［純愛短篇番外］以朋友之名嘅愛情，我地各自嘅單相思: 19. 各自的「單相思」〈完〉
張子萊都唔知道李穎容係講真定講假，因為李穎容係一臉認真咁講，但卻係用講笑嘅語氣
「我都唔差呀，你話嘅！」李穎容講道，「我又識做家務、又識煮飯、又會執屋⋯而且阿姨同叔叔都冇唔中意我呀～我同你又識咗咁耐，又夾，年紀直接同年添！」
「嗯嗯⋯30歲都單身嘅話⋯」張子萊無奈地拎起杯mocha，抬眼望向李穎容，「但我地宜家仲喺26歲⋯仲有4年⋯你確定，你真係會冇人追⋯？」
張子萊一直收喺心底打算今日講出嚟嘅說話已經到喉嚨邊，張子萊不禁吞一啖口水，因為喺呢個氣氛下表白，總有啲唔知點算嘅感覺
李穎容呢一刻卻冇回答，默默地耷低頭食嘢⋯張子萊望向窗外
「明明就有人一直追緊你⋯」張子萊喺心裏無奈地講道，「只係你唔覺咋嘛⋯」
兩人食完嘢就走，喺行出cafe，去巴士站嘅路上時，張子萊決定唔等李穎容嘅回答，想直接就開口對李穎容講出自己中意佢
「李穎容，其實—」「可能有人追，又或者唔會有人追，但，我一個都唔會接受⋯！」
喺張子萊開口想話比李穎容知自己中意佢嘅一刻，李穎容瞬間開口將張子萊嘅說話打斷
「但可能，你會喺呢4年內有機會拍拖，所以我、我今次一定要自私一次⋯！」李穎容突然間停低，一臉認真地望住張子萊，完全唔打算比空位張子萊再次開口講嘢一樣，心臟跳得好快，李穎容輕輕地握緊拳，「你跟我去一個地方呀！」
李穎容直接拉起張子萊嘅手，拉住張子萊行起嚟
「喂、喂！你帶我去邊呀！」張子萊一頭霧水地跟住李穎容行咗一大段路
李穎容就好似完全冇打算停落嚟回頭聽一下張子萊想講嘅嘢一樣，一直拉住張子萊向前行
「你到底要帶我去邊呀？」張子萊疑惑地問道，「李穎容⋯！」
李穎容一直向前行，好似好清楚知道自己要去邊度一樣，但佢完全唔望張子萊
「你帶我嚟呢度做咩？」張子萊不解地望一望周圍，「你想坐摩天輪嘅話咪講囉～」
「唔係啦！」李穎容拉住張子萊向前行，行到去一個門前有兩枝旗懸掛住嘅大樓前，「係呢度啦！」
「有咩分別⋯？」張子萊不解地問道
「你知唔知呢度係邊度啦？」李穎容眼見張子萊仲唔明白便開始著急起嚟
「知，大會堂嘛～」張子萊見到李穎容著急嘅模樣時不禁一笑，「香港大會堂。」
「咁你仲唔明呀？」李穎容捉住張子萊嘅手腕
李穎容之所以帶張子萊嚟香港大會堂，係因為呢度有婚姻註冊處
張子萊唔敢肯定自己嘅猜測，只好疑惑地望住李穎容，李穎容心裏更著急
「我啱啱喺cafe講咗咁多嘢，你都唔明呀？」李穎容問道，然後又著急地講道，「我又識做家務、又識煮飯、又會執屋⋯你爸媽都冇唔中意我，我同你又識咗咁耐，又夾，年紀何止差唔多呀，我地直接同年呀！」
「李穎容，其實—」「我係想話你知我係一個合適嘅結婚人選啦！」
張子萊正想開口打斷著急嘅李穎容時，李穎容輕皺起眉頭，一下子開口又打斷咗張子萊講嘅嘢
「咁你同我講有咩用？」張子萊都唔知佢要比咩反應，呢一刻嘅張子萊嘅大腦運算未load到李穎容講呢番說話嘅意思
「我唔同你講同邊個講呀！你唔係想結婚咩！」李穎容激動得喺原地輕輕跺腳，「我講到咁樣，你明唔明我嘅意思呀？」
