【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 煎熬
到咗三月，可以話係我同曉彤嘅一個月紀念，本身我真係無諗住做乜㗎，一嚟就快考mock邊有時間搞咁多嘢，二嚟我哋嘅關係都唔係始於做愛，嚴格嚟講同初音妹妹嘅回憶又點知呢一個月咁少，所以唔覺得有乜值得紀念。
就係咁所以我舐晒嘢，佢重要唔聲唔聲到嗰日先嚟黑面，我重懵盛盛諗咗好耐先知佢嬲啲乜；咁我作為男朋友都係會補飛嘅，但我又真係乜都無準備，咪是但同佢去咗一間有少少貴嘅日本餐廳食壽司；食完嘢之後就同佢行下街，送咗個二千幾蚊嘅Vivienne Westwood袋畀佢，雖然真係唔平，但見到佢笑返都值回票價嘅。
其實女人真係有啲麻煩，點解要搞咁多小動作，點解要為咗啲小事嘥精神，我開始明點解一鳴嗰陣話羨慕我，當你得到一個女人前，唔知佢諗乜係好正常；但原來當你得到咗佢之後，你都係唔會知佢想點…例如要估佢想食乜都唔易。
回想以前雖然我完全唔理解詩敏，但我好似無乜煩惱，只係需要乖乖陪佢食車仔麪；唔好以為用禮物可以買到佢歡心；只有抽中先可以拍拖，其餘情況一律掂都唔准掂；睇落或者有啲慘，但其實我係無嘢煩，唔通抽唔中要鬧部計數機咩…加埋詩敏佢總會有啲位偶然間對我幾好。
初戀其實係艱難㗎，又唔知女人想點，男女朋友嘅溝通模式同以前唔同又要再學過，我到而家都唔係好明氹佢瞓覺有乜意義，係咪個個女仔都係咁？我同佢唔多唔少都有啲詏撬，睇嚟會考前拍拖真係並非一個好嘅選擇，有時我淨係想一個人靜靜地乜都唔諗溫書。
有一日星期六，佢朝早趁我屋企無人嚟同我做完愛之後出去溫書，不過我哋唔係去自修室或者圖書館，而係去Starbucks，我諗佢係鍾意呢啲生活格調掛；雖則我屋企算係有錢，但我都唔係敗家仔嚟，成日嚟Starbucks都幾揦脷，幾粒鐘內每人飲兩杯嘢，一杯二三十蚊，再加少少snacks，咁就嚿幾水，所以話窮撚真係唔可以拍拖，至少係唔可以同呢個grade嘅女仔拍拖，現實真係好殘酷。
但唔知點解呢個世界會有啲完全相反嘅女神，請佢食嘢都話唔得，反而會迫你陪佢捱麪包，其實我追唔到女神嘅原因係咪因為我唔夠窮…
彤：「呀…我杯嘢飲晒喇。」
我：「嗯嗯…」
彤：「唔係要你哦呀…唔識郁㗎？」
我：「曉彤…我條數計到一半，不如俾我計埋佢先好唔好。」我寫到張紙亂糟糟，加埋計數機啲M+ value，如果我行開咗一定唔記得自己計到邊。
彤：「頂你，無鬼用，我自己去買…」
我：「嗯，麻煩妳喇。」
彤：「畀張八達通我啦！」
於是乎我就成個銀包畀咗佢。
我：「順便幫我買多杯朱古力frappuccino吖，唔該。」講完先有啲後悔，佢心情唔多好唔應該叫佢幫。
我就繼續計數，過咗一陣佢攞住杯latte返嚟…
我：「妳無幫我買呀…」
都知佢未必想幫我，但唔使做埋出嚟呀？
彤：「食屎啦！自己去買呀！」
然後佢近乎用掟嘅動作將個銀包畀返我。
搞乜鬼喎…我都唔算係做錯啲乜啫。
我：「唔好嬲啦，下次我會幫妳買㗎喇。」
