【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 有女神的地方就有奧斯卡
47追稿釋出，下次為50追稿
過咗十二點，太陽伯伯越嚟越精神所以我哋都要避一避，順便上去食晏；夜晚嗰餐民宿先會提供，而呢度隔籬就有一間淨係做午餐嘅食店，所以我哋就去嗰度食嘞，菜單都係非常簡單，而且有圖，十二幅圖自己㧻一幅就得，六百到九百円不等。
結果呢，詩敏係沖繩soba，我係咖喱豬扒飯，曉彤係南蠻雞丼飯，一鳴係咖喱炸雞飯，另外嗌咗一碟章魚燒大家share；中四嘅大排檔feeling返返晒嚟，一鳴又有拖拍，我又繼續圍住詩敏轉，大家有講有笑真係好開心。
廚房入面呢就得一個老闆喺度，所以佢都要逐碟逐碟煮完再攞出嚟送上我哋枱面，嚟得呢啲郊外地方我哋都預咗，千祈唔好心急，忘記自己係一個香港人先可以喺度休閑咁享受。
首先送到上嚟係詩敏嘅沖繩soba。
我：「點呀，好唔好食呀？」
敏：「好唔錯噃，同琴日差唔多，咁唔使咁辛苦趕去食啦。」
我：「係真唔係呀？」
我潷咗羹湯加條麪放入口，真係唔錯。
之後到曉彤嘅南蠻雞，望落新鮮炸起好鬼靚；可能老闆都知道女仔食嘢慢啲，就煮佢哋嗰份先。
最後就到我同一鳴嘅咖喱飯，本來咖喱飯喺日本只係一個穩陣飽肚之選，唔會有乜期望；但，頂！潷啖咖哩入口已經有美妙嘅感覺，完全將啲連鎖CoCo，猩猩咖喱比下去，甚至好味過琴晚間丼亭，你叫我以後點去東京呀？
一間木造嘅海邊小食屋，簡約得嚟係非常舒服，佢重有個bar仔同埋土產區，喺呢度會令人悠然心生慵慵懶懶，食完飯我哋就蹺埋隻腳攤喺張木櫈上面睇啲聽唔明嘅電視，曉彤隻右髀直頭疊埋落一鳴隻腳上面，本來以為睇住兩個著比堅尼嘅靚女食飯係一件好新奇刺激嘅事，但其實呢度所有人都係差唔多咁款，bar枱重有兩個曬到古銅色嘅比堅尼美女喺度飲啤酒，估唔到我哋可以咁適應呢度嘅生活。
抖完一陣我哋又嗌咗四杯刨冰食，真係腐敗到一個點；呢種冰沙加糖漿加香料加色素嘅美妙實在係令人不能自拔，溫度適中嘅冷氣吹落我哋個身度，直頭唔想郁喺度坐到天黑為止。
浪費人生，虛度光陰，夫復何求，咁就兩點。
差唔多去到玩水上電單車嘅時間，由於我哋兩個敗家仔book咗三個鐘咁長，所以都要買定啲水喺海上面飲，再加埋啲零食嚟個海上野餐，無理由玩玩下要車自己上岸補給嘥時間㗎？然後我心諗如果喺海度尿急點算？無人就話一路飛車一路殊殊感受下relative motion啫，好歹呢度係日本，我唔想俾個教練歧視，所以都趕埋佢哋去尿尿先。
然後去到水上活動商店，個staff當然認得我哋，跟住個教練都出埋嚟，今朝話過會盡量安排一個識英文嘅教練畀我哋。
係一個女人，好高嘅女人…我諗比詩敏再高啲啲就嚟同我一樣，好fit…係見到腹肌嗰種，詩敏都叫經常做開運動，但教練嗰shape重要明顯喺佢之上，望到佢隻大髀同小腿都知俾佢踢一腳會好大鑊；全身當然係玩開水上活動嘅古銅色，淡金色嘅頭髮中間分界去到頸位橫cut，即係同龍珠入面個人造人18號差唔多款；波就無乜，重細過曉彤，上面一件plain黑色tube，好似有啲凸點，下面一個黑三角，完完全全嘅唔整色整水戰鬥先決感覺；睇落就廿幾歲咁，唔多似日本人，有啲似mix，類似夏威夷關島菲律賓嗰啲咁，靚唔靚就見仁見智。
「Can swim？」果然係識英文嘅…
咁就當然得曉彤雙手打叉say no，教練姐姐就摷咗件救生衣幫佢著，睇嚟係因為我哋有女仔所以搵返一個女教練畀我哋，著完救生衣就一齊行落去海邊，見到多咗三架水上電單車喺度。
