無啦啦有三條女同左我一齊住: 2
「十三...十四...十五...」
我地「紅七公」響呢個game輸左，所以我地四個男仔要接受poly掌上壓既大懲罰
仆街，中學最憎就係體育堂，要我做呢啲真係攞命
果個大隻狗jack對腳仲要聚哂啲力落黎，屌佢老母！
但礙於周圍群眾壓力，一陣屌鳩佢既話只會令自己形象受損，唯有忍左佢...
成班玩下啲無聊mass game之後，就正式出發玩city hunt
city hunt擺明就係要阻街，要響人面前做啲柒野
不過對我黎講，呢個絕對係個好好表現自己既機會！
第一個任務係去美麗華廣場門口唱紅日
一路上，大家都開始講野
而果個wilson同jack，亦開始露出狐狸尾巴
「hello chantal！你好似講咁少野既？」
jack開始展現自己social既一面，不斷咁聊chantal講野
「係咩...」
chantal都仲係無乜反應
係就好囉，至少佢對呢個殺傷力高既jack無興趣
而椰奶，就已經比獸父wilson、eric、阿俊圍住
「椰奶你都幾sporty架喎，頭先見你玩game都幾勁！」wilson叫道
「緊係啦，我以前學過跆拳道，中學打排球隊架嘛！」
「犀利喎」
eric講完後，臉上既暗瘡又爆左一粒
椰奶中學時候應該都係萬人迷，對住呢個情況完全唔尷尬
就咁睇，呢個時候既我得返兩個選擇
組媽erika同埋阿純，janice呢件侏羅紀不提也罷
「命運就算顛沛流離！命運就算曲折離奇！命運就算恐嚇著你做人沒趣味！」
我地十個響美麗華廣場門口高唱「紅白」，引來周圍途人不屑既眼光
不過，呢啲就係青春！
「yeah！！！」
唱成之後，我地成班影selfie
wilson同eric兩個大大份入哂鏡，差啲逼左我出鏡
襯住我地搭地鐵去下一個mission point果陣，我鼓起勇氣
向頭號目標阿純出手！
「阿純...你..口唔口渴呀？」
阿純雖然無好似頭先咁退後，但似乎都因為比我突然咁問而嚇倒
「我..我有水...」
阿純即刻響背囊拎左支水出黎飲
仆街...講咩話題好呀....
「係喎...你...dse幾多分呀...？」
「4454...544...」
喂咁既答案..我點都你繼續傾呀...
「係喎，新地你好似都係engineering physics架喎！」
果個肥西janice走埋黎搭嗲
如果呢個時間我叫個肥西死開，咁一定會令阿純對我扣分
「呃係呀...哈哈....」
「我都係呀！到時有source記得些牙喎！」
仆街，個肥西把口好撚臭呀，有冇刷牙架...
阿純見我比個janice拉住講，都自動行開
屌！！！
「好！最後一個任務都完啦！」
「yeah！！！」
行左成兩三個鐘，終於玩完city hunt
wilson開口：「我地依家就入camp先..」
「喂..係呀我地做完任務啦」
呢個時候，組媽erika傾緊電話：「得啦，你好煩呀~」
「條友打黎呀？」wilson笑住問
「多事啦你！」
吓？！
組媽erika嘴角含春咁，唔通佢已經有男朋友！？
即係話，目標又少一個
得返阿純...
「隆隆隆....」
我地成班坐巴士入去位於西貢大網仔既campside
而我，當然係好不幸咁要同janice坐
「你知唔知呀，其實我差幾分就入到ust架啦..」
「係..係咩...」
阿純身邊既阿俊係咁撩佢講野，但阿純都只係hea應佢
而再前面既chantal都仲係係咁望住電話打字，到底佢同緊咩人講野呢..
入到campsite食左飯之後，我地成班玩埋啲on9 game玩到12點幾
「嘩好撚攰...」
行左成日，再加上玩左成晚game，我成個人散哂咁濟
「咁就想休息？我地仲有True or Dare要玩呀」組爸wilson講
屌...係喎
利用first impression呢個機會，唔單止可以對阿純有多一份了解，仲有可能令椰奶同chantal對我有興趣，建立話題！
「咁開始啦，嗱我地今次就刺激少少啦，揀truth既話就要答上一手既問題」
吓！
如果係要人地問既話，肯定會問status
咁樣我a0既事實就會公諸於世...
組媽erika轉下空既蘋果綠茶樽
唔好中我住...唔好中我住！
第一次，樽停左響狗公jack度
「我...揀truth！」
「我問先！嗱阿jack！我覺得你應該起碼拍過三次拖啦！話哂男神level！」個暗瘡毒撚eric講，似乎佢都投入左ocamp個氣氛度，講野都大聲d
「哈哈，差唔多啦，依家a4」
jack掃視哂全場，自豪道
個毒撚eric同阿俊都露出羨慕既目光
仆街，啲女仔永遠都係鐘意啲大隻柒頭！
jack再轉個空樽，點知
今次停左響chantal面前
「咦...我？咁...我揀truth啦..」
「我問！」
個樽係由jack去轉，自然就係佢問
「chantal你係咪有男朋友架？！」
全場，包括狗公jack都昅住chantal
「嗯...有呀」
面對群眾壓力，chantal輕輕點頭
果然同我預測既一樣，chantal係有男朋友
不過見佢一路望住電話個緊張樣，唔通有男朋友？
當知道chantal有男朋友後，在場所有男性都好似有少少失望
尤其係jack，個樣直頭閪撚哂
組爸wilson見氣氛跌至冰點，馬上救場
「唉..哈哈好啦..咁繼續啦」
之後幾次，janice同阿俊都揀左dare，應該係唔想比人揭發自己a0既事實
點名玩果啲都係不外乎跳下舞、拎碌棍自轉再行到失平衡果啲
直到
空樽再轉
今次
終於轉到我度