［純愛短篇番外］以朋友之名嘅愛情，我地各自嘅單相思: 01. 遲來的生日飯

「你好慢呀，知唔知我等咗你幾耐呀？」李穎容望住啱啱趕到嚟韓燒店嘅張子萊

「哈⋯哈⋯我遲咗收工嘛⋯」張子萊喘着氣，將斜孭袋除落嚟嘅同時坐低喺李穎容對面，「我已經跑過嚟啦⋯」

「你咁冇誠意㗎！又話同我補過生日⋯」李穎容嘅語氣略帶不滿地講道，「約我食飯仲要遲到⋯」

「宜家咪嚟咗囉⋯」張子萊飲咗啖水，「你落咗單啦？」

「落咗啦！討厭鬼⋯」李穎容大聲講完前半句後，後半句則細細聲地抱怨道，「我生日嗰日你又唔嚟⋯」





李穎容心裏仍然記掛住兩個月前自己嘅生日，嗰一晚張子萊因為忙到冇睇時間，所以錯過咗李穎容嘅生日派對

「我等咗你成晚呀⋯」李穎容喺心中抱怨道，「但突然間就話唔嚟⋯」

因為大家都出咗嚟做嘢，見面嘅機會變得更少更珍貴，但對比起其他人，李穎容嘅心中更想見張子萊一面，雖然平日偶爾都會約出嚟食飯，但喺重要嘅日子時特別想張子萊在場同佢一齊

「嗱，生日禮物。」張子萊從袋中拎咗個盒出嚟遞比李穎容，「生日快樂。」

「我嘅26歲生日都過咗兩個幾月啦⋯」李穎容伸手接過正方形嘅盒，都係不禁要抱怨一聲，「不過睇在你有買禮物比我嘅份上，就原諒你一次啦～」





「我都係今年冇嚟同大家一齊同你慶祝啫，你18、19、20、21、22、23、24，25歲嘅生日我都有同你慶祝。」張子萊將領呔稍微扯鬆

李穎容打開正方形嘅盒，入面放咗一條頸鏈，李穎容嘅嘴角忍唔住上揚，抬眼望一望張子萊；張子萊眼尾瞄到李穎容嘅笑容，知道李穎容一定係中意條頸鏈，心裏特別開心，但張子萊強裝鎮定飲咗啖水

張子萊去買嘅時候，喺首飾店見到呢條鏈嘅第一眼就覺得係佢，直覺話佢知李穎容會中意呢條鏈

「多謝～」李穎容閂番埋個盒，然後將個盒放入手袋中

李穎容畢竟係壽星，烤呢啲嘢當然係張子萊做，李穎容坐喺度等食就係





李穎容抬眼望住張子萊，心裏嘅海浪一層層掀起，佢中意同張子萊一齊，中意同張子萊單獨一齊，更簡單嚟講，佢中意張子萊

「果然我都係貪心⋯」李穎容喺心中講道，「雖然我覺得宜家咁樣都唔錯，但如果佢係我男朋友會更好⋯」

唔經唔覺原來已經中學畢咗業9年，兩人都識咗十幾年，兩人之間始終都冇越過嗰一條界線，邊個都冇開口講出心意，一直以「朋友」之名默默地中意着對方

張子萊知道李穎容正望住自己，但佢冇抬頭，只係默默地繼續烤肉

兩個月前嘅生日派對，張子萊係故意唔去，本來嘅佢打算喺嗰一日同李穎容表白，但最後佢考慮過後，佢臨陣退縮，又將想講嘅嘢吞番落去

「係呢～你都26歲啦，仲唔拍拖呀？」李穎容飲咗一啖水後，試探般問道，「再唔拍拖就要單身一世啦～」

「單身一世又有咩所謂？總好過同一個自己唔中意嘅人拍拖。」張子萊將烤好嘅肉夾到李穎容嘅碟上

「冇人同你表白咩？你一直都單身都太奇怪啦掛？」李穎容又追問道，李穎容打從心底覺得張子萊唔會冇人追，畢竟性格又好樣又唔差，一直以嚟都單身都太奇怪，「唔通你係gay嘅？」





「你就gay⋯」張子萊反咗一下白眼，已經26歲嘅佢比起以前更加成熟穩重，「前嗰排先有個女同事同我表白。」

張子萊故意提起前排被表白嘅事，而李穎容頓時心裏一顫，但仍然故作鎮定

「咁你唔應承？」李穎容壓抑着內心嘅激動同在意，裝作淡定地問道，「人地唔夠靚？配唔上你？」

「唔係，而係⋯其實我爸媽想我30歲左右就結婚，佢地成日都講住，搞到我都開始成日諗⋯」張子萊夾咗一塊烤肉放入口，「但嗰個女仔，一嚟我唔中意，二嚟我覺得佢唔係可以結婚嘅人。」

「你先26歲咋喎，咁快就諗結婚啦？」李穎容認真地問道，「我就冇諗過啦～咁你覺得咩類型嘅女仔先可以結婚？」

李穎容抱着私心問道，雖然冇諗過結婚嘅事係真，但佢都想知道張子萊中意咩類型

「呃⋯」張子萊下意識地望咗李穎容一眼，「睇感覺？年紀唔想差太遠，同我夾得埋，之類？」





張子萊嘅心中早就有一個人選，但係佢唔知道對方對佢嘅想法，所以唔想講得太白

「其實都唔早㗎啦，都差唔多啦。」張子萊無奈一笑地講道，「好彩搵到個啱嘅人嘅話，都係一件好事。」

李穎容托住腮等食嘅同時，腦海中諗住啱啱張子萊講嘅事

「結婚呀⋯」李穎容喺心裏默默講道，「佢會唔會搵到一個啱嘅人⋯？佢搵到嘅話，我地就唔可以咁樣成日一齊⋯唔可以成日都見面，唔可以再傾電話，唔可以再咁樣單獨一齊⋯如果佢一直都搵唔到一個咁樣嘅人嘅話，係唔係就可以一直喺我身邊？」

李穎容壓喺心底嘅「貪念」因為張子萊一番說話而滲出，佢察覺到自己嘅貪心同自私⋯




IG Link: https://www.instagram.com/nd_cotttoncandy/?hl=zh-tw