《時光不能夠重新來一遍...》第二季: 十一，領袖生的責任

另一邊廂，運動會正進行得如火如荼。
炎熱的天氣使得看台上的師生們都汗流浹背，無比難耐。

「吓 ? 有我份 ? 我要落場跑 ? 」身穿著白短袖運動服的雷俊宇很吃驚。

「嗯嗯，我都係今朝出門口先知我地要跑4X100接力，你掂唔掂啊 ? 」站在看台角落，身旁汗水都沾濕掉每根髮絲的黃詩瑤正拿著頸上的毛巾擦著汗說著。

詩瑤面對炎熱的天氣，居然沒有選擇把一頭及肩的短髮扎起，任由披頭散髮的形象不管。

現在場上正同時進行著初中級女子組的二百米賽事以及遙遠處的高中級的撐竿跳比賽。




中一至中六的學生依班別順序坐滿了整個看台，有些學生很熱烈的跟隨著領袖生的啦啦隊打氣叫口號，
而有些學生卻冒著大汗埋頭玩著手機和喝冷飲。

「邊個同你講呢個消息㗎 ? 居然擅自幫我報埋名都有嘅，傻的嗎 ... 」雷俊宇無奈的看著黃詩瑤說道。

「我家姐 ... 哈哈 ... 」詩瑤她苦笑。

「你家姐係唔係好憎我其實，唉。到底點解可以幫我報埋名，佢憑啲咩 .. 」雷俊宇用手捂臉。

「佢憎唔憎你我唔知呢，留翻你一陣自己問佢啦 ... 」黃詩瑤用手整理著額上與汗水交織著的瀏海續道「因為我地Daddy係今年家長教師會嘅主席，我家姐又想翻黎玩下，所以利用呢點去報名囉、Sorry啊... 」她一臉歉意的說著。





「算啦，唔緊要啦、唔報都報咗就頂硬上啦。」他深深的嘆了一口氣。

「一齊加油 ! 」黃詩瑤強擠笑容的為雷俊宇打氣。

「話時話，接力賽每隊有四個人，咁最後一個人係邊個 ? 」雷俊宇問。

「家姐鐘意個男仔啊，即係你同學，好似係姓張㗎。」黃詩瑤稍稍的用力憶起著那個男生的名字。

「張同學 ? ? ! ! 」雷俊宇驚訝的道，並四處探頭「係喎，點解好似唔多覺見到佢嘅今日 ? 」





聽狀黃詩瑤也一同盯著中五級看台上尋找著張澤曉的身影「係囉 ... 」

此時，「喂 ~ 你兩個癡得咁埋咁好傾嘅 ? 我地成班同學仲以為你兩個拍緊拖添喎，俊宇。」雷俊宇身後突然傳出何欣彤不屑的聲音，她看起來好像笑裡藏刀似的表情。

黃詩瑤聞聲回頭看看中五級的看台上，果然有班同學正在笑呵呵的盯著他們倆，馬上尷尬的後退幾步。

「咩事啊Ayumi ... 」雷俊宇不耐煩的回應著。

「無啊 ~ 我見呢排你同師妹玩埋咗好多，我妒忌啊俊宇 ~ 」何欣彤身穿的運動短褲明顯的改短成熱褲的長度，更大範圍的露出一雙雪白的長腿。

「我同佢無野㗎，唔好成日蝦詩瑤啦。」他一掌陰力的拍到何欣彤腦袋上。

「我邊捨得蝦師妹喎，佢咁靚女又可愛 ! 見到都忍唔住即刻攬住佢啦係咪先 ~ 」何欣彤被打後馬上激動的伸冤。





在一旁沉默起來的黃詩瑤忽然很沒自信的低頭，逃避比她高一點點的何欣彤的視線。

就在此際，「初中級女子100米短跑，第一次召集  ─  」看台上響起廣播。

「我... 我要走啦，轉頭再傾 ... 」黃詩瑤聽狀馬上把掛在頸上的毛巾交到雷俊宇手上，急步離開「雷俊宇 ! 一陣記得要望實我 ! 」

「噢喔 ... 加油啊。」他目瞪口呆的目送著黃詩瑤跑向召集處。

何欣彤吹吹口哨，輕浮的說著「woo ，真係好啊有靚女溝、哇佢條毛巾好大陣香味啊 ! 」

雷俊宇下意識的把手上毛巾放到鼻子前聞一聞「係喎，真係好香 ... 」

「喂頂你啊你真係聞㗎 ? 好變態啊你 ! 」何欣彤很不滿的喊道。

「 ... 」雷俊宇一臉尷尬的馬上放下毛巾。





----------------------------------------------------------------------------------------------
鏡頭一轉，較早之前。

我，今早抵達運動場後，在早會時同時有任教科學科的班主任跟我說他遺下了一整袋的充氣打氣棒在校舍科學室，又告訴我原本想找雷俊宇幫忙回校舍把打氣棒帶回來，可惜他卻很忙、於是把我叫去。
如是者，我馬上從蒲崗村道運動場乘車回到學校，打算快快手了事。
回到校舍後，身水身汗的我馬上跑上四樓科學室。
用鎖匙打開房門，悶熱的室溫馬上從門裡逃逸出來，迎面而來的熱氣差點把我熱死。

「癡線咩 ... 間房成33度...」我盯著門邊牆上的溫度計喃著。

進去後第一件事打開冷氣，科學室內馬上冰涼起來。
我立即埋頭尋找著班主任所講的「一大袋打氣棒」，不一會便發現它正放在教師桌下的櫃裡、
提起整袋東西後打算鎖門離開科學室時...





