【愛情】 我同女仔傾偈就會肚痛: 第二章.11
經過三日檢查，醫生見我冇咩大礙都正式畀我出院。雖然之後仲要返去覆診，但係起碼可以正常返學，唔使驚學習進度有好大落後。
重新返到學校，額頭上面嘅膠布令我吸引咗唔少目光。當中識得我嘅同級同學大約知發生咩事，見到我嗰陣會特登行埋嚟表達敬意。
不過冇諗過連佢都會過嚟。
「你個頭......冇嘢呀嘛？」
鄧逸俊趁我小息得一個人嗰陣，走咗過嚟關心我。
事實上，自從選班長之後我同佢基本上係冇乜交流。可能係因為佢心入面有些少不滿輸咗俾我，又或者係因為我哋本來就唔係好熟，總之佢冇主動去迴避我，同樣哋亦冇主動去同我有任何交流。
「冇事，皮外傷啫。」同佢唔太熟嘅關係，令到我哋就算同樣係男仔，依然會有種尷尬感覺：「贏到個冠軍畀Miss So就冇所謂喇。」
入咗醫院嗰陣，其實我無意中醒起一樣嘢。
我記得中一班際排球嗰陣，我哋班經過Miss So半場鼓勵，成功反敗為勝並且由鄧逸俊絕殺對手。嗰次之後，鄧逸俊望住Miss So嘅就眼神唔同咗，甚至應該話佢係嗰次之後，先開始同Miss So越嚟越Friend。
我今次個情況，同佢嗰陣可以話有異曲同工之妙。
一樣受到Miss So嘅鼓勵振作，一樣因為噉而成為絕殺對手嘅關鍵。
我忽然明白，自己同鄧逸俊喺呢方面係幾相似。
唔知佢之後成日接觸Miss So，係因為同我一樣鍾意咗佢，定純粹覺得佢係一個好老師，不過我宜家或多或少都明白佢當時嘅感受。
因為大家有類似經歷，所以我對佢忽然又少咗種敵意。
「係幾犀利嘅你嗰吓......辛苦晒。」
鄧逸俊依然唔太自然，但係可以睇得出佢同樣對我少咗份敵意。
「唔使客氣，之後排球靠返你哋喇。」
去到之後嘅班際排球比賽，大概係因為我嘅烏鴉口，我哋最尾係輸咗俾C班，而班際籃球方面，就輸咗俾E班。
點都好，其實我唔太Care呢兩方面嘅成續，話晒我已經完成咗對Miss So嘅約定，排球籃球贏定輸我都冇咩所謂。
講起個約定，我哋之後幾個禮拜仲未去到睇戲。為咗追返落後咗嘅進度，呢個幾個禮拜我要馬不停蹄噉做Miss So啲額外功課，再加上其他學科催逼，搞到我要喺星期六日抽啲時間出嚟都唔係咁易。
尤其難得可以同佢單獨出街，我又唔想淨係睇套戲食餐飯咁單調。
最後因為臨近聖誕節，我哋約咗喺Boxing Day嗰日，而平安夜同正日就留返畀佢同鄭Sir。雖然已經過咗正日，但係我諗到時應該仲會有啲節日氣氛，等我可以FF吓同Miss So過聖節噉。
不過估唔到，我哋呢日個約定最尾都係去唔成。
因為喺聖誕節前夕，發生咗一件事。
Miss So發現鄭Sir出軌。
對於實際發生咩事，我其實仲係一知半解，唯一可以肯定嘅係，之後嗰日Miss So理所當然唔會有心情同我去街。
俗語成日話：「有咩慘得過食屎......就係食兩舊屎。」宜家Miss So某程度上驗證咗呢句說話，當你以為跌一次已經夠痛，實在好難想像個天要你再跌多一次。
我曾經聽Miss So講過，佢當初覺得鄭Sir散發一種救世主嘅感覺。當佢第一次俾人出軌嗰陣，鄭Sir就恰好出現，令佢喺絕望之中重拾返一點希望。
尤其當Miss So因為工作需要，成日要掩飾自己內心嘅真實情感。偏偏鄭Sir竟然可以睇穿偽裝，察覺到佢唔開心之餘仲會主動氹吓佢。
