［純愛短篇番外］以朋友之名嘅愛情，我地各自嘅單相思: 17. 怎麼打我了？

Eva輕輕一撥頭髮，李穎容嘅心簡直嬲到出煙，想上前就捉住佢同佢講清楚，但佢唔可以咁做，臉上掛着微笑嘅李穎容，放喺枱下嘅手早就握緊了拳

呢個時候張子萊拎住餐盤行番嚟，先將餐盤放喺李穎容嘅面前，然後再行出去拎自己嘅餐

張子萊坐低喺李穎容身旁，李穎容望咗Eva一眼，努力地沉着氣

「就知你呢個女人對張子萊不懷好意⋯！」李穎容用力地拍開筷子

張子萊拎起一旁嘅沙律，Eva將叉伸到碗中拮咗粒蕃茄放入口中，對自己嘅外表同魅力有自信嘅Eva故意望住張子萊，但張子萊對佢唔過電，只係呆咗一呆





「Cyrus你唔介意㗎可？」Eva微微一笑問道

「唔介意，我唔食㗎。」張子萊淡定地搖搖頭，然後將沙律遞比李穎容

「佢唔食沙律入面嘅蕃茄㗎～」李穎容努力地忍住笑，接過張子萊嘅沙律，拎起叉拮起粒蕃茄放入口，心裏早就笑到停唔到：「你又點會比我更了解張子萊呀～爭嘢都睇人呀～自取其辱～」

李穎容望咗Eva一眼，Eva比兩人挫一挫銳氣，即刻顯得有啲尷尬

三人食完飯之後一齊走，Eva問張子萊可唔可以送佢番去，張子萊本來想拒絕，但李穎容卻話可以；張子萊行喺中間，右邊係Eva，左邊係李穎容





「聽日一唔一齊食晏？」李穎容故意喺Eva面前問張子萊

「我最近呢～已經日日都見住你啦好似⋯」張子萊無奈一笑，「不過都可以嘅～你想食咩呀？」

「未諗～」李穎容笑咗一笑

「我到啦⋯！」Eva開口講道，李穎容跟住張子萊嘅步伐停咗落嚟，Eva望向張子萊，「多謝你送我番嚟。」

Eva唔等張子萊嘅回答，拎住手袋嘅右手垂着，左手輕輕提起搭喺張子萊嘅膊頭上，喺佢嘅臉頰上落下一個吻，李穎容喺隔離望住成件事嘅發生，瞬間目瞪口呆地望住Eva





「只要你仲係單身，我都仲喺有機會㗎嘛～」Eva柔聲對張子萊講道，張子萊怔了一怔，Eva望咗李穎容一眼，「拜拜～」

「你個女人⋯！」李穎容喺心裏嘅怒火中燒，「我都冇錫到張子萊啦咁耐以嚟！單身你個頭呀！有我喺度你去火星等啦！」

張子萊一言不發，喺袋中拎出紙巾抹臉，李穎容不滿地瞪咗張子萊一眼，直接喺袋入面拎住張卸妝用嘅濕紙巾出嚟，行到張子萊面前，將濕紙巾一下子拍到張子萊嘅臉頰上

「你做咩要用濕紙巾打我呀？」張子萊望住李穎容

「睇你唔順眼呀！」李穎容哼咗一聲，「人地咁樣錫落嚟，你唔識避㗎咩！？」

「我點知佢會咁猖狂啫⋯」張子萊無奈地望住李穎容，「比人錫嗰個係我，你嬲咩呀？」

「我、我邊有嬲呀！」李穎容否認道，「佢錫你咋嘛，又唔係錫我⋯」

李穎容唔理張子萊轉身就行，自己咁多年都冇錫到張子萊，今日竟然比一個女人挑釁完自己之後仲要比佢錫到張子萊，諗到呢度就覺得好嬲





張子萊望住李穎容嘅背影，嘴角不禁上揚，將手中嘅濕紙巾掉咗後追上李穎容嘅步伐

「你笑咩呀？」李穎容見張子萊笑得好開，嘴角含春咁，不禁生着悶氣問道，「比靚女錫咗一啖好開心呀？」

「唔係囉！」張子萊頓時否認，然後又笑笑口地講道，「只係突然間諗起有啲嘢想話你知，不過都係聽日見嘅時候先再同你講～」

「有咩要同我講？」李穎容頓時好奇地問道

「聽日再講呀！」張子萊笑着搖搖頭

「喂呀！你宜家講同聽日講有分別咩？」李穎容追問道，「你宜家唔講嘅話，我今晚會瞓唔着！」

「咁你就瞓唔着等天光啦～」張子萊笑道





李穎容望向張子萊，見到佢笑得開心又突然好似開心唔起嚟一樣，李穎容諗起喺food court嘅時候Eva對佢講嘅嘢，李穎容嘅心始終好在意

「佢中意你。」李穎容微微耷低頭，氣氛就喺佢講出呢句話嘅一刻變得凝重，「Eva佢同我講，佢中意你⋯」

「我知，佢同我表咗白。」張子萊淡定地講道

「你明知道佢中意你，你仲比佢錫你？」李穎容問道，心裏有啲不甘

「啱啱我真係冇諗過佢會咁樣錫落嚟⋯」張子萊一臉無辜地望向李穎容，卻見李穎容一臉認真

「你中意佢？」李穎容鼓起勇氣問道，然後又笑咗一笑，「都係嘅～Eva完全就係男仔中意嘅類型～長頭髮、生得靚、身材好，又係職場女性，獨立自主。」

「Eva的確完全就係男仔中意嘅類型。」張子萊緩緩地開口講道，李穎容嘅心情亦連同張子萊嘅呢一句沉落去，「不過，我唔中意佢。」

李穎容嘅雙眼又再次亮起嚟，心情亦停止了下沉，佢望向張子萊，張子萊望向李穎容，但李穎容卻冇睇穿張子萊嘅心事





「嗯⋯」李穎容微微點頭，「不過總有一日會搵到中意嘅人嘛～畢竟你咁想結婚～」




IG Link: https://www.instagram.com/nd_cotttoncandy/?hl=zh-tw