【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 天壤之別
一鳴同Wing兩個好快就成為一時佳話，自己班當然唔使講，就連Wing啲舊同學師兄師姐都走過嚟八下發生咗乜事，本來啲注意力由我度移咗去一鳴度係一件好事，但當佢哋留意到我同一鳴係好朋友加上我哋嘅座位排列之後，情況都係差唔多。
肥豪日日望住我哋個樣就係一面不忿，而Tamama就成粒提子咁，我想講你兩個咁樣望住我哋都無用，如果唔係你兩個整咗嗰個賭局出嚟，我諗我同一鳴兩個都仍然會係唔敢溝女嘅死毒撚。
“0.657”，“0.794”，“0.104”…
點解國慶日無學返㗎！抽小咗次喇！一鳴同Wing就去咗拍拖，我無理由走去搵佢細佬打機㗎，諗起都實在毒不可耐，算！溫書！
咦，唔係喎，裝隻hgame嚟玩下都好喎，我都淨係玩咗一個角色，順便學下點溝女。
點知我部電話即刻響起，我望一望就將隻碟飛咗落床下底。
我：「詩敏搵我有事？」
敏：「放假有啲悶，練唔練下波呀？」
我已經開心到跳咗上床攬住張被，但…
我：「今日公眾假期，校務處唔開，借唔到禮堂㗎喎。」
敏：「求祈去公園打咪得囉。」
我：「其實如果妳唔介意，我會所呢度有場。」
敏：「使唔使錢㗎？」
其實我好驚，所有關於錢嘅嘢佢都好敏感。
我：「咁人哋咁大個場，點都要收少少嘅…免費就會有好多無謂人去嘆冷氣。」
敏：「幾錢個鐘呀？」
我：「假日一個鐘四十蚊。」講真唔太平。
敏：「我同你夾一個鐘啦。」
嘩，開心死呀，女神要光臨貴境呀！不得了！
敏：「有無更衣室㗎？我使唔使換埋衫出嚟？」
我：「梗係有啦！收咁貴都無我投訴佢添呀！」
敏：「咁你check下有無場先，我半個鐘之後過嚟你屋苑啦。」
女神真係醒，我差啲開心到唔記得check。
Check完好彩真係有，我九秒九就換好衫飛奔出去。
敏：「嘩！我咪話識過嚟囉，做乜過嚟接我？」
我：「無呀，順便咋嘛。」
敏：「你咁樣追女神，下世都未追到啦。」
我：「吓…即係點？」
敏：「好彩你係追我咋，如果唔係你渣都無剩。」
我一直都諗唔明，佢明知我追佢，但一直不置可否，但又一直將呢件事掛喺嘴邊，究竟係一種乜嘢嘅心境？
佢嘅衣著大家唔使諗咁多，羽毛球鞋，牛仔褲，T恤，當然對我嚟講換咗打波衫嘅佢就係完美嘅女神，簡簡單單唔使整色整水，而佢好快就畀咗張廿蚊紙我。
同女神相處咗咁耐都開始習慣呢種模式，佢換完衫之後我都無乜點，準備攞塊拍出嚟…點知佢遞咗部計數機嚟我面前。
我：「做乜呀？」
敏：「抽唔抽呀？」
吓，唔係嘛，唔通佢專登搵我就係嚟畀次機會我抽？我當然死人都即刻抽，亦都當然唔中。
好！開波！
好！打完！
由於下個time slot無人，我哋偷多十五分鐘先俾人趕走，由於要錢所以我哋無停過散晒咁滯。
我：「上去會客室抖下咯。」
先三點多啲，我好想對多佢一陣，但我真係唔知有乜藉口可以留低佢喺度，叫佢上我屋企？我唔敢，一陣佢以為我有乜奇怪居心就死，我又唔係一鳴；約佢去街，我哋又唔係情侶，又唔係有嘢要買，約唔出口。
會客室係幾靚嘅，啲枱又唔迫，出面有花園，有自然光，重有水機，但我哋兩個坐喺度，可以坐到幾耐？
敏：「不如我哋喺度溫下書咯？」
我：「啊，妳有帶書嚟呀？」
敏：「你返上去攞咪有囉。」
我：「好，妳等我一陣！」
我用咗三分半鐘跑上去，一分鐘摷書，五分半鐘沖埋涼換衫，再用三分鐘飛返落嚟。
敏：「你使唔使打仗咁呀…」
我：「邊有喎。」
可以坐喺女神隔籬計Phy，背下periodic table，真係人生幾何，而且重有佢打完波嘅陣陣香氣，有乜難題都即刻迎刃而解啦。
我同佢嘅距離又好似近咗少少，如果兩張學生枱令我哋產生咗25cm嘅距離，我諗而家我同佢就只有20cm，就係呢5cm嘅接近令我個心有啲卟卟跳嘅感覺。
敏：「喂，呢條你識唔識計呀？」
佢用手踭批落我隻手度，差唔多令我有觸電嘅感覺；如果係講直腸直肚嘅數學，詩敏應該喺我之上，但如果係講求分析同理解力嘅Phy數，就好似我好啲，上咗一個月堂就發現咗呢件事。
第一次覺得，一齊溫書，互相交流係一件咁爽嘅事，並唔係因為詩敏佢有幾靚女，或者同女神一齊有幾威威，而係我好似發覺自己學識點樣同一個女仔喺學校以外嘅地方相處。
