【愛情】 我同女仔傾偈就會肚痛: 第二章.7
估唔到今次表白之旅，我表唔到白之餘，最尾仲輸到一敗塗地。
而我返到香港，同Miss So一齊坐巴士嗰程車更加係最大嘅諷刺。雖然我哋附近仲有木村同其他同學，但係我偏偏又咁啱坐到Miss So隔離，喺一個最佳觀眾席度望住佢同鄭Sir Message。
就算會越望越心酸，我依然忍唔住偷望吓佢。
呢程車比想像中快到目的地，或者係個天想可憐吓我，費事我喺呢個過程入面折磨咁耐。
去到暑假，Miss So仲有繼續同我Message傾偈，我間唔時會八卦吓佢同鄭Sir進展如何。最尾不出我所料，暑假未完佢哋已經一齊咗。
聽Miss So分享，鄭Sir其實係個幾細心體貼嘅人，佢知道Miss So對上一次俾人出軌，應該會對愛情冇乜信心，所以喺一齊之前都有考慮Miss So感受，問佢使唔使要多啲時間準備。
我平時喺學校對鄭Sir嘅印象，主要係覺得佢幾平易近人，無論同學生定老師相處一樣會有講有笑。當Miss So嚟問我意見嗰陣，我亦好客觀去畀建議，冇嘗試阻止佢同鄭Sir一齊。
「咁早啲睇清楚都係好事黎既」
「尤其黎緊就到你考dse，應該專心考好個試再諗其他野呀！」
我有同Claire姐講Miss So同鄭Sir嘅事，可能佢以前已經有勸我諗清楚，所以呢刻佢冇特別講咩去安慰我，淨係勸我集中精神考試。
諗返起沙灘嗰陣，我都冇諗過自己最尾會忍唔住喊出嚟，好彩嗰度夠黑，Miss So又冇多疑望返轉頭。
其實我唔知自己宜家係咪放棄咗Miss So，只係覺得成個人好頹好頹，會咩都唔想做同成日亂諗嘢。例如以前見到Miss So覆我會好開心，宜家見到佢未覆我，就好自然個心揦住揦住，覺得佢一係覆緊鄭Sir、一係就同緊佢出街拍拖。
另一方面，我周不時返去補課又要同Miss So接觸，佢細微嘅舉手投足、簡單嘅一個笑容已經足以令我心動，搞到我成個暑假都心情忐忑，好似過山車噉上上落落。
唔經唔覺，我個暑假就喺補課同過山車之間渡過。
事隔一年，估唔到咁快又嚟到開學日。我仲記得一年前聽到Miss So個電話之後，個心情又驚又喜，期待嚟緊一年可以點樣把握機會，拉近同佢之間嘅距離。
今年我第一件事唔係去搵班房，而係去教員室搵咗Miss So先。
「哇第一日就嚟搵我，太掛住我呀？」佢見到我有啲驚訝，因為我之前冇提過朝早會嚟搵佢。
「少、少少啦。」我挨住走廊嘅矮牆，拎咗包朱古力奶出嚟：「新一年打個招呼啫。」
「咁好人！」Miss So好似細路女咁雀躍，一個箭步就行近我拎走包朱奶：「噉又係呀，嚟緊呢一年就到你考dse啦，你準備好未？」
佢同我一齊挨住矮牆，望向喺校門行入嚟學生。
「呢啲嘢邊、邊有得準備好㗎。」
「起碼心態要準備好先啦，搵好個目標，然後盡全力為個目標搏殺。」
「盡力啦......都會想主、主科合格。」
「唔使太緊張嘅，我會陪你去到最後㗎嘛。」
Miss So笑住同我講，令我莫名有種安慰嘅感覺。
「多謝Mi…...」
「Miss So早晨！」
