【愛情】 我同女仔傾偈就會肚痛: 第二章
做咗班長之後，進展冇我想象中咁順利，反而有啲中伏嘅感覺。
事實上，我的確係多咗機會同Miss So接觸，有時仲會單獨幫佢去搬簿添。只係更多時候，我哋之間仲會有女班長、英文科長、或者係其他同學，要同佢拉近距離真係唔容易。
就算有機會畀我哋獨處，我通常已經好緊張，加上自己又冇乜同女仔傾偈嘅經驗，搞到啲話題都係普普通通、成效不大。
仲未計做咗班長之後，個個老師都會搵你幫手，所以我除咗幫Miss So搬簿之外，仲要幫埋中文科、數學科同埋通識科老師。
然後有時老師唔喺度，某啲訓導老師經過見我哋班房咁嘈，又會叫班長出嚟維持秩序，甚至班務嗰啲立雜嘢，好多時班長都係俾人嗌出去。
簡單嚟講，我未搞得掂同Miss So嘅關係，就已經俾其他嘢煩到死。
「男班長，唔該你陣間去簿櫃拎返啲作業派畀佢哋呀。」陳Sir臨落堂嗰陣吩咐我。
男班長呢個名，除非由Miss So把口嗌出嚟，如果唔係對我嚟講只係個折磨。
「好呀。」可惜禮貌上，我唔可以拒絕老師嘅要求。
如是者，我又要浪費五至十分鐘小息時間，去幫陳Sir派返啲作業。
唉，明明今日冇食到早餐，仲諗住小息去買啲嘢食頂一頂先。
當我諗住喺陳Sir簿櫃搵返我哋班啲作業嗰陣，Miss So啱啱好喺教員室行出嚟。
唔知係咪因為佢見我望到佢，所以特登停低聊我傾偈：「咦，幫老師搬嘢呀？」
「係呀，陳Sir嗌我幫手。」
其實我想講嘅係，點解陳Sir唔拎埋啲作業上堂派，而係要我小息過嚟拎去派！
「小息都肯嚟，幾乖呀！」Miss So笑到兩眼瞇起，同我分享：「啲老師成日讚你，話你好幫得手又唔會托老師手肘。」
「哈哈...係咩，應、應份嘅......」噉樣俾佢讚一讚，我條氣即刻順返晒，慶幸陳Sir有搵我幫手。
「噉你加油啦啵，我行先喇。」
Miss So嚟得快亦走得快，雖然我仲想同佢傾多陣，但實在唔知點開口好。
喺返去班房嘅路上，我見到Miss So喺某間班房門外，同一班學生好開心噉傾緊偈。
佢笑到見牙唔見眼，令我又冇意中對嗰班學生感到羨慕，明明我同Miss So嘅相處時間應該仲多過佢哋，點解佢哋會做到啲我做唔到嘅嘢？
定其實Miss So心底裏唔太鍾意我?可能佢覺得我太煩，或者講嘢一舊舊太奇怪，所以冇咩意欲想同我傾多啲偈。
不過又唔係呀，明明佢成日會笑住對我，又會間唔時走嚟聊我傾偈，斷估對我印象都唔差，應該係我亂諗啫。
唔掂。
噉樣落去我同中一中二嗰陣咪冇分別？充其量只係個讀書唔錯、樂於幫助老師嘅學生，對拉近同Miss So之間嘅距離就一啲幫助都冇。
唔通真係要搵救兵？
返到班房派完啲作業，我坐低喺自己個位度諗，究竟應該搵邊啲人嚟幫手。
照道理，正常係應該搵自己啲朋友嚟出謀獻策，問題係我鍾意嘅人係Miss So，坦白同佢哋講又好似好奇怪，分分鐘會俾佢哋當我係異類。
加上我哋作為同一班毒撚圈子，每個人一樣係毫無戀愛經驗，莫講話要請教點樣同異性相處得好啲，我諗佢哋本身都好想知呢樣問題點解決。
如此一嚟，睇怕好難期望佢哋會有咩高見。
