隨心所慾 Go with the blow: 第一章——開端
首先，想同各位講一句：如有雷同，請勿相認，安靜睇故就得。我叫阿臣，今年大學一年級生。過去十九年都係住屋邨，入到大學之後好彩住到宿舍，叫做有翻少少有趣嘅生活。不過始終成日同班Hallmate飲飲食食，銀行戶口好快見底。最近不斷喺到睇吓有咩Part time工翻，不過似乎經濟環境仲係好差，都無乜公司請人。
今日我睇睇吓IG，突然彈咗一個招聘廣告「誠徵 兼職私人助理」出黎。好奇心驅使之下，我隨手就禁入去睇下。個Post嘅介紹係咁：「兼職私人助理，時間彈性，主要在晚上工作。工作內容包括駕駛私家車，或需要簡單整理文件。正當工作，必須有駕駛執照，大學生優先。有意請DM個人履歷，附帶三個月內證件照。」
雖然覺得咩私人助理好似好誇張，自己未必勝任。不過見到啲要求自己都符合，睇在錢嘅份上不妨一試。隨手將份CV DM俾個IG account，問埋點樣面試，跟住我就出咗pantry玩。差不多凌晨一點，望望部手機，個IG account竟然已經覆咗可以安排後日面試。希望一切順利啦，最近成日陪班人出去飲酒，真係就黎破產。
之後嘅一切都異常地順利，我喺一棟高級商業大廈樓下嘅咖啡店同一個叫做阿穎嘅女仔面試。阿穎睇上去好似大學畢業嘅靚妹，穿著打扮都有啲港女韓風。白白滑滑，身材唔差，算係我嗰type。佢先係簡單咁介紹份工嘅實際工作，然後了解吓我可以工作嘅時間，面試就差唔多結束。
阿穎問：「咁就差唔多喇，我覺得你都幾適合份工。時間基本上fit到我老細。同埋你高高大大咁，都令人幾有安全感。係呢，你有無咩問題想問啊？」
我一早都諗好：「想問下其實你老細點解無考慮請個全職司機？因為其實個司機隨叫隨到應該好過每星期同我夾時間。同埋，請問你地公司主要係做咩類型嘅金融呢？」
「Annie佢始終唔鍾意有個人跟出跟入啊，同埋佢好Enjoy同年輕人相處，我interview嗰陣佢都係咁同我講嘅。佢最近真係好忙，所以先叫我幫手見下你。至於我地公司實際上嘅業務，大概就係由外國入貨，然後做代理商銷售。你有興趣了解嘅話之後有機會我再詳細介紹啦！放心啦，應該都無乜文件要你幫手嘅，有咩你隨時whatsapp問我都得！」
阿穎話應該好快有消息，揮揮手埋咗單就上翻樓上。我漫無目的咁喺條街道行下，腦海入面不斷浮現阿穎個對白滑嘅長腿，條短裙個長度曖昧到不得了。啊，如果真係請咗我，我要唔要試下溝佢好呢？