我：「係呢，如果我抽中咗妳會點？」
敏：「咪做一日女朋友囉。」
我：「唔係呀，我係問妳會覺得點。」
敏：「點知喎，我都唔知我男朋友將會點對我。」
佢眼仔轆轆咁望住我，一副有啲無知、無辜、無奈嘅樣，口中嘅答案永遠係近乎不能反駁嘅完美，係嘅，我都未做過人哋男朋友，可能第一日就會激死佢…
我：「如果拍拖，我哋應該做啲乜好？」
敏：「呢啲嘢就梗係男朋友諗㗎啦！問我，作死你呀…況且你抽中先算啦，發夢都無咁早！」
我好想同佢講妳其實有97.5%嘅機會要同我拍拖，講嘢唔好咁大口氣，但我當然講唔出口，係嘅…中咗先慢慢諗啦，又唔係即日就要拍拖。
就係咁，我同佢溫到大概六點鐘就送佢返屋企。
敏：「志華，你今日開唔開心呀？」
我：「當然開心啦，咁妳呢？」
敏：「OK呀！聽日見啦！」
詩敏，妳個心到底諗緊乜。
時間嚟到十月中嘅一個星期五。
「早晨，詩敏。」，「早晨，志華。」，“0.333”！
我：「我無眼花呀可！？」
敏：「如果你驚眼花咪AC再㩒過囉。」
我：「唔係喎，係0.333喎！」
敏：「我見到呀，有乜問題？」
我望住佢，個樣應該好奇怪，十月咋喎！先抽咗廿次到，咁快就中1%？唔通係神終於眷顧我？
敏：「恭喜你呀，諗定邊日就話我知啦，我會盡可能就你。」
佢個樣好冷靜，重帶住個招牌微笑。
而我，真係有啲不能自拔，估唔到追咗女神一個月多啲就可以同佢拍拖，雖然只係一日限定…問題嚟喇，我真係未諗到拍拖要做乜喎，上個禮拜先話發夢無咁早，而家就變咗書到用時方恨少。
係喎，我可以諗下Hgame入面啲活動，十月重咁熱去游水？唔得，隻game入面都話要三粒心心先可以睇泳衣，詩敏佢而家頂到盡得粒半心；做運動？唔得，我平時重同佢打得唔夠多波咩？行商場？唔得，我都未識點同女人行街，詩敏佢又唔多好物質生活。
突然間我諗到隻game入面，望住女主角騎木馬走光嘅CG，係喎，去公園玩係一粒心就做得，重easy過去打波，但…會洐生另一個問題。
我：「咁嗰日…我可以使錢喺妳身上㗎可？」
如果佢話唔得我就頭痛，無理由拍拖重食大排檔㗎，而且係咁珍貴嘅一千零一日。
敏：「當然啦，送層樓畀我都得㗎。」
我：「哈…哈哈，唔好講笑啦。」
真係怕咗女神，可以突然變得咁極端，不過佢答完我之後我嘅擔心就煙消雲散，可以專心plan喇。
又過咗陣一鳴同Wing都返到，但氣氛好似有啲唔同，一鳴喺我左手邊經過，而Wing就喺詩敏右手邊經過，然後坐低咗。
詠：「咪黐咁埋得唔得呀？」
果然天有不測之風雲。
鳴：「妳講乜呀，咪好地地坐正中間…」
詠：「你本書呀！過咗界喇！」
彤：「噗！」
其實我都想笑出口，都唔知有幾耐無聽過呢啲咁小學雞嘅投訴，重要出自一個比我哋大一年原本係師姐嘅女仔身上，但呢個環境真係笑唔出；我同詩敏用側眼互望咗一下，心知不妙，都係唔好出聲住，靜觀其變先再睇下點幫佢兩個。
喺學校拍拖重要拍到咁明顯其實真係有好有唔好；甜蜜嘅時候全世界都唱你，又會俾人笑，成為啲三姑六婆茶餘飯後嘅吹水topic；但到咗鬧架嘅時候你會更加大鑊，都唔使我解釋啦，頭先嗰一幕已經鶻突到呢…唔好以為個個睇住唔出聲會隱惡揚善，肯定轉個頭就連教員室都講緊你兩個。
好彩之後都無聲無息咁直到lunch time。
鳴：「一唔一齊食飯呀？」
詠：「我無胃口。」
鳴：「妳發完脾氣未呀？」
詠：「我幾時有發脾氣呀！無胃口唔得嘅！」
鳴：「都黐線嘅！志華，我哋去大家樂鋸扒啦！」
我：「乜晏晝…有扒鋸？」
鳴：「一哥焗豬塊扒唔鋸得嘅！」
詩敏佢望住我打咗個眼神，示意我快啲帶一鳴消失，而Wing姐佢就好唔開心趴喺張枱上面。
敏：「Wing，我哋陪妳啦…」
於是乎我同詩敏嘅飯局就俾佢哋嘅感情事宜攪禍咗，不過無辦法嘅，作為朋友點都要幫下手。
我：「無乜事吖嘛…你兩個。」
鳴：「我都唔知乜事，乜都無做過，又無搵其他女仔，又無顧住玩，我都搵少咗好多你打機啦。」
我：「咁不如你直接問佢嬲乜啦。」
鳴：「你估我無？食你嘅飯啦！俾我靜下。」
認真我都唔識點幫佢，我自己都未拍過拖…所以我都無再出聲陪佢靜靜地食完餐飯就算；感情嚟得快，上床話咁快，同一時間風暴都嚟得快，我第一次近距離感受到情侶之間爭執鬧架嘅恐怖同震攝力，諗返轉頭我同詩敏而家咁樣相處都唔錯，大家都無乜壓力，唔通呢個就係佢嘅目的？