地面嗰層突然有人大叫，打斷咗我同Miss So講嘢。
我哋一齊望落去，發現係啱啱返到嚟嘅鄭Sir。
「咁早呀鄭Sir，今日好準時喎。」
「下，我不嬲日日都好準時。」
「但係有人上次開會差啲遲到喎。」
「因為上次『有啲人』嗌我買嘢畀佢飲呀嘛。」
「定係因為今日『有啲人』嗌你起身呢？」
望住佢哋一唱一和噉打情罵悄，我靜靜哋一個人行返去搵班房。
雖然些少心酸點都會有嘅，但係望到Miss So笑得咁開心，總好過望到佢失戀憂鬱個樣。而且經過咗個暑假，我一早預計今年會有唔少呢啲情況，當係早啲熟熟習鄭Sir呢個存在。
我明白到如果唔想受傷、失去宜家擁有嘅位置，唔表白係唯一方法。
我自己都估唔到，隔咗一年之後嘅開學日會有咁大變化。
去到自己間班房前面，竟然俾我遇到雞豪自己一個企喺走廊。
「喂，做咩成碌木企喺度唔入去。」
我記得上年係佢搭住我膊頭入班房，所以我諗住照辦煮碗。
點知我一搭住佢膊頭嗰吓，佢竟然甩開咗我。
「你入去先啦，我想喺度Hea吓先。」
「吓？」
我望一望班房，發現大部份女同學已經坐喺入面，得一兩個男同學係返咗嚟。
斷估雞豪又係因為啲咩臭雞論，唔想同咁多女同學困埋一齊，所以想等多啲男同學返嚟先入去坐。
講起又有啲奇怪，正常雞豪想避免呢種情況，應該會約埋阿烽同木村食早餐，然後順便一齊返學，偏偏宜家就得佢一個人。
不過我冇深究太多，入去搵個靚位補吓眠仲好。
大約過咗一個禮拜，我正式擺脫放假嘅心情，投入返學讀書嘅環境。尤其作為應屆考生，聽到某啲同學喪做Past paper、老師又會係噉派Mock卷，開始Feel到自己仲有好多嘢未識，自然會有壓力。
「幾日冇打機喇喎，幾時開返個壇？」
阿烽咬住舊三文治，成個人挨咗喺張檯度。
經過上晝連續兩堂測驗，我哋四個散晒咁濟、坐咗喺操場食嘢抖吓氣。
「今晚囉，今日冇臭雞Miss堂應該少啲功課。」
「你個個都臭雞㗎喎，鬼知你講邊個咩。」木村忍唔住串吓雞豪。
我冇參與佢哋講Miss壞話嘅討論，因為Miss So咁啱又出現喺我視線範圍之內。
照正常情況，我起碼會扮吓一齊傾偈，然後趁佢哋唔覺意先去望吓Miss So，但係今日實在忍住唔金睛火眼望實佢。
唔係因為佢今日特別靚，而係因為佢同幾個學生玩緊。
嚴格嚟講，我覺得Miss So係俾人哋調戲緊。
平時佢同學生玩得埋，有啲打鬧都算正常。偏偏今次有三個男學生圍住佢，其中一個負責睇戲、另一個就喺Miss So後面捉實佢兩隻手、而最後一個就想喺佢手上搶某啲嘢返嚟。
驟眼睇嗰幾個人應該係中四嘅人，估唔到宜家啲僆仔已經咁冇禮貌，完全唔識咩係尊重老師。
坦白講我實在係有股衝動，想去解救俾人圍嘅Miss So。
我望向周圍，希望其他老師或者學生經過會幫佢，甚至係喺操場另一邊嘅訓導室，會有訓導老師聽到動靜之後出嚟阻止。
可惜等咗半分鐘左右，都冇人行過嚟幫佢。
負責搶嘢嗰個學生開始變本加厲，諗住扮吱Miss So嚟令佢投降。Miss So似乎係個驚吱嘅人，佢一見到對方想吱佢，即刻忍唔住笑住扭腰，費事真係俾個學生吱到。
