【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 音樂日，女神 vs EX

110k釋出。

我同佢嘅課室喺一樓，操場望上去我課室喺佢嗰間嘅左邊，所以我無論要去邊出課室都一定係向右轉，我諗佢同曉彤就一定向左轉，所以基本上我同佢哋真係無乜撞過。
雖然唔可以見面，但我都會收下風嘅；曉彤十一月開始就放學去返補習社，咁都正常，因為佢上年中五都去開；最神奇係當年Wing叫一鳴一齊去佢都say no，而家竟然兩個日日放學都一齊去補習，希望唔會激死Wing姐；我就當然非常歡迎，咁我放學都可以放心去圖書館或者學校自修室溫書。
而佢兩個喺學校當然越嚟越過從甚密，但係就堅決唔承認二人嘅關係，曉彤就日日笑嘻嘻話一鳴係佢隻兵，我就唔知佢兩個心態係咪真係當做兵喇，總之一鳴肯飾演到好似隻兵咁喺曉彤隔籬轉都係好事嚟嘅，起碼我知道曉彤佢有人照顧。
至於出面啲閒言閒語就精彩咯，首先有人話曉彤係專搶人仔嘅狐狸精，搶完詩敏隻兵就搶Wing條仔，我心諗真係得啖笑；重話佢嗰朝喊得咁慘係純粹想等全世界覺得佢係受害者，我係大壞蛋，而一鳴就為咗英雄救美而同兄弟決裂…亦都有人話佢兩個專勾姐妹，兄弟嘅另一半，最鍾意著其他人舊鞋，所以好夾先喺埋一齊，重希望佢兩個永結同心唔好再出嚟拆散人…重有講法就係我由頭到尾都只係一件玩具，俾詩敏玩完就俾曉彤玩，用完即棄無價值，而一鳴佢食完Wing再食曉彤先係真正嘅情聖。
哈哈…笑下好喇…唔好認真，我都慣晒做風雲人物，而家等一鳴佢又享受下啦，詩敏換咗look之後cool咗好多，好似無乜男仔敢接近佢，就連壞話都少咗，睇嚟佢嘅做法都幾奏效；間唔中平時喺學校見到佢多數都係Wing喺佢身邊，又或者木獨到爆嘅文哥…不過完咗學界之後睇怕都唔會見到佢哋一齊。
我呢…就真係乜都唔理，理得出面個世界死；班入面都繼續有男仔當我情聖咁玩，不過相處耐咗佢哋都知我唔係嗰種人，我咪順水推舟繼續同Tiffany加埋佢啲friend做好朋友囉，反正我唔會話特別黐邊個女仔多啲，你哋要講就講飽佢；其實我覺得自己似佢哋姐妹多啲，幾個靚妹都對愛情甚至乎性都好有興趣，我又真係乜都肯同佢哋講，所以時不時會同我一齊研討；知道我早就坐懷不亂虛懷若谷，四隻衰嘢甚至會夾埋一齊整蠱我…
另外由於我專心讀書，成績係越嚟越好，兩科數學加埋物理長期考頭一二，所以無論男女都鍾意嚟問我功課考試，因為又唔怕阻到我溫書吖嘛。
唔經唔覺就到咗十二月嘅一個星期五。


一入校門就有隻細路女咁嘅東西彈嚟我面前。
旎：「喂！出大事喇！你琴日做乜唔覆我！」
我：「咦…係喎，放學返屋企瞓咗晏覺睇唔到。」
其實夜晚醒咗我係睇到嘅，不過見只係一個message我就懶得覆返佢。
旎：「頂你！你當我係乜呀！」
我：「我當妳…唔係我條女囉。」
日子有功，我好似學識天然flirt女…
旎：「去死啦！咁我唔話畀你聽乜事喇。」
我：「唔好啦，sorry呀，咁妳真係唔係我女朋友吖嘛…定妳想追我呀？」拜託千祈唔好。
旎：「你知唔知今日music day有邊個玩呀？」


我：「有邊個呀？」快啲講啦…
旎：「我琴日趕住去報補習所以都無去睇到初賽，都係聽返嚟，你啲女人有份呀！」
我：「我而家…無女人㗎，妳係想講…唔通曉彤佢又唱電燈膽？」佢暑假話過想攞第一，唔出奇…
旎：「就係唔淨止佢呀！」
我：「乜嘢話？詩敏…佢都參賽？」
旎：「定係你重收埋其他女人呀？我聽返嚟就係咁，你一陣可以洗耳恭聽喇！」
點解…到底發生乜事，曉彤我都重可以理解，但詩敏…玩music day？唔通佢哋私底下有嘢？斷估女神唔會無端端想自己參賽，雖然佢唱歌好好聽。
為免尷尬我今日喺禮堂都係同返啲男同學坐，咁我都有新識嘅男仔friend嘅，大家唔使太擔心。
「志華哥，你兩個EX對決喎！你點睇呀？」
我：「我唔知…我都係啱啱返學先聽人講。」