久而久之，鄭Sir就好似太空入面忽然出現嘅氧氣，令Miss So可以賴以為生、慢慢有返動力。
不過由宜家個角度去睇，佢唔單止係太空入面嘅氧氣，仲係火災現場嘅氧氣——一方面可以保住你，另一方面又會加劇烈火燃燒、令你引火自焚。
如果Miss So因為噉而唔再相信男人，我都可以理解佢點解有呢個決定。
放完個聖誕假，我哋少不免又要補課。換言之Miss So可以逃避工作、專心養傷嘅時間已經完結，更加唔好提，佢除咗要帶住面具工作之餘、仲要周不時面對面撞正鄭Sir。
望住Miss So再一次俾人出軌，我好自然戥佢心痛，點解一個咁好嘅女人，要受到呢啲對待。
感覺就好似返返去上年，我除咗請佢飲朱古力奶之外，唔知仲可以做到啲咩。
我記得上年知道Miss So失戀嘅時候，佢已經經歷咗一段時間，所以心情相對平緩一啲、情緒冇好劇烈嘅起伏。相反佢宜家新鮮滾熱辣，仲要係第二次俾人出軌，我諗佢應該要Sad返一段長時間。
正當我諗緊點樣安慰Miss So嗰陣，佢竟然主動約我出街。
或者係因為我距離上年嘅身份已經唔同咗，變得同佢親近咗之餘，仲算係望住佢哋起埋一齊，令我今次成為佢嘅傾訴對象。加上Miss So念在本身同我有約在先，又想出街行吓散心，所以就搵咗我。
雖然噉樣同佢出街唔係我最理想嘅結果，但係可以喺對方有需要嗰陣幫到手，都係一件好事嚟。
最尾我哋揀咗睇盛極一時嘅《我的少女時代》，當時佢嗰首主題曲真係Hit到街知巷聞，十足十再早幾年嘅《那些年》熱潮。本來我提出同Miss So睇戲呢個約定，正正係因為阿烽佢哋班毒撚唔會去睇，而我又可以試吓同佢睇返套愛情片。
其實以Miss So宜家呢個處境，並唔適合睇呢啲浪漫愛情故事，更何況我聽講套戲仲要好感動好催淚。
當我聽到佢想約返我睇戲，我原本係諗住揀同樣幾有口碑嘅《十年》或者《哪一天我們會飛》，諗住對Miss So嚟講冇咁剌激。可惜Miss So堅持想睇《我的少女時代》，我亦唯有順佢意。
結果不出我所料，Miss So喺戲入面天台嗰幕開始喊，喊到完場出返嚟先勉強喊完。
話唔定佢揀呢套戲，正正係因為想借套戲嚟喊吓舒發感情。話晒一個人要大喊一場始終唔係咁易，喺屋企會有人屋企、喺街又怕其他人望住、喺學校就更加唔使講。
而喺一間播緊愛情片嘅戲院入面，喊只係一件理所當然嘅事。
「哎呀，諗返起都覺得醜怪，俾你見到我喊成噉。」
「唔緊要......套戲感動啫。」
睇完戲之後，我哋搵咗間餐廳坐低食嘢，順便討論吓啱啱套戲啲劇情。我盡量唔提及佢同鄭Sir啲嘢，費事Miss So會越講越傷心。
「我覺得成套戲入面女主角啲演技最好！」
「都係嘅，反而男主角傷心嗰樣有、有啲唔自然......同埋唔明佢最尾點解唔講清講楚先走。」
「咁佢以為女主角鍾意第二個男仔嘛，畀著你鍾意人都唔會咁有勇氣坦白所有嘢啦！」
「我、我都冇鍾意人......」我忽然覺得尷尬，諗起自己其實同男主角一樣，明明鍾意Miss So但又冇講出嚟。
「係咩？」佢奸笑噉望住我，語氣不懷好意：「新加坡個女仔呢？」
Miss So唔講我都差啲唔記得，嗰陣佢因為誤會咗我同Claire姐啲對話，所以我就索性拎嚟問佢有關表白嘅意見。