我唔知係咪角度問題，感覺個學生有幾吓真係吱中咗Miss So。
呢刻我越睇越眼火爆，成個畫面好明顯似啲蠱惑仔調戲良家婦女，班友仔完全係得寸進尺，分分鐘仲會趁機抽Miss水。
我望一望阿烽佢哋，希望佢哋會望到Miss So俾人玩緊。如果佢哋都覺得唔妥，噉我就可以更加大條道理去救人。偏偏佢哋仲掛住講緊邊個老師啲功課最多，完全冇理到楚楚可憐嘅Miss So。
如果我自己一個衝過去，好大機會惹嚟成個操場嘅目光，以我自己嘅面皮實在承受唔晒。
掙扎期間，我忽然諗起鄭Sir。
話晒佢宜家係Miss So男朋友，又係訓導室老師之一，正常都要嚟維持秩序啩？！
我再一次望吓周圍，諗住只要搵到鄭Sir嘅身影，自然會救到Miss So。
小食部、訓導室門口、操場兩邊嘅樓梯，無論邊一面都唔見佢。
人呢？！！！！
你女朋友俾人搞緊呀！！
你係咪男人嚟㗎？連自己女朋友都保護唔到！！
我突然覺得，呢番說話好似講緊比我自己聽。雖然佢唔係我女朋友，但至少係個我珍而重之嘅人。
我望住嗰個男仔，暗地裏等自己做好準備。如果佢一掂到Miss So條腰，我就要衝上去。
「啪！」
當我拍檯起身嗰刻，阿烽佢哋呆晒噉望住我。
我唔得閒同佢哋解釋咁多，一心急步行過去Miss So隔離。嗰幾個人同我有一定距離，所以直至我行到埋去，佢哋依然未知發生緊咩事。
「咚！」
為咗發洩怒火，我冇開聲叫停班人，而係直接將吱人嗰個學生推落地。
「傻撚咗呀你哋！」
我再推開捉住Miss So嘅學生，然後忍唔住教訓佢哋：「Miss嚟㗎呢個！幾時輪到你哋亂掂呀！」
唔止眼前嘅Miss So，我諗直頭成個操場嘅人已經望住我。
唔知係因為嬲得濟，定因為俾咁多人望住，我開始感覺到自己面紅耳赤。
不過我冇得再縮沙，既然洗濕咗個頭唯有頂硬上。
「你識唔識咩叫尊重呀？你個腦裝屎㗎？」嗰個俾我推落地嘅學生未識反應，仲瞓緊喺地下俾我鬧：「佢就算唔係Miss都係女人啦，邊個教你咁樣掂其他女人呀？」
「喂！冷靜啲！」
呢個時候，鄭Sir終於聽到動靜，喺訓導室行咗出嚟：「發生咩事都好，唔代表你可以亂講粗口呀吓。」
咁辛苦等佢出嚟，佢竟然講埋呢啲垃圾說話。
「宜家Miss So俾人搞呀，你仲執著我講唔講粗口？正常都屌柒佢哋先喇！」我大聲反駁鄭Sir，呢次無論在公在私都睇佢唔順眼。
「秦子柱，你冷、冷靜啲先......」
Miss So拉一拉我，驚我越嚟越失控。
「點冷靜呀？連呀Sir都唔幫你喎！」
我冇理到佢，諗住繼續同鄭Sir理論。
「唔係呀，你聽我講先啦......」
「喂、喂......！」
「子柱！！」
木村兩隻手喺半空中拍一拍，將我嗌返醒。
「吓？」
「講緊今晚開唔開壇打機呀，未瞓醒呀你？」
「打、打囉。」
我偷望Miss So嗰邊，見到佢已經冇再俾人圍住。
冇錯，因為個男仔最尾冇掂到佢，而Miss So都喝停咗佢哋，所以啱啱嗰啲其實係我FF出嚟。
講真邊有咁多英雄救美呀，就算有我都唔夠薑去挺身而出。