無錯，有兩架係我哋嘅，就算幾敗家都好我哋都未至於會租到一人一架，啲水上電單車其實坐兩個人甚至三個人都得，而且我同一鳴當然想同女伴親近啲；呢樣嘢呢，我同屋企人喺泰國玩過，就算唔係自己完全操控都大概知係點嘅，我諗一鳴佢都係；我哋落水行到去架嘢度，掉晒啲雜物入去行李箱，教練就教我哋一人捉住一邊上去，因為好平衡啲，比起我玩過嘅獨木舟呢架嘢大啲又重啲，上船毫無難度，唔使幾秒我同詩敏就上咗去，而曉彤就要一鳴幫手扯上去。
我：「喂，做乜妳坐司機位㗎？」
敏：「你都應該玩唔少啦，留返畀我啦。」
詩敏係一個好動嘅女仔，當然貪玩。
我：「得唔得㗎…妳唔好畀咁多油喎，架嘢好快㗎…」就算係詩敏，女仔加車等於危險呢個概念都係不變，亦都可以應用埋落Miss Lam度…
敏：「係咪好驚我將你拋落海呢？」
我：「拋落海事小，妳撞爛架嘢我無錢賠㗎…」
敏：「少爺仔張信用卡唔夠畀咩？」
我：「呢層我都唔知…可能夠嘅…」
於是乎我就坐喺詩敏後面抱住佢條腰，真係好正，百摸不厭然後我又偷偷玩佢粒肚臍；一鳴就慘少少，曉彤坐佢後面用對波上面嘅救生衣頂住佢…忍下啦，唔識游水都無辦法，雖然呢度四個識游水嘅人加三隻船唔覺得佢有機會浸親。
開船前教練都講一次點用手把加速同倒車，轉彎就係常識嚟嘅，同埋要跟住佢唔好開得快，見到水面有石頭就要避開整個範圍，見到對頭船就要向右轉…等等等…
由於我哋玩嘅時間實在太長，所以佢會順便帶我哋喺整個慶良間群島中間遊一個圈，包括座間味島，阿嘉島，安室島等等呢啲更加難去嘅離島，大家可以想像成呢度係一個放大咗嘅香港印洲堂。
詩敏好快就熟習咗點樣操控架船，而一鳴亦都有換位畀曉彤試下駕駛，一路上我哋都開到有廿幾三十km/h，所以一個鐘多啲就已經兜完一個圈，教練見我哋幾個大細路無乜問題就放我哋喺座間味島一個無人石灘對開由得我哋自己玩。
好想考牌…好想可以同詩敏揸住架嘢周圍去…去啲荒島度深險，呢種自由嘅感覺實在係太好，亦好想試一試畀盡油睇下呢架嘢會行到幾快。
呢個時候我同一鳴攞咗我哋部潛水相機出嚟開始影相，但我哋發覺喺船上面係好難影到自己個partner，結果就變成我影曉彤，一鳴影詩敏；至於我哋兩個？算吧啦，喺我哋心目中只有靚女相先係有價值。
敏：「我想落水玩下呀，可唔可以？」
我：「無話唔得即係得囉，但妳留意我哋架船喺邊喎，唔好俾一鳴個低B仔撞到。」
敏：「我無咁蠢囉，聽到聲㗎嘛。」
然後詩敏就喺個置物箱度攞咗set浮潛用品出嚟，戴好就跳落水，游向近岸邊嘅位置，以佢嘅能力基本上我都唔會擔心佢；有個矛盾位係租水上電單車係非常之昂貴，但如果嚟到呢啲平時去唔到嘅地方都唔落水真係非常之大嘥，既然係咁…
我：「一鳴，你過嚟我架車玩啦。」
鳴：「做乜呀？我唔搞基㗎喎。」
我：「我落水搵女人呀，唔好嘥架車，你攞去同曉彤一齊兜風啦。」
跟住我就戴埋浮潛set跳落水，好快就搵到詩敏，而我就攞住相機幫佢影相，好明顯地佢又喺度搵緊海洋生物，同埋呢度真係好多好多魚游來游去，間唔中會俾佢哋撞到，喺防鯊網入面游開水嘅我其實唔多慣。
過咗一陣詩敏就有收獲，我哋叫咗曉彤過嚟。
彤：「嘩！好得意呀！」
敏：「同佢say hi啦，佢叫奧斯卡。」
我真係好佩服一個敢唔戴手套徒手捉海膽嘅女人，尤其喺水底好難控制用手指鉗住佢嘅陰力。
我：「邊係…呢隻擺到明唔同樣…」
敏：「人哋換咗衫咋嘛，我話係就係啦。」
我：「咁係囉。」乜都妳講晒㗎啦。
彤：「點解佢叫奧斯卡嘅？」佢當然大惑不解。
敏：「我都唔知喎…」
而我就喺水面度浮下浮下幫兩位玩緊奧斯卡嘅靚女影相，我好想除咗曉彤件救生衣，真係超級礙眼，明明有兩對大好嘅波波喺度…
過咗一陣，詩敏又捉咗第二隻上嚟…
我：「我知呢隻唔係湯馬士…」
敏：「曉彤妳幫呢隻改名吖。」
彤：「呀…其實點解要改名嘅？」
敏：「妳改完呢個傻仔就會記住㗎喇。」