【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 一生何求…
「喂，請問係咪志華？」係一把女人聲嚟。
我：「我係呀，請問妳係？」
彤媽：「我係曉彤媽咪…曉彤佢啱啱入咗醫院…」
我：「伯母！點解嘅？曉彤佢做乜呀？」
彤媽：「曉彤佢…食咗好多安眠藥…嗚…」
點…點解…我聽到之後方寸大亂…連攞緊電話隻手都喺度震埋，曉彤…點解妳要諗唔開…為咗我呢個不知所謂嘅男人…而聽筒嘅另一邊就傳嚟佢媽咪傷心嘅啜泣聲。
我：「咁…佢而家乜情況？」
彤媽：「醫生喺手術室同佢急救緊，啱啱重有心跳…」曉彤…求妳…唔好有事…我知錯。
我：「伯母，請問邊間醫院？我即刻過嚟！」
就係咁，我帶住近乎崩潰嘅心情，驚到完全諗唔到嘢，原來關乎一條人命嘅大事可以咁容易就出現喺自己嘅身邊；我兩隻眼流住淚水，火速求祈攞起件衫同條褲換好，就安靜咁離開咗屋企，我好驚俾屋企人知道，自己犯咗件咁錯嘅大事。
知道曉彤出咗事，我個心揦住揦住咁痛，平時我成日嫌佢煩，唔鍾意佢成日發脾氣，覺得佢為啲雞毛蒜皮嘅事執著係無理取鬧…好想自己一個人安安靜靜過生活；但原來當佢出咗事，我係會咁驚，咁緊張…我寧願受傷害嗰個係我，其實我心底入面重係愛佢，只不過我覺得我哋唔應該一齊。
上到的士，當個司機聽到我呢個時段要去醫院，加埋我個神色慌張嘅樣，佢隻手同腳都好似摩打咁幫㗎車上電飛我去目的地。
我唔知點算好，個人無晒方向，恐懼同怨恨佔據住我整個心靈，點解我要做啲咁蠢嘅事嚟傷害自己嘅女朋友，平時少少嘢佢都已經嬲到喊…今次我同佢講得咁直接，佢實…神啊…求下你唔好俾曉彤有事，一切嘅錯都係我做成。
最後，我都係決定通知佢。
我：『詩敏，對唔住，曉彤佢食安眠藥自殺，喺醫院急救緊。』
唔使一分鐘我部電話就響咗。
敏：「你搞乜鬼呀！如果佢有乜嘢事我唔會放過你㗎！」佢喺電話嘅另一邊傳嚟怒吼嘅聲音，而且聽得出佢喺度喊緊。
我：「對唔住…我知道。」我已經急到唔知講緊乜。
敏：「邊間醫院呀？我都過嚟啦！」
「敏？發生乜事呀…」
敏：「無嘢呀…媽咪妳瞓啦。」
唔使十分鐘我就到咗醫院，畀錢落車一枝箭咁飆咗入急症室，平時好少嚟呢啲地方，我淨係識一味橫衝直撞咁搵急症手術室喺邊，好快我就喺一條走廊度俾一個女人嗌停咗。
彤媽：「你係咪志華？」
我覺得奇怪，點解會有人知我係我嘅？但諗深一層，咁嘅鐘數有個我咁上下年紀嘅人喺度跑到趕住投胎咁，除咗我重有邊個？
我：「係我呀…曉彤媽咪？」
半夜三更收到噩耗，但醫院急症室嘅走廊係幾咁燈火通明，呢種反差感令到我更加不安。
彤媽：「嗯，我係。」
喺不安氣氛下，我同佢面面相覷，一時之間都唔知講啲乜先好。
我：「伯母，對唔住…」
呢個時候，手術室有個男人走出嚟，都幾高大下，著住街坊look一睇就知佢唔係醫護人員，佢雙眼通紅，摙緊兩個拳頭，咁佢即係…
我：「世伯，伯母，萬分抱歉，好對唔住！」
人生以嚟第一次對住人九十度鞠躬致歉…我諗如果我有個女俾個死仔包男朋友搞到自殺，我都會毫不猶豫一腳踢落佢心口上面…我已經做好咗隨時要俾人虐打一身嘅心理準備。
彤媽：「冷靜啲呀…老公。」