唉，明明平時睇開嗰啲愛情作品入面，啲主角身邊總會有個經驗豐富、縱橫情場嘅朋友獻計，偏偏我個人生就要咁苦，同女仔傾偈好易肚痛之餘、身邊只係得啲毒撚朋友。
如果男追女係隔層山，我宜家應該係隔咗層喜馬拉雅山。
冇辦法之下，我唯有觀察吓我嗰班啲男女同學。自從調咗位之後我嘅位置喺正角落，周圍都冇乜女同學，要數到最近已經係坐喺我前面隔兩個位。呢個距離我完全聽唔到佢哋實際講緊啲咩，只能夠望吓有冇啲咩微細動作。
睇咗成個下畫堂，大約只係聽到佢哋細聲講大聲笑，女仔不時會打吓個男仔，而男仔又會整蠱返對方，得閒搞吓佢條馬尾。
正常見到呢種狀況，就算佢哋冇嘢，其他人都會先入為主，覺得佢哋兩個對對方互有好感，或者係因為呢啲行為，令人睇落好似一對打情罵俏嘅小情侶噉。
唔通肢體接觸會係個加分位？
但係無啦啦走去掂人，簡直十足十成個癡漢，仲要唔好彩有咩誤會，分分鐘直頭俾人當係非禮。
一路糾結到放學、甚至返到屋企，我依然苦無對策。
窮途末路，唯有試吓啲睇落唔Work嘅方法，話唔定會有意外收獲。
我打開手機，試吓喺我個毒撚Group度攞意見：
「我有個friend問我點樣同女仔傾多啲計。」
我包裝吓自己個問題，噉樣佢哋就唔知我同Miss So啲嘢。
阿烽：
「你的朋友就是你？」
佢都算係幾醒，好彩我早有準備，隱藏咗最重要嗰Part。
雞豪：
「雞，全部都係雞。」
至於雞豪，一早都估到佢會覆啲類似嘅嘢，所以咁多個人入面我對佢係最冇期望。
「不要暗戀，去強姦。」
講呢句嘢嘅嗰個人叫木村，大概係群得雞豪多，所以講嘢開始黐黐哋線。其實我本身幾期待佢啲意見，因為佢係我哋咁多個人入面，曾經最有機會拍拖嗰個。
「唉。」
望住啲冇參考價值嘅回覆，我嘆咗口氣就直接熄咗個螢幕。
「究竟點先可以同Miss So close啲呢......？」我望住天花板，開始自言自語。
一個人獨處嗰陣，一個唔覺意就會將心入面嘅說話講咗出嚟。
「叮——」手機又再響起提示聲。
其實我本身唔想拎嚟睇，因為大約估到係毒撚Group又講無謂嘢，不過最尾都係習慣成自然，手機一響就拎嚟睇吓。
毒撚除咗毒撚之外，基本上係冇人搵的。
「Hi～你呢排點呀？」
我望住螢幕上面嘅Message，有啲意外。
搵我嘅呢個人，係一個女仔嚟。
可能呢刻你會好好奇，點解我呢啲人會識到個女仔，佢仲會主動嚟搵我。而嚴格嚟講，Claire姐同一般女仔唔同，因為我同佢係上網打機識嘅，我哋之間亦僅限於網絡上面。
由於佢係個努力讀書嘅學生，所以我哋通常係暑假先會聯絡得密啲，平時返學日子只會間中傾吓。加上我呢排做咗班長又多嘢煩，搞到我都唔記得可以搵佢做救兵。
如果問返個女仔，啲意見可能仲有效，畢竟只有女人先會明女人諗啲咩。
「今年做咗班長lol」
我即刻拎起手機，同Claire姐互相交待吓近況。唔知係咪因為隔住咗個Mon，同佢溝通唔會有咩肚痛問題，有時感覺仲幾好傾添。或者係因為網上少啲顧忌、唔使理其他人目光、又唔會影響到現實嘅自己，所以講嘢都放啲。
「咁大膽？受咗咩剌激XD」
「上到中五係時候要改變下55」
「唔似你喎」
「好啦其實係同一個女仔有關」
「haha個女仔係女班長？」
就係噉，我開始將Miss So嘅嘢講畀佢聽，由最初見面、去到最近佢再做返我班主任。