「冇啦，做返朋友。」
「放棄咗嗱？我嗰陣仲特登鼓勵你添。」
「有時冇得揀......噉起碼有得做朋友都好。」
佢噉樣講，令我諗起聖淘沙嘅時候。嗰陣我見佢對鄭Sir有好感，於是主動放棄表白，接受留喺宜家呢個位置。
只係估唔到最後鄭Sir竟然係個賤人，糟蹋咗我夢寐以求嘅Miss So。
食完個飯，我同Miss So喺沙田個商場周圍行吓。本身我一時冇為意，當咗自己同Friend行緊街就拉咗Miss So入玩具反斗城，點知佢唔覺得低B之餘、仲好開心同我分享佢細個玩過啲咩玩具，令我意外發現咗佢天真無邪嘅一面。
跟住因為佢要買定啲零食送畀學生，我哋又去咗行超市，順便等我幫手畀意見同拎嘢食。
「哇...你又話買少少嘅喂。」
「一次過買定呀嘛，呢包派一次畀全班就會冇晒。」
望住佢一包又一包零食噉遞過嚟，我開始要抱住啲零食先拎得晒。尤其佢揀親都係啲一包入面有二、三十包嘅大包裝，我慢慢連條路都睇唔到。
「早知拎、拎定架車過嚟。」
「嘻......Sorry！我搵多一兩包就夠㗎喇。」
佢伸脷微笑，有啲唔好意思噉應返我。見佢笑到咁得意，我即刻冇晒想呻嘅慾望，繼續靜靜哋跟喺佢後面。
噉樣跟住佢行，加上個人慢慢放鬆落嚟，我先開始留意到佢今日嘅衣著。
Miss So著住一件深藍色嘅連帽外套、下身係淺藍色嘅牛仔短裙同黑色襪褲，加埋一對白色波鞋同細細哋嘅斜揹袋。
其實一啲女人味都冇。
不過就算佢衣著平凡，對我嚟講依然有種吸引力喺度。可能係因為好少見佢著便服，又或者正因為佢冇打扮得好女人，反而感覺更加後生隨和，令我好似同緊啲同輩女性出街噉。
「哎呀呢Pack好似好平，買一送一。」Miss So拎起一排檸檬茶，但係好快又放返低：「唉算啦你都冇手幫我拎喇。」
「拎埋嚟喇。」
我揈一揈隻手示意，因為我係抱住啲零食，勉強仲可以騰空一隻手掌出嚟拎嘢。
「咁好人嘅你。」佢再一次笑笑口，將啲嘢塞落我度。
「不、不嬲都咁好......」
行行吓超市，一時我幫佢拎吓嘢、一時佢幫我拎吓嘢，我突然覺得我哋好似跳過咗拍拖，直接到達結婚階段。
就好似嗰啲新婚夫婦，會一齊去行超市買日常用品噉。
當然呢啲只係我FF嘅感覺，但係見佢行超市同玩具反斗城行得咁自在，令我更加覺得佢係與眾不同，有別於我認知入面一般嘅女仔。
終於我哋買完啲嘢，就搬晒上去佢架車。本來我以為今日嗰行程就此結束，點知佢話突然想行吓海傍，所以我哋最尾喺沙田去咗科學園嘅白石角海濱長廊。
果然有車就是任性，可以噉樣想去邊就去邊。
以睇日落嚟講，呢個位置其實唔算特別靚。不過可以睇到咁大片海，對都市人嚟講已經係一個好舒暢嘅地方。
我哋沿住海傍行咗幾個字，然後搵張有遮掩嘅長凳坐低休息，靜靜哋欣賞眼前嘅海闊天空。
今日天公造美，成個天晴空萬里、只係得幾舊白雲喺遠方飄浮，俾日落嘅斜暉曬至橙黃。
得我哋兩個人對住個海，令我好自然又聯想起聖淘沙嗰晚嘅事。
只係心事重重嗰個，已經由我變咗做Miss So。
我見佢一言不發，應該係想望住個海沉澱吓，所以都冇主動打破呢刻嘅寧靜。就算佢唔講嘢，我依然會陪住喺佢身邊，因為呢樣係我宜家唯一做到嘅事。
過多幾個字，個天正式日落西山，大部份嘅天空逐漸蒙上一陣鬱藍，僅餘西邊天空尚有未完全褪去嘅日光。
