂都係咁?」
 
「冇錯，就連佢個姓氏都好少人用」
 
「佢姓咩?」
 
「佢姓佟，佢叫佟梓晴」
 
文浩聽到之後R哂頭「通常係識『童』，用『佟』的話真係好少」
 




「係架，所以好多同學都對佢好有興趣」
 
「子傑你下次會唔會同佢交流交流下呀?」
 
「有機會先啦，不過今日你好失威喎，俾Jessie帶住黎打」
 
「其實第一下睇佢開波，我都知道佢實力係我之上」
 
「要打退堂鼓嘛?」
 




「唔打!!!正如我祖先袁崇煥名言『屌那媽!頂硬上!』咁樣」
 
「嗯?文浩你係袁崇煥後人咩?」
 
「係呀，我地同一條村架」
 
文浩一直以自己係抗清名將袁崇煥後人為榮，佢嘅『屌那媽!頂硬上!』更係文浩名言之一，佢祖先嘅金句亦都令佢俾學校罰企左好多次
 
如果…佢知道我家族嘅底細….佢會唔會滅左我架
 
係考完試嘅日子，基本上每隔一日就要去真光到練習，而唔需要練習嘅日子，我就會係屋企溫書同出去跑步加操
 
如果唔夠體能嘅話，落場打比賽基本上同輸左冇分別
 
今日我地又返到真光練習，我一早就返到去球場等練習




 
果然係女校，我真係最早一個人到達，於是我就拎起塊拍同D波，自己係到練習發球
 
如果發球發得好，足以左右成場比賽
 
我不停係到發球，務求每一球都發去同一點
 
我發完一筒波，自己執好，再發
 
然後到我發完第五筒果時，我身後出現一把聲
 
「同學，你真係同傳聞一樣，非常努力練習」
 
我轉身望一望，係真光教練Miss Poon
 




「潘教練早晨」禮貌上，我都要打聲招呼，如果係我地自己教練的話，我會大聲叫佢『死紫菜』
 
「你每一球發球落點都非常準，我d學生都對你有讚冇彈」
 
「教練妳太過獎啦，我發球仍然一般，而且我仲有好多野唔識」
 
「例如?」
 
「就…就好似….」我口窒室咁樣，唔知講咩好
 
「例如你係球場上嘅心理質素，你唔太擅長打逆境波，亦唔擅長打稍微領先嘅波。你係屬於果種，一發球就要不停猛攻對手果款。要係最短時間內，將自己同對手距離拉開」
 
我望住教練，心中諗緊點解佢可以咁清楚我嘅事
 
「係彭Sir同我講，去到舊年為止，你都係學校A隊球員，亦為學校立過唔少功勞」




 
「冇錯，可能我真係不知天高地厚…」
 
「每個單打嘅羽毛球手都會遇上呢種情況，我試過」
 
「所以我就想退落黎」
 
「你知唔知點解學校要迫你黎雙打?仲要係混雙」
 
我檸一檸頭
 
「因為我同彭sir都覺得，你同我地學校嘅問題少女會好夾，你兩個好有機會打到入八強」
 
「八強就夠?」
 




「一個問題少年同問題少女所組成嘅組合，入到八強都好好」
 
潘教練企起身望住我
 
「你會唔會出賽?」
 
「我…暫時都未必會」
 
潘教練笑一笑「同我預期嘅一樣，不過你仲有成個暑假去決定。考慮下」
 
「我會」