【愛情】 我同女仔傾偈就會肚痛: 第一章

呢種感覺......睇嚟係我又發作。

「你啱啱想講咩話？」

眼前紮住馬尾嘅女班長，同朋友打完招呼之後擰轉頭問。

「呃、呃...我想話啱啱......」

「啱啱......？」





其實，我只係想多謝佢考試嗰陣借咗枝筆比我，但係當你肚痛發作，嗰種條腸好似俾人捏住嘅情況下，可以話係連完整句子都講唔出口。

「叮叮叮叮叮叮叮——」

小息完結嘅鐘聲響起，啱啱好救我一命。

「你諗到再同我講啦，我要去幫陳Sir搬簿。」

「哦，好、好呀。」





基本上我個「好」字都未講出嚟，佢已經轉身走向教員室。

「唉。」我原地嘆氣，只能夠目送對方嘅背影。

呢個情境，我一生人已經經歷過四、五十次。好彩嘅話，啲人只會覺得我要組織吓，唔好彩嘅話，啲人直頭當我係毒撚、口吃、甚至係黐線。最終，班上周不時會傳出一啲關於我嘅花名。

「漏口仔！又食檸檬呀？」

身後突然有人一邊大叫、一邊大大力拍我屎窟，令原本因為肚痛而略有便意嘅我差啲失守。好彩小弟肚痛經驗豐富，即刻氣聚丹田、夾緊兩邊臀肉，成功阻止一場山泥傾瀉爆發。





基本上我識得嘅人入面，得阿烽鐘意噉樣拍人屎窟。

「我食檸檬嘅話你食屎添呀。」由於我痛意未散，只能夠喺言語上還擊：「諗住多謝佢借枝筆俾我啫，下下都鍾意人咩。」

阿烽係我其中一個玩得埋嘅同學，所以就算佢嗌呢個花名，我都唔算好反感。

「嗱，咁就態度正確，一齊操Fit隻左手算啦。」阿烽特登用左手搭我膊頭，同我一齊行返班房。

「你啱啱操完嚟？」我見佢喺廁所出嚟，擔心佢已經趁小息身體力行。

「冇事冇事，琴晚操完啫。」阿烽拍一拍我心口，繼續發表佢嘅宣言：「女呢啲雖然冇我哋份，但係最近聽人講單身三十年就可以變魔法師，我哋都係差十四年啫。」

「下話，但係我份人信科學多啲。」

「冇得你揀㗎喇，我哋係被選中嘅細路。」





同返自己朋友傾偈，令我心情輕鬆唔少，個肚終於冇再發作。

唔知各位有冇試過緊張到講唔到嘢，尤其喺自己鍾意嘅人面前，即使你事前演練過幾十次，到面對面開口嗰陣，個腦始終會變到一片空白，完全講唔到想講嘅嘢。

而我嘅情況更加惡劣，就算對個女仔冇好感，我一樣會覺得好緊張。偏偏當我緊張嗰陣就好易肚痛，亦造成我一同女仔講嘢就會肚痛呢個現象，某程度變咗做「毒」嘅證明。

如是者，我好早已經接受咗自己冇咩女人緣，身邊玩得埋嘅都係同性同學，我諗我全年同異性同學正常嘅對答真係十句都冇。

當然我唔係冇試過好似其他同學噉，特登講啲衰嘢博打嚟引人注意......嗰陣應該係中一嘅時候。

「梗係醒喇，唔通好似你咁咩。」

我強忍腸胃傳嚟嘅陣痛，把握機會恥笑對方。





「咩呀，你夠膽講多次！」女同學掩嘴大笑，另一手準備拍我背脊。

到目前嚟講都非常成功，我覺得只要打鬧下等個氣氛輕鬆啲，話唔定就唔會肚痛。加上個女同學其實笑得幾靚，我諗捱住肚痛俾佢打一下都值得。

「啪！！！！！！！！！！！」

點知個女仔睇落弱質纖纖，打起人上嚟竟然成隻牛咁大力，我直頭連啲內臟都俾佢震傷埋，結果個背隻痛足成日，自此再冇主動去搵女仔講嘢。

「喂，做咩呆咗咁。」

阿烽拍一拍我背隻，同我示意道別：「我過隔離上地理，陣間再傾啦。」

「嗯。」

我揮手回應，走入自己所屬嘅班房。





或者好似阿烽噉講，我哋真係被選中，下半世只可以做個左手特別強壯嘅魔法師。

但係有個女仔，我一直好想自然噉同佢傾偈。