「Miss你......小息嗰陣有冇嘢？」
之後捱到放學，我又去咗搵Miss So問英文，我趁實驗室得我哋兩個，靜靜雞問。
雖然冇去到幫佢，但係我一樣會關心佢，驚佢蝕底俾啲學生嘅。
「小息嗰陣做咩？」
「我見你俾幾個低Form捉住嘛。」
「啊！原來你望到嘅！」Miss So突然神經緊張，嬲嬲哋話我：「你衰呀你，見到都唔幫我！」
聽到佢噉講，搞到我即刻有啲內疚，原來佢望到我、甚至可能期望過我去幫佢。
「唔、唔係......」我見佢好似真係唔開心，即刻幫自己解釋：「我、我本身以為訓導室啲阿Sir實、實聽到嘛......」
「唔理呀，總之你就係冇幫我！」Miss So蹺起雙手，眼神充滿無奈：「枉我平時對你咁好。」
「Sor、Sorry囉......下次再俾我見到實、實會幫你。」
「下次仲等你幫就死得人多啦。」
「班友仔成、成日都係噉㗎......？」
我見Miss So唔領情，唯有試吓轉移話題。
「成日冇大冇細囉。」佢聽到我問起，又有意欲想呻吓：「你喝佢哋都會停嘅，但你唔惡就好容易當你冇到。」
「噉你對佢哋就要惡啲喇，呢、呢啲人唔寵得......」一諗到Miss So仲要教佢哋Oral，好自然驚班僆仔平時上堂都會掂佢。
「我唔想成日咁惡呀嘛。」
「因材施教呀......佢哋知分寸你咪可以寬容囉，如果唔係就要惡啲先治到班人㗎。」
到我講完之後，先發覺自己啲語氣越講越重。
可能係因為我唔夠贍去保護佢，所以希望佢起碼識保護自己。原本我以為Miss So會扯返去我冇幫佢手嗰度，點知佢好似同我對調咗身份，好順從噉認低威。
「其、其實我都係關心你嘅意思......」
我見Miss So扁扁哋嘴，驚佢誤會我喺話緊佢。
「兩位！咁開心傾緊咩呀。」
突然間，有把輕佻嘅聲喺門口傳過嚟。
我同Miss So同一時間望過去，發現又係鄭Sir。
坦白講，Miss So宜家個樣邊忽似開心呀。
唔知係因為俾今朝FF嘅事潛移默化，定因為俾佢阻住我同Miss So傾偈，我忽然有種對鄭Sir不滿嘅感覺。
我見到佢仲咁厚皮行過嚟，忍唔住講幾句等佢知難而退：「冇呀，Miss幫我補緊英文啫。」
「係呀，鄭Sir你咁晏都未走咩？」Miss So若無其事插嘴，睇落冇諗住講返啱啱啲嘢。
「啱啱做晒啲嘢，經過咪八啩吓你收工未啫。」
「仲差一Part呀，你走先啦。」
Miss So應該冇同鄭Sir提起過我，所以呢刻佢哋講嘢仲有啲婉轉。尤其鄭Sir啲意圖其實幾明顯，不過佢會包裝到好似同事互相關心噉。
當鄭Sir依然賴死唔走，係要喺到聊Miss So吹多幾句水，我就知道自己嗰啲唔係偏見，而係呢條友確實好不知廉恥。
好彩Miss So係專業嘅老師，傾多幾句之後佢見唔對路，終於肯趕走個鄭Sir、繼續同我研究埋淨低嗰Part。
我冇將心入面嘅不滿講畀佢聽，始終鄭Sir係佢男朋友，冇謂要Miss So夾喺中間難做。或者好似我今朝所講，既然我選擇咗留喺呢個位置，情況再差我都只可以硬食。
受到繁忙學業嘅摧殘，時間唔經唔覺過咗兩個月。
