【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 音樂日，曉彤，電燈膽

十一月都幾平靜，除咗我同詩敏喺學界打咗幾場羽毛球之外，係真係幾場㗎咋；我哋呢啲學校唔係D1圈，打成點都無乜人理，學校夠人儲到一隊男乙同一隊女乙都已經夠神奇，打到第二圈就講bye bye，當係玩下咁囉，同練波無乜分別。
而到咗十二月就當然更加唔係讀書嘅季節。
彤：「就嚟聖誕節喇喎，今年諗住收幾多份禮物呀？」作為女神，佢都慣咗嗰日枱面會多緊啲嘢。
敏：「今年，好可能就無嘞，呀，最少會有聖誕聯歡交換嗰一份嘅。」
做乜望住我講喎…係咪怪我趕走晒妳啲fans搞到妳無禮物收呢？但係妳都唔鍾意收禮物嘅，如果唔係我大把嘢可以送畀妳啦。
彤：「真大嘥，如果妳今年好似上年咁可以share啲畀我吖嘛。」
敏：「哈哈，可能今年到妳有禮物收呢。」
講起都真係難搞，作為一隻兵聖誕節又點可以無任何表示呢，問題係我直接買佢一定又會心不甘情不願咁收，如果唔係實大把選擇，手袋銀包手錶香水紙筆墨硯數都數唔晒，但我偏偏就係知佢唔鍾意呢啲嘢，就連送塊實用嘅羽毛球拍畀佢都驚俾佢鬧。
唔係衰到要送套中文精讀畀佢呀…呢樣佢應該起碼會含淚咁接收。
定係做下手作好？學啲愛情毒藥小說摺下心、玫瑰花、星星、紙鶴…其實我就全部都識摺嘅，亦都無乜難度，但呢啲唔係小學生先做嘅咩？整相簿？回憶錄？我連最珍貴喺海馬公園影啲相都攞唔到，重講乜嘢回憶，呢啲唔係一隻兵配有嘅嘢。


博一鋪送部全城火熱嘅iPhone？真係有啲貴，如果攞嚟溝其他女應該會得心應手，但我有預感佢一定唔會收…
上次生日攪盡腦汁先幫佢織到塊球拍，幾可等得到佢再斷線先有得幫佢再織喎…織？
或者…有時啲老套嘢會更方便有效。
今日飯局係我加女神曉彤Wing，呢個組合可能夠其他男仔羨慕成世，不過我就…
彤：「你兩個重未鬧完架呀？」
詠：「我都唔知…已經唔想再理。」
彤：「你哋係咪重愛對方㗎？」
詠：「我真係答唔出…」
彤：「算啦，唔好講唔開心嘅嘢，係呢？志華你今日放學得唔得閒呀？」
我：「今日？放學咪打羽毛球囉。」


敏：「曉彤望住我做乜？呢條友返學返到day幾都唔記得㗎喇，你問佢都無用。」
彤：「哈，我話佢肯定成個腦都係裝住妳啫。」
我：「乜喎，今日星期三吖嘛，我無記錯呀！」
我完全聽唔明佢哋講乜，但我無記錯今日係星期三打波喎。
敏：「今日無禮堂用呀！你係咪想喺雨天操場打，你唔驚俾人講我就陪你，等你再出名啲。」
我：「吓？點解會無禮堂用？」
彤：「今日放學music day初賽呀，仆街！」
我諗我真係激死佢哋，但我真係唔理呢啲嘢㗎嘛，重要初賽添…如果佢哋唔講我真係唔記得今個禮拜五就係music day。
我：「哦…咁…妳哋要去追星？」
彤：「追你個頭呀，我同阿Wing都有報名，你嚟唔嚟打氣呀？」


係喎，唔經唔覺我哋都已經中四，以前就話睇師兄師姐表演，而家都差唔多輪到我哋上場。
敏：「人哋問你呀，你望住我做乜啫。」
彤：「咁即係唔使問啦，詩敏嚟你就嚟㗎啦。」
我：「咁我嚟啦，妳哋唱乜歌呀？」
彤：「唱我嘅拿手好戲，電燈膽呀！」
我：「乜有首咁嘅歌㗎咩…」
彤：「頂你！係今年Stephy嘅大熱新作呀，咁都未聽過你係咪外星人嚟㗎？」
我：「我認㗎，呢方面我真係外星人，Stephy我剩係識『油不是八十年代』…」
彤：「Cookies都散咗啦，重心急人上！」
詠：「咁我唱嗰首你應該識喇。」
我：「妳唱乜呀？」
詠：「係好心分手。」
我：「做乜要唱埋啲咁嘅歌…」
彤：「你有無讀中文㗎？呢啲叫觸景傷情，唱啲應景嘅嘢會特別有感情㗎嘛！」
敏：「好彩我無呢啲奇怪興趣，我睇表演就好…」