「佢兩個琴日唱得超好呀！其他女無得fight。」
坐低之後我收到張曲目表，我睇到呆咗…的而且確可以用決戰嚟形容…Stephy對Stephy。
女子獨唱係飯後嘅重頭好戲，朝早都係年年有，唔係中五就係中七嘅告別校園時或者梁詠琪嘅Today，又或者其他小組嘅低B話劇廣告歌咁，而我個心早就定睛望住張曲目表而唔係喺度聽歌。
放飯嗰陣嗰四隻小魔女本來想捉埋我去食飯；嗱，唔好諗咗去乜淫賤小魔女，而係Tiffany嗰四隻嘢好似小魔女DoReMi咁煩住我，有個靚女啲嘅真係有啲似瀨川音符…結果有位姐姐制止咗佢哋嘅計劃…Wing姐專登嚟搵我食飯，我無理由唔畀面佢㗎。
原來唔係得我同佢，肥豪、傻強、Tamama都喺度，都好嘅，我都想知詩敏發生乜事。
我：「係呢，Wing妳唔同詩敏食飯嘅？」
詠：「佢話要養住條氣，夾下個ear monitor，所以唔食飯喇喎。」
我：「嘩！使唔使咁認真呀？」
詠：「乜呀，呢啲常識嚟啫，飯氣攻心又點發聲呢，嗰陣我同曉彤玩玩下先食完飯唱咋嘛。」
我：「詩敏…佢係咪有啲乜嘢事？」
詠：「唔知喎，睇落一切正常。」
豪：「無特別喎，咪少咗隻傻仔兵圍住佢轉囉。」
我：「好喇好喇，唔同你嘈。」
T：「見親佢唔係專心溫書就係專心打波，好似無第三樣嘢要做。」
強：「如果知我一早同你講咗啦，而家嘅詩敏成座冰山咁，係得Wing會接近佢㗎咋。」


其實我初初識佢嗰陣咪又係冰美人咁。
我：「你哋日日對住佢，信你哋啦。」
詠：「其實你可以唔使避佢㗎，咪直接問佢囉…你睇下一鳴同曉彤兩個而家幾大方。」
我：「我諗…或者等我考埋會考先啦。」
強：「挑！你英文攞多一分就得啦，扮晒蟹。」
豪：「我警告你！唔準高分過我呀，打柒你㗎！」
我：「妖！區區廿三分，好難唔高過喎！」
豪：「頂你個肺！我就打…偷你條腸先！」
眨眼間，我碟雜扒飯少咗條腸。
我：「仆你個街！我唏！」
豪：「屌！畀返塊叉燒我！」
結果佢對筷子就喺空中夾住咗我枝叉…
T：「我食唔晒㗎…分啲畀你兩個喇…」
詠：「無眼睇你哋…讀到中六都成個細路仔咁。」
我：「我中五㗎咋！」


豪：「妳EX好好？」
詠：「係咪想我發火呀！？」
就係咁，呢餐大排檔飯局就喺混亂之中完結，有朋友喺身邊嘅感覺，實在係非常之咁美好。
飯後繼續我哋嘅music day，好快就到咗女子獨唱嘅環節，隔咗兩年睇住曉彤再次踏上呢個舞台，中間實在已經發生得太多太多嘅事…
彤：「…能承認嗎我故意當那電燈膽　他若你們完場時入替也不難　善良人埋藏著最壞的心眼　妄想一天你們會散　會選我嗎…啦啦..啦啦..啦啦..啦啦啦..」
曉彤唱嘅電燈膽，我已經唔知聽過有幾多次，不過今次真係最高水準嘅一次，尤其係嗰抽啦啦啦簡直就係出神入化，啲感情係聽到入心入肺，睇嚟佢話要攞第一真係唔係講笑，啱啱嗰三個女仔係完全唔夠佢嚟；不過，而家曉彤妳都唔係電燈膽啦，點解妳重要唱呢首歌喎…其實妳而家過得好唔好？係咪已經睇開咗？唔知…一鳴聽到又有乜感覺呢…我無嘢可以做到，只能祝你兩個開開心心。
之後嘅幾個女仔都係普普通通，睇嚟曉彤好大機會攞到女子獨唱第一名，剩返落嚟可以威脅到佢嘅人就應該只有詩敏，而詩敏咁啱係唱全日music day嘅最後一首歌。
曲目表度寫住詩敏唱嘅歌係—親朋勿友 （Solo '05），我其實之前未聽過呢首歌，更加唔知呢首歌有乜故事，只係知個歌名咁囉，後面抽乜乜05更加睇到我一頭霧水…
頭先食完飯我開電話聽過一次，坦白講我覺得電燈膽係好聽一截嘅…
詩敏終於行咗上個台度。