張子萊聽到李穎容嘅說話時愣住了，佢冇諗過李穎容會咁直白咁講出嚟
「我地今年先26歲，仲要4年先到30歲呀！我點知呢4年入面仲會有幾多人追你呀？」李穎容嘅語氣中夾雜着少許嘅慌張，「你點解突然間咁多人追㗎？以前都唔係咁樣嘅⋯！我點知到邊個表白嘅時候你就唔會再拒絕？我已經中意咗你十年啦⋯明明你一直都喺我身邊，但我都好怕會失去你呀！因為我同你之間冇任何朋友以上嘅關係，你走嘅話我冇任何嘢可以留住你⋯！」
張子萊嘅大腦空白一片，佢嘅呼吸開始急促起嚟，腼腆地耷低頭笑咗一笑
「所以我要⋯要自私一次⋯」李穎容深呼吸，令自己嘅勇氣一下子聚起嚟，「張子萊，我地結婚啦！」
張子萊呆咗兩秒，不禁一笑，李穎容唔明白張子萊嘅笑容嘅意思，佢一臉疑惑咁望住張子萊
「冇諗過你會搶先一步開口呀～」張子萊嘅笑意都藏唔住，嘴角正上揚着，連想保持平常心都做唔到，「其實你咩都唔洗做，唔洗話我知你有幾溫柔、你識煮飯、識執屋⋯呢啲嘢其實唔洗同我講，我唔會因為你唔識呢啲嘢而唔中意你。」
李穎容呆呆地望住張子萊，佢嘅大腦運算緊關於張子萊講嘅嘢
「呀～好樣衰呀！竟然比你搶先一步表白！」張子萊尷尬地掩着臉，佢放低手望咗李穎容一眼，又悄悄地移開視線，「結婚對象嘅嘢⋯我一早就有一個想要嘅人選，直覺覺得佢係最好嘅人選啦已經～但佢好似，咁多年都冇察覺我中意佢⋯呀～明明我都決定咗今日一定要同佢講：我已經中意咗佢十二年，終於有勇氣叫佢同我喺埋一齊，但佢啱啱竟然一直打斷我唔比我講嘢，仲要喺今日突然間帶我嚟大會堂，話要同我結婚⋯」
張子萊今次真係認真咁將自己嘅心意講出嚟，收起咗十二年嘅秘密，終於要話比李穎容知
「咁點解你唔同我講呀！咁多年啦都！畢業嗰陣你唔同我講；大學日日都見住同我一齊，我地連科都reg一樣，你又唔同我講；到出嚟做嘢，我特登同你keep住聯絡得咁密你都唔講！咁多機會比你！」李穎容激動地問道，「點解你都唔講呀？」
「我都好怕會失去你呀，我都會驚我地以後連朋友都唔係⋯」張子萊望住李穎容認真地講道，「萬一表咗白，但你唔接受我，我地會連朋友都冇得做。早喺你中意我之前，我就已經先中意你，我已經中意咗你十二年啦！只係你一直都冇察覺。」
李穎容呢一刻先驚覺，當年去唱K同大家一齊挽真心話大冒險時，張子萊答嘅「有中意嘅人」嘅嗰個「人」，就係自己，什至一直都係自己
「我都會想你只依賴我一個，想你喺遇到咩事嗰陣第一個諗起嘅都係我，我都會⋯想以男朋友嘅身份將你留住喺我身邊呀⋯」張子萊輕輕抽手，拖住李穎容嘅手，「我呀，仲打算叫你同我一齊，做我女朋友；點知你直接就話要同我結婚⋯」
張子萊對李穎容笑咗一笑，李穎容心中明白張子萊想表達嘅意思
「不過呀～」張子萊伸手摸一摸李穎容嘅頭，「拖都係要拍嘅，等我帶你番屋企，你以我女朋友嘅身份見一見我爸媽先啦～」
「你都未見我爸媽，我指以男朋友嘅身份⋯」李穎容嘅臉頰一紅，有啲羞澀地講道，「而且張子萊你仲差我一個求婚⋯！」
「等陣先，我都未求婚點差你一個求婚？」張子萊笑問道，「而且李穎容，我地又唔係結咗婚，你仲係李小姐，唔係張太太。」
「咩呀⋯！反正好快都會係！」李穎容挽住張子萊嘅手臂講道
