【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 老千最叻搵老襯

220k釋出

我望一望，隻眼又即刻突一突。
我：「你哋無嘢呀？廿五頭？諗清楚未呀…」
鮑魚，喺中式餐枱上面可以係一場戰爭，隻鮑有幾大，係乜品種用乜方法煮，都係一場飯局入面嘅地位指標；差兩頭可能無乜人感覺到，但價格就可以相差三四成，曾經見過阿媽set菜單，客人嗰粒鮑可以同自己員工粒鮑唔同，就知道呢件事可以幾麻煩；一粒廿五頭，呢度盛惠680蚊，你哋咁嗌法，食完重使食其他嘢嘅？
豪：「你咁緊張做乜呀！睇清楚先啦，同埋拆餐㗎，無你想像中咁豪。」
於是我再認真睇睇，咦，又係喎，廿五頭鮑六隻，即係唔係一人一隻，想點？攞嚟猜，贏咗先有得食？定係每人share半隻嚟食？唔使咁煩啦，慶功宴吖嘛，嗌兩隻十八頭畀我同詩敏食咪得囉，你哋食乜鬼啫，睇你哋個樣都係食荷葉飯大㗎啦…六隻鮑魚，即係六個餐？其實呢啲酒家，只要你重係肯使錢唔係剩係嚟食碟炒飯嘅話，拆餐，鴛鴦餐，加加減減都係好正常嘅一件事，估唔到兩隻癲佬傻唔晒之餘個經理又肯同佢哋癲，唔怪之得要謦咁耐餐單啦…
我再睇，原條北海道遼參扣鵝掌乘七…乜咁鬼刁鑽㗎，個湯就係蟹肉竹笙花膠，醒目喎，知道呢個價食翅食唔到啲乜好嘢，與其飲碗紅燒雞湯翅碎，不如食下落到肚嘅蟹肉同花膠仔好過，重有翡翠油泡生劏班球，脆皮雞，睇怕呢啲就係拆餐嘅餸喇；另外…百花椒鹽吊片，炸蝦棗，燒汁脆炸鱔球，酥炸北海道生蠔，油泡鳳尾蝦帶子，粉絲焗蟹煲，竹笙紅燒豆腐，咖喱脆皮牛腩…好嘢，真係當名店大排檔咁嗌，你哋係得嘅，重有唔少得嘅當然係兩三碟炒粉麪飯，外加喺跟餐嗰幾pack荷葉飯之上。
屈指一算，佢哋咁食法又的確唔會太貴嘅，感覺上似係去大排檔喪嗌再加幾粒鮑魚幾條海參做前菜，富豪主菜變前菜，我都戥嗰幾粒鮑陰功；但我又好開心喎，平時同父母嚟呢啲地方食幾可食到椒鹽吊片同牛腩煲，今次可以話係機會難得，一嘗名店嘅家常小菜有幾架勢。
但…嗌咁多食唔食得晒㗎，雖則肥豪同傻強一個可以頂到兩三個人，咦，咁樣好似有個問題喎…


我：「小魔女，妳哋咁樣嚟食好蝕㗎喎…」
「吓，點解會蝕呀？」
我：「妳哋睇到啦，呢兩個師兄一陣實喪食咁款，妳哋食唔到幾多㗎咋喎。」
旎：「唔使擔心喎，你又唔係未見過我食buffet。」
我：「係啫，但每人夾一份錢，嗰兩隻嘢肯定食兩份都唔止啦。」
「唔會呀，頭先佢哋話今晚有免費大餐我哋先嚟㗎咋。」魔女B（因為B cup）講得好大聲，詩敏曉彤Wing都即刻望住個所謂班會活動搞手。
點得…錢都唔係最大問題，咁Wing又點計，有無人請佢，咁樣好唔公平。
我：「喂！主席！今晚條數點計呀？」
豪：「唔使咁緊張喎，呢啲嘢食完先慢慢計啦。」
我：「玩咩，你係咪包晒呢四位小妹妹伙食呀。」


豪：「嗯…呢個，小弟實在何德何能，點都要拜託一下啲比我更加富貴嘅好同學…」
你鹵味即係又搵我同一鳴開刀，學足上次船P之前又哀又篩，但今次條仆街竟然先斬後奏？我出錢請小魔女食飯無所謂，但唔係咁樣俾你擺上枱硬掘㗎囉。
我：「無可能，你係搞手，你好同我計掂佢。」
豪：「哎呀，唔好咁小氣啦，對住女仔係應該大方啲㗎嘛，斤斤計較無人鍾意㗎。」
我：「好呀，你咁講，就公平啲，全部女仔唔使夾，剩係除我哋六個男仔一人一份，得唔得？」
一鳴聽到我咁講就喺度數手指，佢應該諗住本來要出三份，而家十三除六嘅話佢點都有賺，希望阿文同Tamama唔會殺咗我啦。
強：「咁點得！你哋有拖拍，自己條女點都係你哋負責返㗎喇，點計都係應該夾多啲！」
俾佢咁樣一講，我又真係唔知點反駁好，係嘅，詩敏曉彤嗰兩份我哋就點都要出㗎啦…
豪：「嗚嗚，志華好mean呀…你估我哋真係嚟幫你擺慶功宴賀你個廢J攞個爛鬼銅牌咩…我哋…當今餐係飲你哋兩個嗰餐㗎喇！」
我：「喂…喂喂！咁講係乜意思呀？！」