每日面對住功課、補課、練習接連不斷，我哋學生嘅心情都變到好矛盾。一方面想日子快啲過，等自己唔使再受學業折磨，另一方面時間過得越快，就代表中學最後嘅時光所剩無幾、Dse亦會正式蒞臨。
呢段時間，好容易令人越嚟越沮喪同埋迷失。
「唉，好耐冇踢過波喇。」
「鬼得閒踢咩，啲臭雞日日都畀咁多嘢我哋做。」
我同雞豪因為要等阿烽同木村補課，所以坐喺操場吹水消磨時間。
講起上嚟，我哋以前一到小息同Lunch時間，就會同埋隔離班一齊落草地踢波。不過去到中五之後大家越嚟越忙，唔係湊唔夠人就唔得閒踢，搞到有時只可以靠打機嚟止吓腳癮。
「不如嗌定佢哋星期五Lunch踢波啦。」
「嗌吓囉，不過仲要睇埋A班同C班啲人呢，尤其是A班啲學霸成日都話要溫書。」
「使乜理佢哋呀，只要我哋圍內Ok，再去同啲低Form踢都掂。」
「都唔係咁易㗎，阿烽條撚樣呢期成日話要操數。」
「只要木村Ok，到時我哋三個咪直接夾佢落去。」雞豪吓吓咁掃興，搞到我忍唔住要行開吓抖抖氣：「我去買嘢飲先，你飲唔飲嘢？」
「蘋果綠啦。」
雞豪講嗰啲嘢其實冇錯，可能因為忠言逆耳，所以我先咁唔想聽到。有時見我哋同一間學校都咁難約踢波，唔知畢業出嚟做嘢之後，會唔會好似宜家噉各有各忙，從此就各散東西。
「唔該，要包菊花茶呀。」
本來我諗住畀完錢就走，但係見把聲咁熟，忍唔住擰轉頭望吓乜水。
點知Miss So已經笑住望向我，睇嚟一早估到我會望過去。
「仲未走咩，男班長？」
「係呀，要等埋林兆烽補課。」
由於冇任何調動，所以我哋今年啲崗位同上年一樣，繼續由我嚟做班長。
我見咁難得撞到Miss So，忍唔住同佢傾多幾句：「你呢？唔使同我補英文仲唔早啲走？」
「要開會呀嘛。」
佢同我行埋一邊，各自拮起包檸檬茶同菊花茶嚟飲。
「噉......鄭、鄭Sir唔等埋你一齊收工？」我見周圍冇人，大膽噉同Miss So講起佢。
「冇呀，佢今日有嘢做要走先。」
Yes！！！！
雖然Miss So好似有閃過一絲失落，但係起碼條友唔會再突然出現，打斷我哋美好嘅時光。
「係呢，你係咪踢開波㗎？」佢醒起某啲嘢，突然開口問我。
「吓，做、做咩噉問。」
「你答咗我先啦。」
「你當係囉。」
Miss So懶係神神秘秘，喺佢平時用嚟裝書嘅手袋入面拎咗張紙出嚟。
我望清楚啲字，發現係寫住「中六級班際足球畢業盃」嘅報名表格。
「啱啱開會派㗎，本身諗住聽朝再同你哋講，不過我記得你中二都有份踢班際，所以宜家畀咗你先。」
我接住張報名表格，諗起中二嗰陣嘅比賽。
「我記得嗰陣班際除咗足球之外，我哋籃球同排球都贏晒㗎。」
果然佢同我諗緊同一樣嘢，當年我哋班陣容幾強，喺足球、籃球、排球方面都有好幾個校隊喺度，而我嗰陣啱啱先接觸足球，所以主要係踢後備。
可惜踢波方面，最叻嗰幾個同學一樣係打開前鋒，喺攻強守弱之下，我哋最後輸咗俾擅長體育嘅E班。
宜家諗返起，呢單可以算係中二唯一嘅遺憾。
「老、老啦......宜家好難有後生嗰陣咁、咁好精力。」我望住張報名表，無奈噉講。