「係係～」張子萊笑着點頭，然後喺李穎容嘅額頭上輕輕地落下一個溫柔嘅吻，「多謝您咁想嫁比我喎～不過都要等你過咗女朋友嘅試用期先再可以決定。」
「呀～試用期？」李穎容頓時扁起嘴
⋯
四個月後
因為李穎容忽然間提議想去沙灘睇日落，所以張子萊帶咗李穎容去沙灘，陪佢坐喺石壆上等待日落嘅到來
「今日做咩突然間想嚟睇日落？」張子萊笑問道
「因為覺得⋯睇日落好浪漫呀～」李穎容笑了笑，「所以喺死之前一定要同你兩個人睇一次呀～」
李穎容靠喺張子萊嘅膊頭上，兩人嘅手緊扣着，完全冇鬆開嘅打算；張子萊偷偷地瞄咗李穎容一眼，李穎容正安靜地等待着日落嘅來臨
「死之前？」張子萊無奈一笑，「你要死啦咩？要掉低我一個，你捨得㗎啦？」
「一世有咁長，邊有咁易死呀～」李穎容輕鬆地笑了一笑，「我仲等緊要你個一世呀～等咗咁耐啦都，唔差在再等多一～陣～咁大把啦～」
「明明係你冇察覺到我中意你⋯」張子萊托着腮講道
「唔理呀！係你一直唔敢表白，搞到我等咗你咁耐⋯」李穎容輕輕地哼咗一聲
「係係，係我錯～」張子萊鬆開咗李穎容嘅手，「送份禮物比你補番。」
「係咩呀？」李穎容即刻好奇心滿滿地望住張子萊
張子萊喺斜孭袋中拎咗一個白色嘅正方形盒出嚟遞比李穎容，李穎容驚訝地接過盒子，望一望張子萊後將盒打開，入面放咗一條掛住水滴型吊墜嘅頸鏈，水滴型吊墜中鑲咗一粒細嘅鑽石
「嘩～好靚呀～」李穎容笑得高興，心花怒放的，「不過你咁樣就當補咗㗎啦？」
張子萊笑而不語，默默地伸手入袋中又拎咗個盒出嚟遞比李穎容，李穎容不禁令瞪大眼，滿臉驚訝
「仲有⋯！？」李穎容接過盒，打開盒一睇，入面放咗一對正方型單石嘅耳環，「你係多啦A夢呀？有百寶袋呀？」
「唔知呢～」張子萊喺講嘅同時，手又伸入袋中又拎多咗一個大啲嘅方型盒出嚟
「仲有嘅！？」李穎容笑道，然後又接過盒，打開後入面放咗一條簡約派嘅手鍊，不過剛好係李穎容中意嘅手鍊類型，「你真係百寶袋嚟㗎喎！」
李穎容興奮地將手鍊戴到左手上，然後遞比張子萊睇
「睇下～好唔好睇呀？」李穎容問張子萊，李穎容眼尾瞄到張子萊嘅手仲放喺斜孭袋入面，李穎容不禁一笑，「你唔好話我知你仲有盒喺個袋入面呀～」
「冇啦。」張子萊意味深長地笑咗一笑，手從放喺大腿上嘅斜孭袋中抽咗出嚟，然後捉起李穎容嘅手，「又真係戴得幾好睇喎～戴喺你隻手度特別好睇。」
「當然啦～」李穎容一臉自豪地笑道，「我梗係戴得好睇啦～」
「不過呢條鍊冇配飾，好似有啲單調。」張子萊嘅右手捉住李穎容嘅左手，手輕輕地捉住李穎容嘅手
「係咩？我覺得幾好睇呀～」李穎容先疑惑咗一下，然後笑咗一笑
「我都係覺得有啲單調，不過⋯」張子萊提起右手輕輕地由李穎容左手中指嘅指尖朝手心掃去，「咁樣好睇好多。」
李穎容望住套咗喺自己左手中指上嘅戒指，愣住了⋯
「戒、戒指、呢個、咁樣⋯係、係咩意思？」李穎容一臉難以置信咁抬頭望住張子萊
張子萊撇開臉，先令自己冷靜落嚟，等自己緊張嘅心平伏咗少許後，張子萊先再次望向李穎容
「就係，想同你結婚嘅意思。」
〈全文完〉
IG Link: https://www.instagram.com/nd_cotttoncandy/?hl=zh-tw