彤爸：「得喇…妳講咗好多次喇！」
睇嚟佢阿媽都擔心我會俾人打到變豬頭。
彤媽：「阿女暫時無生命危險，不如你返去瞓先啦，聽朝重要返工㗎。」
彤爸：「咁嘅環境妳叫我點瞓呀！」
彤媽：「你喺度急都無補於事㗎…阿女都唔會鍾意見到你咁樣。」
彤爸：「好喇好喇，我出去行下，阿女交畀妳。」
就係咁曉彤爹地行開咗，而我就逃過咗一劫，我諗佢真係好想打我一身，唔止佢…就連我自己都想打自己一鑊甘。
我：「伯母，曉彤佢而家點呀？」
彤媽：「啱啱洗咗胃，打咗中和劑，醫生話無即時生命危險，器官都無重大損傷，但係就昏迷緊，唔知道幾時先會醒…」
我：「咁我係咪可以入去睇下佢？」
彤媽：「都可以嘅…醫生行開咗去睇啲數據睇下轉佢去ICU定普通病房，呀…係喇，我有啲嘢畀你睇，不如你睇完先再入去…」
然之後曉彤媽咪喺佢手袋入面攞咗張對摺嘅信紙畀我，如果咁講…即係曉彤嘅遺書？
彤媽：「阿女應該淨係寫畀你睇㗎咋，我望咗兩眼，你當我無睇過啦。」
『志華：對唔住，你講嘅係事實，我係一個錯誤，我出賣咗我嘅好朋友，欺騙你嘅感情，用手段嚟換取我同你嘅關係，我知道我同你嘅一切已經完結唔會有彎轉，就算你話繼續當我朋友都只係可憐緊我，我好想恨你哋兩個，但我做唔出傷害你哋嘅事。
我已經乜都畀晒你，失去咗你我已經生無可戀，你唔使擔心我，我去到另一個世界一定會過得比而家好，唔會日日活受罪，而你都唔使再擔心我會煩住你，可以過返清靜嘅生活。
我知道你好驚我講好多嘢打好多字煩住你，所以我呢度都長話短說，志華你係一個好男仔，快啲返去詩敏身邊，應承我要快啲追到佢，我唔要喺天上面睇住你做佢隻兵，我要睇住詩敏對你死心塌地咁愛你，得唔得？
再見，珍重，愛你的曉彤上。
2009年3月27日』
喺我唔為意嘅時候，有一個人都好似趕住去投胎咁跑緊過嚟。
敏：「伯母…」
彤媽：「阿敏，妳都嚟睇彤彤呀？」
敏：「嗯…志華你做乜喊到咁呀？係咪曉彤佢！」
彤媽：「唔係…唔使咁緊張，暫時無生命危險。」
呢個時候我已經開唔到聲去應詩敏，兩行眼淚鼻涕不停咁流出嚟，我將佢封信對摺返，好驚整污糟封信，然後橫起隻手臂遮住自己個衰樣…
彤媽：「咁你兩個入去睇下曉彤啦，我去問下醫院嗰邊啲手續要點搞先。」
敏：「死人頭！你點搞㗎！」
我：「對唔住…我知錯喇…」
敏：「咪再喊啦，咁嘅衰樣女朋友都唔想見到你啦。」詩敏佢攞咗兩張紙巾塞落我隻手入面。
我攞起張紙巾擤咗兩條好長好長嘅鼻涕出嚟，好彩走廊就有個垃圾桶喺度；其實詩敏佢都喺度喊緊，兩隻眼紅晒…
整理完之後我哋兩個打開門入咗手術室，曉彤佢瞓咗喺病床上面郁都唔郁，個口戴住氧氣罩，重吊緊鹽水…我個心痛到完全出唔到聲。
我好驚，我唔敢面對，如果佢有啲乜嘢萬一，就係我累死咗佢，搞到人哋無咗個女，係殺人兇手。
敏：「重成碌木企喺度…你女朋友嚟㗎。」
我：「但係…我有乜可以做到…」
敏：「惜下人哋啦，剩係識激嬲人無鬼用。」
唔好話而家，就算係平時我都唔係好知點惜佢，好似做乜都係錯，剩係會俾佢鬧咁，但係佢對我嘅呢份心意我又真係完全感受到，但真係太沉重，重到我無所適從…重到佢可以押上自己條命。
我捉住曉彤隻手，好彩重係暖嘅。