「呯  ─  」科學室的門被人用力的推開，門狠狠的撞上牆身。

??!!

「吓  ─  」眼前的她脫掉掩蓋著那妖艷混血兒臉蛋的眼鏡，上氣不接下氣的一直在喘息著。

我瞪大雙眼，難以置信的直視著站在門口的她「你 ... 梁曉瑜 ?」

「又會咁岩得咁橋係到撞到你嘅張澤曉 ?」她慢慢走進科學室，轉身把唯一的出口給關閉起來並反鎖著，然後抱起雙臂擺出一副高挑的姿態與我對視。

她氣沖沖的與我接上視線，身穿著的白色短袖恤衫與運動日例外穿著的黑色百摺短裙令她倍感酷熱。

「睇怕你係專程跟蹤我下話 ? 今次又有咩貴幹 ?」我掉下手上那一大袋打氣棒到地上。

「想... 同你好好地咁傾翻場計姐。」梁曉瑜緩緩的走向空調下稍微解開她身穿著白色校服上的衣領鈕扣，頸部的性感鎖骨一眨眼原形畢露。





「又想罵我點樣搶走你阿哥嘅女人，要我道歉 ? 」我很是不耐煩的反問。

「當然唔係，不過想講俾你聽我哥佢嘅近況姐。」她在我面前從容的走過，彷彿毫不在意她解開的衣領後的模樣、走到教師桌上繞起雙腿坐著。

「唔好曬我時間，你究竟想點，我趕住翻落運動場。」

「你唔洗急，俾啲耐性慢慢聽。」她開始琅琅上口說著，
「之前你入完院平安無事咁出翻黎，我哥知道之後佢即刻又嬲又喊，不停大叫發洩情緒。」

「哦 ? 你咁講即係我之前俾人踢到碌落樓梯，個兇手係... 」我話未講完，

梁曉瑜把話打斷「係，就係我。」

「果然係咁，我之前已經估到。」我道。

「之前 ? 你點解會覺得係我 ? 」她反問。

「有日望到你上緊PE堂，見你跑得好快，同個日襲擊完我逃走嘅人跑得一樣咁快。By the way 你身為德高望重嘅領袖生居然都會做呢啲事，唔怕俾老師知道 ? 」

聽狀她投以目光銳利的視線冷笑「我仲有一兩個月時間就畢業，有咩好怕 ? 哈哈。」

我搖搖頭「嗯哼。」

「唉，唔好disturb我講野住得唔得 ? 」梁曉瑜意味深長的嘆了一口氣，
接著繼續道「其實我只係好愛護我哥，唔忍心見到佢因為你同果個女人而搞到自己身心都受傷。」

「所以我無道歉就要成個精神病咁走黎踢我落樓咁嚴重 ?  你知唔知我而家走去通知學校，你一樣會身敗名裂 ? 」

「我地唔係癡線 ! 無精神病 ! 請你唔好亂講野 ! 」梁曉瑜突然異常很激動的喊道。

見狀感到很不對勁，我冷靜的觀看著面前有點失去理性的她的一舉一動。

她留意到自己過份的激動，漸漸平伏下來續道「我 ... 之所以會踢你，呢一切都係因為我哥嘅說話。」

這個女人今天好像有點不對勁，很強烈的違和感，那種強勢的感覺跑到哪了 ?

我沒有回應，繼續留心聽著她的話。

「我自己俾我哥搞到開始都有啲神經質，情緒波幅好大，真係好辛苦。」她說。

「咩意思 ? 」

「之前，同你講過我哥受打擊自己諗唔開，困住咗自己個心嘅 ?
佢足不出戶咁自閉，屈係屋企屈到情緒病同思覺失調、成日郁啲就想自殺。
我同屋企人即刻帶過佢去睇過心理醫生同精神科醫生，
我無諗過只係因為一個女人就令佢崩潰到咁誇張嘅地步。
我父母都係接受精英教育思想嘅人，原本對我哥寄予厚望可以係學業有好好嘅成績，
但演變成呢個情況之後、佢地放棄咗我哥。
我當然唔會放棄佢，我好想搵方法令佢好翻，唯有將所有照顧佢嘅日常重擔都自己一個肩負起。
呢種高壓生活開始咗之後，我無一日唔係周旋係學業同照顧我哥呢兩件事上面，
seriously好多時我都壓力大到崩潰、翻到屋企會自己一個人喊足成晚。」她難過的說。

