【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 教書教到甩尾的飛雞

月榜一釋出，夜啲再多一篇。

大概一分鐘之後，Miss Lam離開咗我嘅身體。
我嘅思緒仍然係極之紊亂，頭先身體反應唔到好似唔記得要呼吸咁，而家要不自然咁大啖嗦氣補充返啲氧落去…
呆咗咁望住眼前嘅女人，水靈嘅眼睛卻又配住一副魔女嘅笑容，對比返佢平時教書個樣實在可以用死魚眼嚟形容…睇嚟，佢完全無任何嘅不自然，就好似同學生打茄輪係一件平常事咁。
林：「做乜望到我咁實呀？心動呀？」
我：「Miss Lam…我…同妳…」實在不知所言。
林：「唔使咁上心喎，純粹見到個好男人，想惜下佢咋嘛。」
我：「我係…好男人？」
林：「乜唔係咩？定你想做壞男人？唔使太擔心，我無興趣同你玩師生戀。」


我：「哦，原來係咁。」
我扮到明白咁，其實內心仍然係小鹿亂撞，即係…成人嘅世界，見到個好對像就可以亂咁惜埋去？但呢度又唔係蘭桂坊，我哋之後又重會喺學校成日見…
師生戀，我當然有諗過，好似會有種好正嘅感覺，成熟嘅女人應該唔會好似詩敏咁日日同我玩遊戲，又唔會好似曉彤嘅性格咁刁喬扭擰；但，可能佢會當我玩具咁用完即棄？算，諗嚟都無謂，我對佢其實知之甚少，加埋佢都已經結咗婚。
我：「Miss Lam，我哋唔落車？」
林：「重咁早，出面好熱呀，想做乾蒸燒賣？」
我：「停車唔熄匙唔環保呀。」
林：「環保就唔揸車上嚟啦，你同曉彤炒一次大鑊重唔環保呀。」
我：「…」無錯，住成個月醫院浪費幾多資源…
林：「或者我喺度同你練習下最小角度無限打圈飄移？」
我：「妳識㗎？」


林：「唔識㗎，試下咪知得唔得。」
我：「係呢，妳做乜要散心？」我決定唔Q理佢。
林：「老公有外遇點算好？」點知佢咁直接了當，原來唔係學校問題…而係屋企。
我：「我…唔知。」
我自己嘅感情事都自顧不暇，你哋大人嘅世界我又點識畀意見…
林：「唔…無鬼用，唔開心。」
頂，Miss Lam妳做乜扁嘴扮細路女…
我：「我阿媽話玩車嘅都係壞男人。」
林：「哈哈，都可能係真嘅。」
我：「妳老公係咪揸Skyline㗎？」


林：「醒目得你吖，不過架舊Skyline賣咗喇，新版唔再叫Skyline，係叫GTR R35。」
我：「咁GTR同Fairlady係情侶車嚟吖嘛。」
林：「你係咪鍾意Skyline GTR？」
我：「以前係，又或者Lancer EVO V，因為四驅好易操控，馬力夠大，但後來覺得呢啲車太粗暴，無乜美感，所以轉咗口味。」
林：「咁而家你鍾意乜車？」
我：「嗯…Silvia，或者Celica…呢啲。」
其實Fairlady都好正，但費事讚佢架車。
林：「可惜Silvia無出新版吖，如果唔係我都想揸，Fairlady係淑女嘅話，Silvia就係青春辣妹。」
發夢都無諗過我會同個數學Miss喺度講車，Silvia外號飛雞，聽個名都好襯啲癲嘅靚妹。
我：「咁妳諗住同妳老公點？」
林：「我都唔知呀，佢以為我乜都唔知，我諗緊踢唔踢爆佢好？」
我：「踢爆咗會唔會好大鑊？」
林：「最多咪離婚，又有贍養費同身家分，我又唔會好似啲傻妹咁食安眠藥自殺。」
我：「妳幾時發現佢出軌㗎？」
林：「都…半年有多，本身諗住佢偷食幾次就會厭，點知就keep咗咁耐；唉，好心對住精打細算嘅數學老師偷食就小心啲啦，做女人都係蠢啲嘅比較好。」


