投胎後竟然成為翻譯魔法師（魔法　冒險）: 1

我慢慢掙開眼睛，耀眼嘅陽光從窗口射入屋內，害我冇辦法一時三刻打開雙眼。我用手擋着眼睛，慢慢適應四周的光線，嘗試看看周圍的影像。

我發現我身處一間樸素的木屋內，瞓喺一張床上面，身穿麻布所製的衣服。四周的環境十分陌生，香港根本冇可能有這種地方，這令我更加肯定我真的已經不在香港⋯⋯
我慢慢支撐着身體，嘗試坐起來，但正在此時，房間的大門被打開，一名女子走了進來。這位女子看似大約十八、十九歲，唔算特別高，但係就身材唔錯⋯⋯
做咩啫？咁男人係咁㗎啦～第一眼都係睇咗外表先嘅啫⋯⋯

佢同我一樣都係身穿樸素的麻衣，只不過顏色有啲唔同。最令我注意嘅係，佢有一對尖尖的耳朵，但佢看起來又好像人類，卻帶給我一種神秘嘅感覺⋯⋯

佢進入房間後，我才發現佢雙手捧着一個水盆，入面有一條毛巾。佢注意到我已經醒咗，面對着門外方向大聲嗌：「老豆！佢醒咗啦！」
然後走到我床邊，將水盆放在床邊的床頭櫃上，開始着手弄毛巾。





「呢度係⋯⋯邊度？」我抑制着頭暈的感覺，向那名女子提問：「你係邊個？」

「呢個問題應該係我問你！呢度係我同老豆嘅農莊。」佢用一種奇怪嘅目光望向我：「琴日凌晨，突然間傳來一陣巨響，我同老豆立即去睇吓發生咩事，點知就只見到你一個人瞓咗係乾草堆上，都唔知你究竟係點樣入到黎⋯⋯」

佢遞左條毛巾俾我，我向佢點頭，然後用毛巾抹一抹面，清涼的感覺立即令我清醒。

「你可以叫我安娜，而家到我問返你，你究竟係咩人？點解突然間會係我哋嘅農莊出現？你偷入嚟有咩目的？」安娜用銳利嘅目光望向我。一時三刻我都唔知點解釋好⋯⋯

「咦？你終於都醒咗啦？」一把粗獷嘅聲音從門嘅方向傳來，有一位大叔挨着門邊望向我。「琴晚見你氣息咁差，仲以為你會撐唔住添，哈哈哈⋯⋯」





大叔慢慢走過來：
「等我自我介紹，我就叫維達，呢個係我個女安娜，尋晚嘅事我個女應該同你交代左，咁可唔可以講返俾我聽究竟發生咩事？點解你會突然間嚟到呢到。」

係呢個時候我感受到無比嘅壓力，你叫我點樣解釋好⋯⋯唔通同佢哋講話有一個自稱女神嘅人，然後同我講話要投胎到呢一個我都唔知係咩嘅世界，然後拯救世界呀？我自己諗出嚟都唔信啦⋯⋯點算呢？如果再係咁落去，佢哋一定以為我不懷好意。但係我又完全唔知可以講啲咩⋯⋯

係呢個時候，我突然間諗到一個好好嘅藉口⋯⋯

「我⋯我叫姚志信，你哋可以叫我彼得，我點解喺度⋯⋯我都唔記得⋯⋯」我一隻手遮住個頭，扮作頭痛「我點解會喺度嘅⋯⋯」





「睇來你應該失咗憶，咁樣就真係有啲麻煩，你真係冇印象你點解會出現喺度？」大叔問我，我便搖搖頭。

「聽你個名咁特別，應該係南方共和國嘅人，你有冇印象自己住喺邊？」我繼續搖搖頭

「唔⋯⋯ 咁嘅話⋯⋯」大叔若有所思，唔知佢喺度諗緊啲咩。

我轉眼望向安娜，發現佢好似對我嘅出現感到好奇，但有假裝唔在意我嘅存在。佢收返我條毛巾，然後繼續將毛巾沾上乾淨嘅水，留俾我一陣梳洗用。

「咁你有咩打算？」大叔突然間問我。呢個問題真係考起我⋯⋯

突然間比一個不知名所謂嘅女神掉咗去第二個世界，又唔同我講清楚要做咩⋯⋯我都唔知㗎我可以點⋯⋯

大叔見我諗唔到任何打算，就直接向我提出：「不如你暫時留喺度，幫我哋做嘢。」

「爸爸！」安娜好似唔太願意。





「做咩啫？反正佢冇人冇物，又唔知自己嘅鄉下喺邊，出到去都只係等死，而且去最近嘅城鎮要穿過森林，以佢而家嘅狀態，根本就冇可能去到。倒不如留喺度幫我手，再決定之後嘅去向。」大叔拍一拍我膊頭，然後向我單一單眼
「放心！包你食宿，都會出少少糧俾你嘅。你意下如何？」