「之後 ? 」我繼續聽著。

「同我哥接觸得愈多，反而我係受佢負面情緒影響更深果個。
我曾經問過佢，我可以為佢做啲咩從而令佢回復正常，放低以前嘅事。
但佢居然答我『無野可以做到，除非害死佢鐘意嘅女仔嘅人受到應有嘅報應佢先會放低所有野』...
於是我由佢口中問更多以前發生過嘅事同害到佢變成咁嘅罪魁禍首嘅人名，
又咁好彩係插班生名單入面搵到你出黎、confirm過無認錯人後我就同咗我哥講。
佢一聽到你撞完車居然活生生咁企翻起身相安無事，就非常嬲非常激動...
叫我要幫佢報仇，仲話你呢啲人憑乜野可以繼續生存、而姓陳個女仔就咁就一去不返。
最後，就係佢吩咐我要諗方法令你再受重傷，而且重要我將成個過程拍片錄低俾佢睇。
當日踢完你落樓梯，翻到屋企將條片交俾我哥睇，佢一睇到就開心到不停拍手、
我好耐都無見過佢笑得咁開心。」

聽後我無言以對「 ... 」

「為咗我個思想扭曲哂嘅阿哥開心，而去做傷害人地嘅事，我真係覺得自己好蠢。」梁曉瑜帶著後悔的眼神說道。

「咁你都幾夠薑吓，做得咁徹底踢到我入院。」

「所以，今次我係專誠同你鄭重道歉、好對唔住。」她突然從桌上站起來，真誠有禮的向我道歉。

「唔緊要，由去啦。既然你有反省自己做過嘅事，我都唔會追究。」突然被她的道歉稍微打動令我放心下來，我撿起剛才掉在地上的那袋打氣棒續道「有咩其他事就邊行邊講啦總領事，我趕時間翻去運動場。」

「嗯，真係好對唔住阻住你咁耐，你趕時間就走先啦、我仲有野做。」她眼神變得空洞的說。

「下次再講。」話畢我便頭也不回的提著東西急步跑出了科學室。

我沿著樓梯跑到地下，正要離開校舍入口時，有人心急如焚的迎面跑來並大喊著「張同學 ! 」

我停住差點把人撞倒的腳步，仔細看看眼前叫停的我的人、原來是領袖生副領事林雅慧。

「張同學 ! 有無見到梁曉瑜啊 ? 」眼前的林雅慧滿頭大汗，一把深黑的長髮被微風吹彿著。

「有啊，佢頭先同我係科學室傾咗陣。」我回應。

「咁而家呢 ? !  佢係邊啊 ? ! 」她大為緊張的追問。

「可能仲係科學室，唔知佢有咩做。」

突然，林雅慧臉有難色的往四樓跑去「大獲 ! 」

「喂副領事，咩事啊 ? 」 

「跟我上去 ! 快啲 ! 」她邊跑邊大喊。

見狀，我馬上追上去。



不一會，我們跑到四樓，整個樓層都彌漫著濃烈的煤氣臭味。

「弊啦 ! 佢仲係Is room 入面 ! 」林雅慧用手捂住半張臉，急步衝入科學室，我緊隨其後。

回到科學室，更為強烈的媒氣味撲鼻而來，馬上把我倆燻得咳個不停。
我仔細看看整個科學室，八張實驗桌上的本生燈都在沒有點火之下開啟了，
不斷的洩漏著煤氣、情況極之危險。
而在其中一張實驗桌下，發現到梁曉瑜整個人倒卧在地上。

「梁曉瑜 ! ! ! 」林雅慧驚恐的大叫著，跑到倒卧的梁曉瑜身旁跪下。

那女人，該不會是...
我回想起剛才臨別時，梁曉瑜那副突然變得空洞的表情，真的很不對勁。

見狀，我察覺到事態，馬上乾脆利落把整個房間數枝本生燈關上，停止繼續洩漏煤氣。

「曉瑜 ! 曉瑜 ! 醒吓啊 ! 」把失去意識的梁曉瑜抱在懷內，林雅慧緊張又惶恐的呼喊著。

「喂副領事，帶佢出房先再講 ! 交俾我。」話畢我把梁曉瑜整個人抱起，帶離科學室。

而仍處於驚慌失措的林雅慧也馬上站起來，把整間科學室的每扇窗都給打開，再把四把天花的大吊扇給開動起來、把房間內濃厚的煤氣吹散。

我把梁曉瑜抱著，一邊走了四層的樓梯去到校務處求救。
幸好運動日的校務處仍會有一兩位職員當值，職員見狀馬上報警呼喚白車。
一直跟在身旁看顧著梁曉瑜的林雅慧擔心得很，兩眼漸漸通紅。

「無諗到佢會做傻事... 」林雅慧雙手緊握著梁曉瑜的手。

站在一旁的我默不作聲。

良久，救護車再次來到學校，救護員把失去意識的梁曉瑜抬上擔架床送往救護車裡。
之後，林雅慧主動跟校務處職員和救護員要求跟上車，陪伴著梁曉瑜到醫院。



待續...