強：「你知唔知道我哋等今日等咗幾耐呀？」
豪：「由睇住你個傻仔表白，到服兵役，到之後嘅…我都唔識講喇，直到今日睇到你兩個拖住手，簡直等到我哋頸長，可以媲美等富奸嘅全職獵人結局呀！」
強：「係囉…睇到你兩個喺埋一齊，我哋即刻安排豪華酒席嚟祝賀你，而你…竟然喺度質疑夾錢嘅問題，你個人渣，一定係擺喜酒玩即場拆人情嗰啲變態嚟！」
豪：「咪係，等咗三年有多喇，你知唔知我曾經嘅一個夢想，就係當你哋兩個喺埋一齊嘅時候，我搵日lunch包起晒成個大排檔，叫晒全級同學嚟一人食你一個快餐，等你咁得戚吖嗱！」
強：「喺你人生最失意嘅時候，我日日嚟陪你打波解悶，到你而家春風得意，竟然恩將仇報，鳴鳴…果然係只可以共患難而不可共富貴呀！嗚呼！噫嘻！」
頂你個肺，明明就係你夾硬捉我嚟幫你啲低form練波…但而家佢兩個七情上面喺度唱雙簧，小弟已經完全失去晒還擊之力，就連四隻小魔女都喺度睇住我笑。
豪：「你有無諗過！？如果唔係我當初猜包剪揼讓畀你輸，你邊度有機會可以表白？到時情況就會唔同晒，今日坐喺女神身邊嗰個可能就係我而唔係你呢條粉腸！」
敏：「啋！慳啲啦！你體重開方都或者有得諗下嘅！」
豪：「呀吖吖！嗚喔！我噴血喇，呢兩公婆真係mean到爆，果然係咁夾先可以喺埋一齊…竟然想將我開方變做一塊平面，實在係心腸歹毒！」
強：「豪哥！唔使驚，一陣食多啲，食窮啲現充嘅有錢仔，到時就可以square返！」
點解drama club可以唔收呢兩隻嘢…佢哋黐線程度實在有加無減，好似隨住升班而與日俱增，實力不容小覷，嚟到呢一刻我都無得唔投降。
敏：「算啦，你都係由得佢哋，食完先慢慢計啦，你唔夠佢哋兩個玩㗎喇。」
既然詩敏都開到口，我唯有坐返低，呢餐咁掯睇怕都要我同一鳴是但一個轆住卡先，希望佢兩條友唔睇僧面都睇佛面，畀面詩敏唔好真係勒索我咁玩。
豪：「一鳴，你唔好喺度笑人呀，呢餐你都實有份走唔甩㗎，唔好以為你哋兩個喺學校扮無嘢就真係無嘢呀，我哋清楚知道你哋一齊緊。」
鳴：「乜喎…邊有扮無嘢啫。」


彤：「一於唔好認，我鍾意收兵玩多啲。」
鳴：「曉彤…」點知呢個時候一鳴攬住曉彤膊頭。
鳴：「係呀，我哋係一齊咗，咁又點吖，多謝你哋嘅祝福喎。」
強：「好！有人認頭喇，今餐有兩個老襯做老細！」肥豪同傻強擊掌歡呼，慶祝奸計得逞。
豪：「太感動喇！第一次飲喜酒唔使食啲一圍3288嘅垃圾，可以吸收返啲優質嘅卡路里！」
強：「無錯，到時你哋兩pair真係擺酒唔使派帖畀我哋㗎喇，就算請我哋嚟都唔會畀人情㗎。」
而家先中六，幾時到派帖吖，真係多幻想，到時重記得你兩隻嘢先算啦。
鳴：「同你哋講明先！我哋兩個最多包晒成圍女仔，你兩條友自己搞掂呀下，我唔會出錢幫你增肥㗎！」
救命，兄弟你做乜咁大口氣，但講咗出口唔通叫佢收返咩；我同佢對望咗一下，佢都表示無奈。
詠：「呵呵，多謝喎，我嘅EX。」
鳴：「嗯…客氣啦…」
豪：「旖旎，都話水到嗰兩個老襯請妳哋幾個食大餐㗎啦，所以先話唔使擔心包喺我身上！」
強：「如果收返妳哋四位行政費，手續費，服務費，隧道費，開瓶費每人二百都OK呀可？」
旎：「呢少少錢…就食完先再計啦。」
死人頭，呢兩條PK仔真係一開始就諗住謀我哋兩個，一鳴又由得佢哋亂嚟，明明大家樂放題我包晒就係一個好好嘅選擇…


強：「呀，我有一個問題想問好耐，難得呢度咁齊人…我想問下，詩敏同曉彤妳哋上年搞乜鬼？」