雖然安娜好似好唔鍾意我留喺度，但係我根本冇選擇，既然可以巧遇維達大叔同安娜兩人，都算係一種緣份，倒不如直接留喺度，等我了解呢個世界點運作，先再做下一個步決定。

------------------

因為維達大叔嘅邀請，我就係呢個農莊寄宿，希望盡可能獲得更多呢個世界嘅情報。之前成日都宅喺屋企打機，總會喺遊戲裏面學到少少嘢。當一個人去到陌生嘅地方，第一時間要做嘅就係資料蒐集，要理解到自己係邊個位置，知道自己可以做到啲咩，先可以生存到。

維達大叔的農莊位於阿斯蘭與南方共和國的邊境附近，阿斯蘭勝在天然資源多，很適合做第一產業，所以維達大叔才可以藉此養家戶口。雖然科技水平不足，但係正正因為科技發展較弱，人類對這塊土地造成的傷害亦都比較少，世世代代都和大自然的力量可以互相共融，因此阿斯蘭人之中都有一部份的人可以使用魔法。
可能正正因為懂得使用魔法，以及對大自然的感恩，所以阿斯蘭人才會比較傳統，科技發展上亦都會比較落後。

我望向簡樸的農莊，不禁慨嘆。到底香港人幾耐冇試過悠閒嘅生活，我哋有幾耐冇真真正正享受過大自然嘅美好⋯⋯





維達大叔安排我做的工作一般都比較簡單：打掃農舍、負責搬運飼料、打水、施肥澆水、等等。雖然對於過往生活在香港嘅我的確一開頭有點不習慣，始終「歸原田居」我都係第一次嘗試，卻令我莫名地感到一股快樂，一種生活簡單但又充實嘅快樂。比起以前宅喺屋企，對住電腦螢光幕打機嘅時間，好似更加充實。

鄉下生活真係特別唔同，我哋日出時分，聽到雞啼嘅時候就代表着要起身。我哋開始各自各嘅工作直到午餐時間，午餐過後繼續工作。但我哋好早收工，基本上五、六點已經可以準備晚餐。晚餐過後，通常都會有唔同的消閑活動，但大多數都是維達大叔捉住我同我傾偈，想了解我嘅過去。而我往往都會扮到好似記得起一小部份記憶，然後就會同佢分享我投胎之前喺香港嘅生活。

當然我唔會同佢講百分百香港嘅事，否則佢應該只會當我係精神病人。我假裝說香港是南方共和國邊境的一個小城鎮，然後都會將我嘅過往修飾，先再同佢講。以為維達大叔每次都會好似返老還童咁，成個小朋友乖乖地聽我講故事。

至於安娜⋯雖然已經相處左十幾日，但佢對我仍然好似好有戒心？好多我講香港嘅故事，佢都會扮沒有興趣，實際上我知佢好好奇。點解我會知？只因為佢嗰對細長嘅精靈耳朵出賣咗佢。每一次我講到關於香港嘅故事，除咗維達大叔會化身成為好奇寶寶咁聽我講故事之外，我眼角望到安娜的耳朵總是會在抖動。

嘿！點解要咁倔強？好奇咪講囉～偷聽人講嘢都唔識掩飾下。

如是者我就係維達大叔嘅農莊生活左一個月，大約了解咗呢個世界嘅局勢，以及生活知識等等。但我真係好好奇，究竟而家平凡嘅生活又點樣可以做到嗰個叫做愛麗絲嘅女神所講嘅拯救世界⋯⋯而且我都唔知佢究竟係咪真係所謂嘅神⋯⋯所以我決定⋯⋯

「大叔，我有個問題想問吓你。」不如直接問當地人仲好：「你有冇聽過一個女神叫做愛麗絲，好似係森之女神，唔知你識唔識？」

「愛⋯愛麗絲女神⋯」維達大叔驚訝地望住我，欲言又止，然後問：「點解你會認識呢個神明？」





「我⋯發夢好似見過⋯」我當然講大話啦⋯⋯「所以先想問吓你知唔知係咩。」

「呢一層⋯⋯我當然認識，呢個生命對我哋一家來講有着特別嘅意義⋯」大叔望向窗邊，仰望夜空中嘅星際。睇嚟這位神明對佢來講應該有一段故事。

「咁既然係神明，咁應該有神殿。唔知道我有冇辦法可以認識下有關呢個神明嘅事，又或者去神殿參拜一下。」我好奇問大叔， 只見大叔搖搖頭。

「好遺憾，應該冇呢個機會⋯⋯」大叔望向我，淡然講出一句：


「愛麗絲神明嘅信仰⋯已經沒落⋯⋯」