「其實......點解啲男人把口話愛你，但係又要出軌？」
Miss So忽然打破沉默，就問起我一個世紀難題。
「可能佢唔係真係咁愛你？」
「咁點解佢唔係愛我，又要對我咁好、好似真係付出好多噉？」
「噉佢點樣解釋？會、會唔會係你之間本身已經有啲問題。」
「佢話佢一時衝動......」Miss So稍作停頓，繼續講落去：「明明本身仲好哋哋，Plan緊聖誕去邊度玩......如果有問題點解佢唔講？」
「個、個個都話自己一時衝動㗎喇。」我見佢眼眶有啲濕潤，心入面其實都做好準備：「佢個情況......係咪真係一時衝動先？」
「我之前喺佢屋企，搵到有第二部電話......」Miss So抖咗一大啖氣，終於忍唔住爆發：「跟住我喺入面...搵到佢同Miss Lau啲咸濕片......」
佢聲淚俱下，仲夾雜住一個我以為自己聽錯嘅真相。
「做、做咩咁傻呀你......嗰啲嘢你知咗就算呀嘛。」
「我忍唔住呀......我一路睇...一路好心痛，但係又忍唔住睇晒佢......」Miss So呼吸變得唔太順暢，斷斷續續噉繼續哭訴：「點解...佢可以一路話愛我一個，一路同、同第二個女仔上床......？」
「點解...我遇到嘅都係賤人？」
「明明我、我冇做錯......點解受苦嗰係我？」
「點、點解佢...明知我已經...俾人傷害過一次，仲、仲要對我做多次呀......？」
Miss So越講越激動，喺抽搐同飲泣之下，講嘢其實越嚟越含糊。不過面對佢一連串嘅「點解」，就算我聽得明佢啲問題都畀唔到答案。
佢喊喊吓想搵啲依靠，於是主動挨咗落我膊度。
我下意識想掃佢背脊安撫吓佢，但又怕唔好意思，唯有默默借個膊頭畀佢，同埋不停遞上紙巾。
望住佢近乎聲嘶力竭噉喊，我個心亦不自覺隱隱作痛。親眼見過一面之後，我先體會到出軌對一個女仔傷害有幾大。
唔講之後佢對愛情信心嘅影響，單係當刻嘅痛楚，就可以喺佢嘅喊聲入面表現到出嚟。
「可能只係你嘅愛、愛情路崎嶇啲啫......我哋改變唔到個世界有幾多衰人，但至少可以唔好比個世界改變自己。」
我等佢平伏返少少，慢慢表達我嘅意見。
雖然我唔知噉樣講適唔適合，但係我怕佢因為遇到呢啲挫折，就對全世界嘅男人失去信心，甚至覺得做好人只會自己攞嚟衰。
直至天色完全入黑，海濱亮起泛黃嘅街燈，Miss So先止住淚勢，靜靜哋挨喺我膊頭休息。
「有啲唔好意思添，要你睇我喊咁耐......」
佢突然意識到時間流逝，坐返直個人整理吓儀容。
「唉喊到隻眼又紅又腫...返屋企都唔知會唔會俾人見到。」
「噉喊吓抒發吓啲情緒會、會好啲嘅，起碼個人冇咁鬱住......同埋紅腫呢啲好、好快散㗎喇。」
「係咪㗎......多謝你陪我喇......」
「唔使客氣......你之後想喊可、可以隨時搵我。」我尷尷尬尬提議。
其實我又唔係真係好想見到佢成日喊，只係覺得佢會想有個可以隨便抒發感情嘅空間，而我又好滿足於喺佢唔開心嗰陣陪住佢，所以先噉樣提議。
「唔制呀！噉咪成日俾你見到我咁醜怪。」Miss So有返啲精神，笑笑口應我：「考慮吓先。」
見佢喊完一大輪之後，呢刻個心情似乎開懷返少少。最後Miss So好好人噉車埋我返上水，先至結束呢日嘅行程。
