只有做愛的時候我才聽得見聲音: （42）

何管家休養左都接近一個月，呢日就係佢拆石膏嘅日子。

晴晴做曬家務，下晝就車佢醫院。醫生話拆完石膏，再休息多幾日，咁佢就可以復工。

回程時候，何管家叫晴晴到尖沙咀一間麵包鋪訂蛋糕。

「訂蛋糕？乜有人生日咩？」揸緊車嘅晴晴問。

「係呀，過兩日八月十七號，就係少爺嘅生日。」何管家答話。



「咁Alex生日會點慶祝架？」

「以前老爺、夫人仲喺度嗰陣，佢地就會同少爺出去玩呀同食飯慶祝，自從佢地唔喺度，我同少爺每年都係喺屋企食個蛋糕就當慶祝左。」何管家話。

「咁簡單？」

「係呀，少爺想簡簡單單嘛。」

「咁生日禮物呢？何管家你諗住送咩生日禮物俾Alex呀？」



「我早幾日上網買左黑膠碟俾少爺做生日禮物。」

「黑膠碟聽落唔錯喎，咁我送咩好呢？」晴晴陷入深思。

「其實你送唔送都得嘅，反正少爺應該唔會介意。」何管家話。

「唔得，點都要送嘅，不過Alex咩都有，我要諗啲有用得嚟，又唔會好貴嘅嘢先得……」

晴晴左諗右諗，返到屋企吸緊塵嗰陣，俾佢靈機一觸，諗到送咩俾Alex。



生日當日，佢出去拎蛋糕嗰陣，順便買左兩樣嘢返嚟，打算將嗰兩樣嘢結合成一樣嘢，用嚟送俾Alex。

佢用左一個下晝，匿埋喺書房研究、拼合、組裝。

Alex見晴晴神神化化，閂埋門匿起書房唔知做咩，忍唔住發短訊問晴晴：「喂，你喺書房做咩呀？」

晴晴覆左句：「到左今晚你就知。」

「唔理你搞咩，總之你唔好搞爛我個書房。」

「放心啦，我又唔係整炸彈，點會搞爛你個書房。」

回覆完，晴晴就繼續整佢份禮物，差唔多搞左成個下晝，佢總算係勉強完成佢份禮物。

到左傍晚時分，佢同何管家一齊整左餐豐盛嘅晚餐，有魚有肉有海鮮，全部色香味俱全。



Alex見到成檯都係餸，就問晴晴：「洗唔洗煮咁多，我地三個人點食得曬？」

「話曬係你生日，梗係食豐富啲啦，不如開多支酒囉？」

Alex想打字話唔洗，但未打完兩粒字，晴晴行去廚房，拎左支紅酒出嚟，仲快手「Pop」一聲開左支酒。

「啊差啲唔記得，我去拎份禮物先！」晴晴放低支酒，行入書房，拎左自己準備左嘅禮物出嚟。

份禮物用個好大嘅盒裝住，外面包左一層精美嘅包裝紙。

Alex心諗原來晴晴喺書房搞左成日，係準備禮物俾自己。

「入面裝咩架？」Alex打字問。



「你拆開咪知囉。」晴晴快速打字答。

Alex慢慢拆開禮物盒，見到裡面係一個黑色嘅電單車頭盔。

「登登登！」晴晴將自加音效用文字打出嚟，並解釋話：「呢個唔係一個普通嘅頭盔，而係一個有聽歌功能嘅頭盔。」

驟眼睇，Alex睇唔出呢個頭盔有咩特別。

晴晴反轉個頭盔，俾Alex睇下裡面，跟住又解釋：「我特登喺頭盔入邊裝左部喇叭，咁你以後坐車戴住個頭盔都聽到歌。」

佢將兩個嘢結合成一樣嘢，就係將一個無線嘅迷你喇叭同電單車頭盔結合，其實亦即係坊間嘅戴住都聽到歌嘅「藍牙頭盔」。

只係晴晴唔知有呢樣嘢，佢買左個八達通咁大嘅迷你無線喇叭返嚟，試左各樣方法，喺頭盔裡面塞部迷你喇叭落入去。

Alex拎個頭盔上手睇一睇，發現喺頭盔裡面嘅保護綿被挖空左，入面塞左部迷你喇叭，但只係仲黐左啲雙面膠嚟固定。



見到咁流嘅設計，佢覺得幾好笑，忍唔住笑左出嚟，然後同對方講：「你唔洗特登揾兩樣嘢砌埋一齊，因為坊間係有一種專門俾你戴住都聽到歌嘅頭盔，同埋呢個頭盔你送俾我都用唔著啦，平時我都聽唔到嘢，笠住佢上車播音樂我都聽唔到架啦，仲有我就算聽到嘢，咁笠住個頭盔都聽到架車個喇叭聲啦，洗乜戴住佢聽。」

「用得著，等你遲啲兩隻耳仔好返，咁咪用得著囉，你上到車戴住聽，啲聲比起隔住個頭盔聽會更加清楚，仲係環迴立體聲添。」

睇到晴晴呢句說話，Alex又笑左一笑，雖然對方手工麻麻，但的確係有花過心思去諗送呢份禮物，心入面因此感到有啲感動。
 
之後成餐飯大家有講有笑，氣氛十分唔錯。

過去嗰七年，每到生日，Alex都係同何管家兩個喺屋企切蛋糕，簡簡單單，無乜氣氛，而自從屋企多左晴晴，多左豆豆，除左間屋熱鬧左之外，連今年過生日都變得熱鬧左。