春夏秋冬都是妳: 十

「我唔該你唔好再騷擾我啊」課室傳來樂晴的掙扎聲
「咩啊，靚女唔使驚喎，哥哥唔會傷害妳㗎」

那時候的我還是個弱雞，鼓起很大的勇氣才夠膽與人對質，畢竟保護愛人比什麼都重要。
「喂，做乜嘢搞我條女啊？」我閃閃縮縮地說
「點啊靚仔？嬲打啊？唔好扮正義啦」那對高個子恥笑著我
「我警告你地最後一次，唔好掂嗰個女仔」我義正辭嚴地說，即使赴湯蹈火也要保護樂晴

青梅竹馬賦予我的，就是要保護、寵愛這個女生。





我緊緊地拖實樂晴，然後拔頭就跑。
寡不敵眾，走為上著:)

「喂你痴線㗎，好痛啊隻手」樂晴氣喘兮兮地說
「你想俾班變態圍定痛一陣吖？」我緊緊地握著她說
「咁...咁你拖咁耐都係變態吖，人地都無追上黎啦」
「我要確保妳...安全吖嘛，唔係我點同妳父母交代」我害羞地說
「點都好，今日多謝你」説罷，她在我嘴上烙上深深一吻

良久，兩人嘴唇分開。




太陽打在紅彤彤的臉上令人更熾熱。

「吓...」我當下反應不過來
「當獎勵你喇，今日咁叻仔」樂晴敲敲我的額頭說
-
當天臉上的熾熱，今天的臉上仍然如此。
「搞咩啊紅都臉晒...一日女友啫唔使咁怕醜吓話」
「妳記唔記得當年妳俾MK仔圍單嘢？」我問
「梗係記得，最初以為你英雄救美，點知落荒而逃吖嘛」樂晴說
「淨係記得啲衰嘢...」我問




「仲有俾左第一次你吖嘛」樂晴羞答答地說
「吓！邊有啊？我無記憶嘅...妳落左？」我害怕極了
「痴線，玩吓你就咁驚。我話我俾左我初吻你啊，咁咪第一次咯」樂晴笑得合不攏嘴
「屌...又嚇我」我忍不住說髒話
「哎呀，講粗口咁曳，今晚沈老師要好好懲罰妳」樂晴呡呡唇，不懷好意地笑著
「吓...唔好啦」再度刷新我對樂晴的印象
「講笑咋，行啦」樂晴挽著我的手，令我緊張的感覺消失得無影無蹤

在「愛情」的滋潤下，即使在炎熱的天氣下，走到彩虹邨也不算太累。
只是，我低估了女人的耐心。

在暴曬下我們逗留了在那被太陽直射的球場接近一個小時，而我還要跑上跑落遷就樂晴的動作。

「喂…我唔得喇」我說，因為我的衣服早已濕透
「咁渣㗎，都未影晒，都話你腎虧㗎啦」樂晴放聲恥笑著




「ok我輸，你繼續擺pose」我無奈地說
「呢度呢度～」
「唔得啊顯得我條腿好肥」
「痞低啲，我要米八效果」
「嗯…唔錯唔錯，辛苦晒」終於接近黃昏的時候完成我的任務
「唉⋯攰死我喇，我地去食飯啦」我上氣不接下氣地說
「好啊，我請啦」她興奮地牽著我的手說

她帶我來到了一間西餐廳。
「估唔到新蒲崗工業區都有呢類西餐廳」我說
「係呢，呢間係我同事Lily介紹我黎㗎」
「哇妳全部同事都係女嘅，無阿sir㗎咩」我問
「有都唔關你事啦」樂晴說
「好叻咩，食嘢啦」我不屑地說





那裡的菜品都是些港女最愛的打卡美食，火焰雪山、卡邦尼意粉等等。光拍照就虛耗了許多光陰了。

「嘢食凍晒喇，仲影」我無奈地說
「得啦得啦，囉囉唆唆咁，唔怪得搵唔到女朋友」樂晴翻了個白眼說
「我嘅囉嗦…係建築於我過人嘅細心上㗎」我弱弱地回應

看來樂晴並不喜歡我囉嗦…

吃飽飯後，我們坐車回家去。
樂晴倚在我的肩膀上，忽然感覺肩膀濕了一片，原來她睡著了…
「傻女…今日放晒電，攰到訓著」我輕聲地說

即使車程很短我也沒有阻止樂晴酣睡一會。
「喂…到喇，返屋企先訓啦」我說
「嗯…咁快到㗎」




「新蒲崗返土瓜灣可以幾耐啊…」我無奈地說
「真係囉嗦…」樂晴說，然後逕自下車
「喂…」女人生氣上來，真的攔也攔不住

不過，女人都是吃貨。
「食唔食雪條啊？」我問樂晴
「唔食啊，囉嗦鬼」樂晴耍頭說
「孖條喎，芒果味都唔要？」
「嗯…唔要」她猶豫了
「都係要啦」突然一手搶過雪條
「唉～頭先又有人話我囉嗦啦，宜家就食緊佢買嘅雪條」我暗自偷笑
「咩…咩喎，咁係佢話以後會成日買雪條俾我食㗎嘛」
「咁都記得，即係唔嬲啦」
「仲嬲嬲地㗎…你做埋我今日叫你做嗰個懲罰就算啦」樂晴說
「咁仲等？快啲返屋企啦」我拖著樂晴一路蹦蹦跳跳走去