我：「你竟然可以忍到佢咁耐…」
林：「無辦法…如果佢唔再愛我，我唔認為自己改變到佢，就算阻到佢一次偷食，都阻唔到一世。」
我：「係嘅，揸住架GTR，只要踩行油門喺直路就逢車過車，好難唔會有女自動送上門。」
林：「你呀，打機打上腦喇。」
我：「真車唔係咁嘅咩？」
林：「我識佢嗰陣，佢就係揸住架Skyline GTR R34約我出嚟玩，後來熟咗之後就買咗架Silvia S15畀我玩…但其實，佢嗰陣都有正室女朋友同玩其他女人，所以就算佢而家有外遇，我都唔會話嬲到崩潰，因為當年嘅自己就係搶人條仔嗰個；只係呢一刻嘅我唔知點自處好。」
我：「咁佢最後又會揀妳做老婆嘅？」
林：「我諗因為我識揸車掛，斷估…就唔係因為我好屌啲？」呢個Miss真係會教壞學生…
我：「佢而家又係因為玩車識到女人？」
林：「咁又唔係，個女仔係大學生嚟，之前去我老公間公司做intern，之後嘅…你都諗到啦。」
我：「佢好靚女嘅？」
林：「梗係靚啦，靚過我囉，同詩敏差唔多，而且又識打扮，時代感重啲囉。」
我：「咁又真係好難忍得住嘅…」
林：「所以我好明白，每次有新model出，就會想換新車，所以我都唔可以繼續揸返Silvia。」
我：「Fairlady都唔錯呀，行得穩定啲。」


林：「吖，車牌都未考得，你又知？」
我：「數字係唔會呃人嘅，我講得啱唔啱先。」
林：「咁Fairlady係好啲嘅，價錢都高一截，一定好過你身邊嘅S2000。」
我：「我身邊？曉彤？」
Honda S2000係一部野性難馴嘅車，出晒名特別多交通意外，但其實對比之下Silvia都差唔多，是但上網搵都可以見到出事炒車嘅新聞…我諗，S2000只可以攞嚟形容曉彤嘅啫，無可能係詩敏。
林：「你有好多架車咩？」
我：「妳覺得詩敏似乜嘢車？」
林：「佢唔似日本車喎，夾硬諗咪RX7囉。」
我：「嗯，原來係咁，又幾貼切喎。」
林：「死仔包，唔得閒同你講車呀！就嚟日落喇，快啲落車啦。」
唓，明明就係妳自己好鍾意車。
高端嘅女人，就好似跑車咁，特別難控制，雖然吸引人，但好易出事，我自問唔識揸…
換言之，旑旎呢啲就係Corolla？都未必係，有時佢都幾麻煩，至少Corolla唔會有Tiffany blue配色。
落咗車，我同Miss Lam肩並肩喺觀景台度睇日落，安靜咁睇住太陽喺西九方向沉落海底，慢慢夜幕低垂，九龍東，港島東高樓林立，華燈璀燦，呢個夜景真係非常之靚；最重要係呢度無人，唔似得山頂睇夜景成大堆人喺上面；真係估唔到，呢個咁浪漫嘅場面，第一次竟然係會獻畀我嘅數學老師…
林：「上車啦，我都差唔多喇。」


雖然唔捨得個景，但都係要走，上返車。
我：「老公催妳返屋企呀？」
林：「未啦，可能佢都同女大學生扑緊嘢。」
我：「咁妳散唔散到心呀？」
林：「我決定咗，今晚返去要同佢講清楚。」
我：「做乜咁突然…有呢個決定？」
林：「個問題喺度，始終都係要解決，我唔想有一個唔愛自己嘅男人日日喺自己身邊，就算我無所謂，都唔想迫佢對住一個唔愛嘅女人，咁樣只會一齊辛苦，如果真係要走就走啦，早走好過遲走，要走都係留唔住…可能因為見到你哋啦，本來以為曉彤乜都唔記得晒，以後就會同你一齊過得好地地，但原來一覺瞓醒返，就會發現所有嘅嘢都係夢嚟，現實就係咁殘酷，你想逃避都避唔到。」
我：「妳知道曉彤記得返晒啲嘢？」
林：「諗都諗到啦，我都係女人嚟，唔通而家嘅你會專登搞到佢咁慘咩…就算我再慘都唔會慘得過佢嘅，今晚就知結果，你祝我好運啦。」
我：「我唔覺得一個靚女大學生會比得上Miss妳喎。」
坦白講，我係覺得Miss越嚟越正，就算好似詩敏女神咁，女神只適合存在喺學校，人會大，人會變，喺大學都重可以做女神，唔通出到嚟做嘢重做女神咩？女神過咗某個年紀之後，就好容易直接升格做剩女㗎喇。
Miss Lam係一個揸跑車返學嘅黐線人妻靚女Miss，我諗喺香港都唔會搵到第二個，至於靚女大學生就通街都係啦，正常男人無理由唔識揀。
林：「我唔後生㗎喇…青春會一點一滴咁流逝，我知自己乜嘢事，唔通重要同個後生女決一死戰咁咩…我已經無呢個勇氣。」
我：「Silvia…飛雞係永恒㗎！」