彤：「其實可以即場報名㗎！不如我幫妳吖，好唔好呀？唱傳說一定會全場哄動。」
敏：「妳試下吖，反面㗎！Friend都無得做。」
彤：「唓，玩下咋嘛…」
我：「我想問…點解係唱傳說？」
彤，詠：「因為傳說中，有個女王在世上…」
長長頭髮…妖，我真係唔識吖嘛，我都唔係呢個department嘅…其實成日同女仔一齊食飯有時都會幾辛苦，因為大家講啲topic成日都唔同；曾經聽人講過女仔過腦大部份容量喺攞嚟裝明星嘢同歌詞，而男仔就記R1三角L1正方交叉圓圈R1…同埋高達嘅編號，睇嚟所言非虛。
放咗學我哋四個就去禮堂，一鳴佢無嚟；其實我都好頭痛，佢哋時好時壞，我又唔想撇低詩敏去關心佢，好似好婆婆媽媽咁，但Wing又成日黐住佢兩個，咁一鳴就只有避席。
我心諗，你哋鬧架還鬧架，上堂都已經坐隔籬對足成日啦，點解重要介懷呢啲嘢，反正就連我哋局外人都已經慣咗，同枱食飯都可以各自修行嘅啫。
過咗陣曉彤同Wing就去後台準備。
我：「曉彤佢真係覺得自己做電燈膽㗎？」
敏：「我點知喎，我又唔係真係同你一齊，其實佢有男仔追㗎，不過佢唔要咋嘛。」
我：「原來係咁，邊個追佢呀？」
敏：「作死你呀，女仔之間嘅秘密你都敢八。」
我：「唔八囉，但點解要唱埋啲咁灰嘅歌喎。」
敏：「不如加碼吖，我幫你報名唱爛泥或者垃圾。」


我：「原來，妳係咁對我…」
爛泥…垃圾…我聽到真係想喊。
敏：「喂，講笑咋…唔好認真啦，不過你可以唱義勇兵進行曲，保證全場起立聽。」
確實，女神要摙死我脆弱嘅小心靈真係易如反掌，而唯一救到我嘅嘢就係部唔生性嘅計數機，但講真1%嘅機會我已經中咗一次已經係好好彩。
「假使不能公開妒忌　學習大方接受
同行時要殿後　誰冷落舊朋友
節曰約我三位一體的慶祝
沿途明亮燈飾閃影著沉重
言談愈熾熱　內在更冰凍
誰當初無心將兩方撮合　然後留低只得這寂寞人
仍是你們密友　呆望你們熱吻應該傷感還是快感」
認真…曉彤佢唱得好好，就算我只係第一次聽都覺得呢首歌作曲填詞非常出色，奈何我又真係唔多鍾意啲咁自虐嘅歌，女仔諗乜真係好難明。
然後就到Wing嘅好心分手，相信大家都知係乜…
佢都唱得好好，非常之有感情，唔通呢啲歌真係用嚟俾佢哋有切膚之痛嗰陣嚟唱嘅，唉…如果唱唱下真係唱到分手就真係唔方唔坎坷。
由於Wing係repeat，所以在場好多中五嘅師兄姐喺佢唱完之後都走去同佢寒喧稱讚一下，而喺呢個時候我感覺到有一絲奇怪嘅目光喺遠方射過嚟。


我：「呀，我去個廁所先。」
講完我就衝咗出去，飛快地，有個傻仔反應唔切俾我喺樓梯度逮個正著。
我：「喂！你搞乜鬼啫…」
鳴：「殊！唔好同佢哋講我嚟過。」
我：「點解要搞到咁啫？有必要咩…」
鳴：「你又點會明啫！」
講完佢就雞咁腳走咗，鬧架咪鬧架囉，好歹都係女朋友，點解就唔可以光明正大嚟支持下佢？唉，我真係唔明，睇嚟我無資格拍拖。
之後我返返入去，同佢哋一齊聽下歌仔，欣賞下啲中七師兄點樣盡地一煲唱卡通歌廣告歌，最後等埋初賽結果就走人，如我所料佢哋兩個都入到決賽，過兩日個死人一鳴咪又係要坐喺禮堂乖乖聽歌，都唔知有乜好避。