「Wa～咁你都好長情」
「一般啦，其實同佢連熟都稱唔上」
由中一講到中五，唔經唔覺我同佢講咗成幾粒鐘，甚至一路食飯一路拎住個手機喺度撳。可能因為女人對呢啲是非嘢特別有興趣，所以佢越講越投入，完全唔想停噉。
言談之間，Claire姐竟然出奇哋有啲類似嘅經驗。佢話佢曾經試過對一個數學阿Sir有好感，覺得自己好似鍾意咗佢，又會為咗接近佢多啲，特登報名參加由嗰位阿Sir負責嘅學會。
聽完佢噉講，我突然覺得有人明白自己真係好。
「不過冇你會呷醋咁犀利」
「唔係呷醋啦＝＝葡萄姐」
「車，咪差唔多」
「咁你有冇d錦囊妙計益下我」
講咗咁耐，我差啲唔記得要入正題。
Claire隔咗一陣冇講嘢，然後再覆：
「um」
「我覺得都係投其所好啦，講下d興趣，鍾意聽咩歌睇咩戲」
「但係男仔係要主動啲既」
佢分享完之後，我哋暫時抖一抖冇再傾落去。畢竟Claire今年其實讀緊中六，要應付Dse已經好唔得閒，啱啱純粹當係偷懶Take個Break噉。
佢最尾分享嗰啲意見，坦白講我唔太肯定係有用，但係起碼叫有個方向，等我唔使原地踏步。
第二日返學，我由平時正正常常噉望，變到用心觀察Miss So一舉一動，希望可以從中得知一啲有用嘅資訊。
可惜我始終要上堂，唔能夠全天候噉望住Miss So，加上小息、午飯嗰啲時間又唔係成日見到佢，變相只係見到佢上堂教書、鬧人好大聲、仲有小息同學生傾偈......可以話對我完全冇幫助。
最後我唯有趁午飯時間，偷偷地用手機上Miss So IG望吓。
喺宜家呢個年代，要了解一個人基本上係由社交平台入手。
放假去過邊度、食過啲咩、收過啲咩禮物等等，通通俾自己紀錄晒喺度，然後任由其他人翻閱。
可能因為身份有別，Miss So個IG上面最多嘅始終係同學生有關、或者係同朋友合照，其次係啲抒情Post，真係有關喜好嘅只係佔小部份。
不過喺社交平台嘅威力下，總算俾我發現某幾個學生，同樣送過怪獸公司隻毛毛畀Miss So。照道理應該係因為Miss So鍾意呢隻嘢，所以先咁多人送畀佢。另外就係佢呢一兩年，去過陳奕迅同林宥嘉演唱會，斷估應該係特別鍾意呢兩個歌手。
本身陳奕迅都還好，但係林宥嘉啲歌我真係完全未聽過，尤其我本身唔係個成日聽歌嘅人。只係為咗Miss So，點都要search吓佢哋啲歌先得。
之後嗰幾個禮拜，我的確係經常沉浸喺佢哋啲歌度，嗰啲咩「說謊」、「浪費」、「落花流水」，就嚟聽到全部識背，甚至由「流水很清楚 惜花這個責任」聽到去「條女很清楚 收兵好過嫁人」。
問題係，我完全唔知點樣套用落去同Miss So嘅對話入面。
冇理由突然間問人鍾唔鍾意聽林宥嘉、陳奕迅？感覺好似好奇怪。
喺Miss So面前唱佢哋啲歌？我又冇咁厚面皮。
唉，唔通搞完一大輪最尾得個桔？
「喂，做咩呆咗噉呀你。」
Miss So突然喺我面前揮手。
諗得太入神，差啲唔記得我宜家係去緊幫佢搬簿。難得有個獨處機會，偏偏我就唔識點樣去利用。
「冇...冇呀。」
「仲話冇！啱啱上堂先見你喺度發白日夢，係咪琴晚打機打通宵呀？」Miss So蹺起雙手，有啲不滿噉話我。