既然係咁我都費事自己出去買自己嗰杯，諗住咁小事佢過幾分鐘就會消氣，點知佢就一直黑面；我都唔知發生乜嘢事，咪自己靜靜地係度計數。
彤：「喂！咪飲我杯嘢呀！」
我：「使唔使咁呀…到底妳嬲乜啫，以後都幫返妳買囉，好未？」講堅我係真心煩。
彤：「唔使你幫呀，我無咁好命可以有你服侍。」
睇嚟我唔氹返佢先我係唔洗旨意有得溫書。
我：「曉彤，可唔可以話我知乜嘢事？如果我做錯，可以改，好唔好？」
彤：「你自己睇下你個銀包啦！」
吓？我銀包？有乜錯，太少錢？等我望下先…唔係噃！哎呀！大鑊！
無錯，兩年開學日詩敏畀我嘅學生証件相重好端端放喺個透明窗口格度…曉彤佢睇到唔嬲就假。
我：「Sorry呀，呢個係以前放喺度唔記得攞返走，因為我都無睇過所以唔為意佢重喺度…」
彤：「你鍾意啦，我乜都睇唔到。」
我：「放心啦，我而家即刻拎返走呀下。」
彤：「咪扮嘢啦，你唔放銀包咪搬返去書包度。」
我：「我收返埋喺屋企囉…唔係要我掉咗佢或者撕爛佢呀…咁樣唔係幾好嘅。」
彤：「唔知你呀，總之唔好刺激我。」
講真其實佢都幾無理取鬧，呢啲小事叫我直接收返埋咪算囉，使唔使發脾氣呀，我就頂唔順。
我：「我同妳一齊成個月，妳有無見過我同詩敏講過一句嘢呀？全班同學都睇住我哋㗎。而且詩敏佢知道我同妳一齊之後都無打攪過我哋啦，都唔明妳喺度呷乜醋。」
彤：「我唔係喺度呷佢醋，佢根本就唔會同我爭，咁我又何來醋可以呷呢？」
我：「咁妳做乜咁唔開心呀？」
彤：「係你小小事都唔肯為我諗，剩係覺得同我喺埋一齊就算，好似乜都唔使再理咁。」
我：「我知錯…以後做返好…唔好嬲啦。」
事實上我根本就唔知點做，同詩敏佢斬斷晒所有關係，同Wing都無謦多兩句，跟埋佢一齊返補習社已經好大讓步…乜拍拖唔係應該兩個人開開心心舒舒服服喺埋一齊就得㗎喇咩？乜搞到好似要返工咁辛苦…就會考喇，大佬…
心情唔好溫書，當然事倍工半。
自從呢件事之後我哋嘅關係就越嚟越差，時不時為咗啲小事嚟鬧架，最近一次就係因為我唔記得上網申請調補習堂而俾佢鬧到飛起，因為佢今晚阿婆生日要去食飯…我認係我衰小小事都唔記得…總之我今晚就自己一個人去補習社，其實我可以唔去嘅，但畀咗錢唔去好似好傻仔咁，嚿幾水一堂夠我食四餐大家樂喇。
去到課室，今日女朋友唔喺身邊，坐邊好呢？如果坐喺Ann隔籬真係超級奇怪，平時同佢都無乜講過嘢，佢都應該唔會想同人哋嘅男朋友坐…咁啱Wing姐隔籬就有個吉位喺度。
點算好呢…如果坐喺Wing隔籬Ann會唔會報串畀曉彤知呢？但我同Wing坐又有乜問題呢？曉彤又唔係唔識佢，Wing又有男朋友而且係我老死，專登避開好似重奇怪喎…妖，唔理喇，想同邊個坐就同邊個坐，點解要搞到自己成個監犯咁。
我：「Wing，想問下呢度係咪無人坐？」
詠：「係呀，師兄佢撞咗堂今日唔嚟呢邊。」
真係好嘢，補習可以補到撞堂，啲人真係有錢得滯…重衰過我掛兩塊空框喺牆做裝飾。
我：「師姐唔介意我坐喺度吖嘛？」
詠：「頂你呀！嗌我師姐，坐啦。」
其實Wing真係好好人，係咪所有女仔一變咗做女朋友之後就會超難相處？所以咁多男仔中出即飛…