再一次俾人出軌，依然冇影響Miss So嘅專業。佢喺學校面目依舊，冇特別表現到經歷咗啲咩情緒事件，亦冇再喺假期嗰陣約我出街散心，諗住留返多啲時間俾我溫書。當然我又唔會咁順攤，有時我會借補英文為名，同佢出街溫吓英文。
就算喺條街度，好自然已經感受到嗰種Dse氣氛，因為除咗自修室之外，M記、Starbucks呢啲可以坐成日嘅地方，同樣成為Dse考生嘅修羅場。
望住佢哋有啲帶住疊卷、有啲拎住幾部計數機、有啲約埋三五知己一齊奮鬥，而我就係帶個Miss出嚟補習，不自覺會有啲與眾不同、飄飄然嘅心態。
「仲掛住望女仔！快啲做埋呢題呀。」Miss So敲一敲我個頭，將我嘅目光由周圍之中抽離。
「咩呀，呢啲叫知己知彼、百、百戰百勝。」
經佢長期督促之下，我喺臨考前呢兩個月越嚟越畀心機心溫書，有時仲會嗌埋阿烽佢哋一齊溫
。佢哋可能見Dse真係要殺到埋身，所以都會應約溫書，令我哋由之前開壇打機，去到宜家開壇溫書。
一方面有戰友一齊出生入死，另一方面又有Miss So長期輔導，再加埋Claire姐有時會解答我啲數學問題，總算捱過咗呢條Dse最後大直路九成路程。
距離開考，只係得返兩個星期。
喺努力溫書嘅同時，我哋都正式告別咗呢六年校園生活。我哋圍內班人太毒嘅關係，喺Last Day嗰日冇做到啲咩特別事，只係喺大家本畢業相冊寫吓嘢就算。
我自己私底下當然有去搵Miss So影返張相，但係因為我哋仲會補課同約出街補習，所以又冇話特別有離別之情，單純係唔捨得中學嘅校園生活。
為咗喺考試之前放鬆吓，順便紀念呢個毒撚圈子，我哋成班人約埋一齊去咗網吧打機。呢間網吧可以話陪伴咗我哋無數個放學日子，由於佢比上水啲網吧收得更平，所以就算喺大埔我哋都專程遠道而嚟。
自從中六之後，我哋已經好少再嚟。今次特登嚟到，自然開返隻喺度玩得最耐嘅「Left 4 Dead」嚟玩，有時某啲遊戲，就係要坐埋一齊面對面玩先有吸引力。
喺大埔食埋個晚飯，我哋又想搵個靚位消磨時間，於是就買晒啲啤酒去大埔海濱公園，諗住搵個位圍埋一齊講吓是非。
最尾我哋喺回歸紀念塔下層、延伸向海邊嘅瞭望台席地而坐，一邊感受柔和嘅海風，一邊享受純樸嘅時光。
「唉，善仔次次都咁掃興㗎，個個都飲酒得你飲可樂。」
「黐撚線，可樂先正喎，啲酒咁難飲咪預我。」
「中學畢業都未飲過酒，死咗會俾人燒春袋㗎。」
「講咁多做咩呀，灌佢飲返啖先啦！」
除咗阿烽班人之外，其實在場仲有幾個前B班喺度，今次難得咁齊人，佢哋都好似以前噉打成一片。
而我因為坐到腳痺，唯有企喺側邊挨住欄杆，冇參與到佢哋嘅打鬧。
唔知係咪飲咗酒會令到個人多愁善感，我望住佢哋玩得咁開心，忽然又醒起中學生涯已經完結。未來究竟仲有冇機會，可以噉樣成班人一齊打機、食完飯聚埋一齊吹水，坦白講我自己覺得唔太樂觀。
尤其諗起自己有好多小學同學，升上唔同中學已經再冇聯絡，更加唔敢想像出嚟做嘢之後嘅情況。
加埋眼前深不見底嘅大海，感覺再諗落去只會越諗越Sad。為咗等自己抽離返，我擰轉頭望吓座紀念塔，感覺光猛啲睇落會有返啲希望噉。
正當我諗住再周圍望吓，望吓已經寂靜無人嘅海濱公園，突然俾我望到Miss So……
同埋鄭Sir。