對比起中二美好嘅一年，其實我哋上年中五班際係三樣輸晒。
「事在人為㗎啫。」
Miss So瞇起雙眼，笑住問我：「最後一年會唔會氹吓我開心呢？」
最近俾學業折磨咗咁耐，我都好耐冇欣賞過眼前呢個笑容。
「盡、盡吓人事囉。」始終冇乜信心，所以我有啲猶豫：「但係藍球排球就幫你唔到......」
「真係㗎？」
Miss So突然兩眼發光，哄到好近。
我尷尬迴避視線，感覺到自己開始面紅：「盡力㗎咋，唔、唔包一定得。」
「嘻嘻，有你呢句就得啦。」佢拉返開距離，望向遠處感嘆：「最緊要有盡力，唔好比自己後悔。」
「但係噉樣好、好似唔夠動力。」我靈機一觸，諗住獅子開大口：「不如我哋約定......如果我贏到個畢業盃，你、你就要同我做一樣嘢？」
「要做咩嘢先。」
「呃......同、同我睇套戲？」
「好呀，噉你要畀多啲心機喇喎。」
其實我本來只係求其講吓，冇諗過Miss So咁快應承。早知佢咁順攤，就唔揀啲咩食飯睇戲，應該揀啲更有價值嘅嘢嚟做！
不過Miss So既然肯應承，我都無謂強求太多，盡力捧隻盃返嚟再算。始終可以同佢單獨出街，已經係個難得嘅機會。
返到去操場，我見到有個女仔喺我哋張檯嗰邊行過，而雞豪就擺咗個厭棄嘅表情出嚟。
「搞乜鬼呀你，人哋路過都係臭雞呀？」望到呢個情境，我唔知點解好想笑吓佢。
「你搞乜撚就真，買枝嘢飲買成幾個字。」
佢一手接過我枝嘢飲，另一隻手畀返七個半我。
「啱啱撞到Miss So，佢嗌我幫佢搞呢樣嘢。」我事不宜遲，拎張報名表出嚟畀佢睇。
呢個時候阿烽同木村咁啱返到嚟，可以等我一次過拉晒佢哋入隊。
「中學最後一年班際，冇理由唔報啦。」
話口未完，我已經開始將佢哋個名寫落去。
「報咪報......不過我哋上年先吞人三蛋咋喎。」
「咪係，上年我仲俾人撞到仆街添呀。」
「啱呀，今年我哋都好大機會陪跑。」
佢哋三個各自表態，似乎同樣對上年俾人大炒有啲陰影。
但係今年唔同喇，今年贏咗冠軍可以同Miss So睇戲！！！（我）
「啪！！」
我拍一拍檯，吸引佢哋將所有焦點放落我度。
「冇錯，我哋上年的確俾人撳住嚟打......」我握實拳頭，希望可以感染佢哋：「但係做男人最緊要能屈能伸！今年係最後一年，點可以俾自己中學生涯未贏過第一就畢業！」
「只有盡咗力，先唔會後悔。」
我引用Miss So講嘅嘢，滿腔熱血噉望實佢哋。
其實我講講吓都有啲尷尬，覺得自己好似太誇張。
點知由阿烽開始，木村、雞豪陸續伸出拳頭同我圍埋一齊。佢哋眼神堅定，流露出一種從未見過嘅決心。
就算係考Dse，因為讀書始終唔係興趣，所以佢哋好難會好似宜家咁堅決。相反踢波係我哋嘅興趣，而每一個踢開波嘅人心入面總會有個冠軍夢，想用一個冠軍去紀念自己喺球場付出過嘅汗水、同朋友一齊灑過嘅熱血。
「利、利申返先，中二嗰陣我俾人拉咗去班際排球湊人數，所以已經贏過冠軍。」木村一路講一路伸出拳頭。
「收嗲啦！」
我哋其餘三個人異口同聲，阻止佢繼續掃興。
「總之今次個畢業盃，一定係6B班嘅囊中之物！」