我被困喺一架去九龍嘅電車上 (粵語): 6章 - 九龍嘅電車

 
我想番屋企呀！
 
我抱頭欲哭無淚嘅時候，我發現車廂有兩件事值得留意。
 
一，車窗外面係有啲嘢經過。二，呢層嘅鄧麗欣物體會上上落落，佢地一落，係唔會好似我咁番番嚟呢一層。
 
我運用我嘅小腦袋，嘗試搵逃脫嘅方法。
 
係有機會嘅。




 
我坐去窗邊，留意住經過嘅建築物。佢話目的地係又一村，咁經過嘅地方會唔會係我見慣見熟嘅？
 
隆隆隆──叮叮──
 
香港電車獨有嘅聲，係廣告或者懷舊片入面成日出現嘅標誌。我開始由心討厭呢種聲，我發誓以後都唔會坐電車。
 
「香港浸會大學…呢度係樂富九龍塘呀！」雖然好大霧，但係見到熟悉嘅地方名喺眼前一掃，我安心咗少少。
 
但係九龍真係有電車？有過電車軌咩？咁大工程冇理由住石硤尾嘅我會唔知。




 
「點解會有電車先唔理，咁點落車呢？」
 
眼前，又有一個鄧麗欣咁嘅物體上咗嚟，坐喺我前面。
 
「小姐，介唔介意我問兩句？」我講。
 
「溝女就過主啦乞衣。」
 
嘩，天使嘅面孔，講嘢咁爛口嘅？




 
「你係咪未聽過十八個字嘅粗口呀！走啦！」
 
同鄧二、阿欣唔同，呢個鄧麗欣物體好火爆。我…
 
好想俾佢罵多幾句！
 
「靚女，有男朋友未呀？」
 
「關你鬼事！」
 
「不如今晚嚟我度，我教你玩樂器呀？」
 
「咩學器呀？」
 




「吹奏樂。」
 
啪！
 
「賤格！」
 
屌，洗唔洗打完人呀？我講下嘢都俾人打。
 
我撳住發滾嘅手掌印，爛口版鄧麗欣開始落樓。
 
屌，不如跟住佢落車啦。
 
「喂，唔好走住！」
 
我追出去嘅時候，打我嗰個人已經唔見咗，我行落一層，又係去番同一層。




 
「唉…」
 
點解會咁？佢哋又落到車架喎。
 
「先生，又做咩呀？」我去番後坐嘅時候，阿欣問我。
 
「阿欣，你求先喺下層見到咩？」
 
「咪你囉，我地一齊上嚟架嘛。」
 
係喎。
 
「其他呢？」
 




「冇留意。」
 
「咁阿欣你見唔見車長係咩樣？」
 
「你傻架？上車係車尾上，點會見到呀？」
 
屌，冇理由架喎…佢乜都講唔出嘅？
 
於是我又問前面其他鄧麗欣物體。
 
「一上車就上上層，搭電車梗係上上層啦。」佢哋都係咁答。
 
屌，你哋盲架咩！點可能唔留意身邊嘅事架！你哋都經過下層架喎！所有人都咁啱冇留意？有冇咁橋呀？
 
喂！又有人起身想落車啦！今次機不可失，我即刻吊住佢尾。佢行出走廊，我自然咁跟佢後面，佢捉住扶手，喺搖下搖下嘅車廂慢慢落樓梯。




 
咯－咯－咯－咯－咯－咯－
 
回到同一層。
 
咯－咯－咯－咯－咯－咯－
 
我望去車尾，阿欣天使嘅面孔一直對住我笑。
 
咯－咯－咯－咯－咯－咯－
 
阿欣天使嘅面孔，仍然對住我笑。
 
屌，我不斷重複番嚟？其他鄧麗欣物體一落樓就唔會再見，點解而家會咁！
 
如是者，重遊舊地差唔多二十次，我放棄跟尾，搵個位坐底咗，望住落緊樓嘅鄧麗欣物體最後點。佢落咗樓之後，就冇再出現過了。
 
「阿欣，架車擺明針對我。」
 
「咩呀？」
 
「我落唔到車。」
 
「咁坐下啦，睇下夜景，幾寫意。」鄧二插嘴。
 
我想番屋企呀…阿穎，我突然好掛住你…