我同啲朋友平時上堂會傾吓打機啲嘢，所以Miss So行過嗰陣，自然會知我成日打機。
「冤枉呀，我、我喺度諗嘢啫。」
「噉你上堂諗緊啲咩嘢？」Miss So睇落唔信我，對我窮追猛打。
「呃、諗緊......」
突然俾佢問一問，我一時三刻唔知點答好，就算求其答一樣嘢，都會俾佢話我唔專心上堂。
睇嚟要解圍......都係要厚面皮啲。
「其實......」我吞一吞口水，細細聲講：
「我諗緊你呀。」
Miss So隨即兩頰泛紅，佢視線左右飄忽、唔知望邊度個樣極其可愛。
「諗...諗我做咩......」
見佢心如鹿撞、兩隻食指交纏打圈，我知自己成功了。
傻啦，點會夠薑噉答，我FF吓啫。
Miss So見我答唔出自己諗緊咩，搖頭嘆氣：「唉，仲唔係講大話。」
面對瀕臨俾佢誤解，我腦入面忽然閃過一個念頭，然後又諗起Claire姐講過嘅「男仔要主動啲」。
雖然我仲未實踐個念頭出嚟，個肚已經忍唔住有啲痛，但係此時此刻，確實係個好機會大膽啲、主動啲。
我抖一大啖氣，做好準備。
始終我唔係啲厚面皮嘅人，於是我望向走廊外面，用Miss So勉強會聽到嘅聲量哼唱：「我沒有說謊......」
我感覺到Miss So呆咗一呆，視線望向我呢邊，所以哼埋下一句：「我哪有說謊～」
唔知係咪因為呢排日聽夜聽，所以當Miss So話我講大話嗰陣，好自然諗到可以噉覆。
「噗哧......」佢掩嘴失笑，指正我：「第二句係何必說謊呀，男班長......」
明明唱錯咗係幾柒，不過呢一刻見Miss So笑得咁開心，我個心入面反而有啲滿足，感覺係第一次氹到佢笑。
「好熟噉喎你......你、你好鍾意聽佢？」難得有個切入點，我特登明知故問。
點知Miss So個答案有啲令我出乎意料：「少少啦，今年去過佢個演唱會，都幾好聽。」
聽佢反應，佢又未算係好鍾意好鍾意嗰種。
「噉你最鍾意邊個歌手？」我繼續追問，起碼要搵到個明確目標，知道Miss So有咩喜好。
「吓，多數咩都聽啲㗎喎，五月天呀、陳奕迅囉。」
Miss So喺簿櫃拎出一疊補充同作業，我同佢一人拎一半。
佢噉講嘅話，即係冇特別鍾情某一位歌手，亦代表喺音樂方面著手已經唔Work，而我呢幾個禮拜聽咗咁多歌都只係嘥心機。
諗到呢度，我不自覺有啲灰，靜靜哋搬簿冇再講嘢。
「你呢？」
「吓？」
我幾乎停咗喺原地望住Miss So。
「喂，唔好諗住揼波鐘呀，仲要上堂㗎。」佢因為冇手嘅關係，唯有用膊頭推我繼續向前行。
「你啱啱問我咩話？」
「咪問你平時聽開啲咩。」
呢刻我感覺到自己先係心如鹿撞嗰個，完全冇諗過Miss So會問返我。
「呃...呢排我聽開......」最弊我冇理由話自己聽開動漫或者粵語改編歌，斷估佢都唔知係咩嚟。
為咗唔好令自己拖太耐會越嚟越肚痛，我求其up個為佢而聽嘅歌手：「呢、呢排聽開陳奕迅...幾、幾鍾意佢首歲月如歌......」
「識嘢喎！我都好鍾意嗰首！」Miss So興奮噉回應我。
唔知係因為佢個笑容，定係因為我哋咁啱鍾意同一隻歌，我個心忽然有種甜嘅感覺。
感覺......我好似拉近咗小小同Miss So嘅距離。