只有做愛的時候我才聽得見聲音: （24）

嚟到傍晚時候。

夕陽西下，天氣比剛才涼快少少。

二人返到屋企，Alex坐到客廳梳化休息，睇下電視。

豆豆喺電視機前訓緊，被電視聲嘈醒左幾秒，眨幾下眼然後又繼續訓。

晴晴就到廚房煮飯，要煮啲材料早就準備好，係頭先何管家拜託幫襯開嘅超市揾人送左過嚟，唔洗佢親自出去買。



今朝晴晴用左十五分鐘整好三人份量嘅早餐，咁夜晚呢餐五餸一湯，佢都係用左九個字個煮好曬，而且味道仲好得，真正嘅快靚正。

Alex不得不承認自己有少少跌眼鏡，佢無諗到對方煮飯同打理家頭細務都做得比想象中好。

大家識左個幾月，佢終於喺對方身上揾到少少優點。

搞掂曬啲嘢，晴晴完成曬女僕一日嘅工作，然之後就轉換返做「床上情人」。

日頭做工人，夜晚做情人，一日分飾兩角，係就係幾辛苦，但係對晴晴嚟講，有錢收，辛苦啲都無乜所謂。



做左一個星期，晴晴基本上都上曬手。

煮飯、管接送、打掃等家頭細務佢都搞得掂，係有兩樣嘢頂唔順，一樣係每日六點半前起身，第二樣係大熱天時要陪Alex去打golf。

早起身呢點佢仲未適應，而陪去打golf，就每次去親都曬足幾粒鐘，又熱又難受，去左幾日佢已經曬到啲手手腳腳黑曬。

今日，Alex又想去打golf。

「出面三十六度！係三十六度！今日唔打golf得唔得呀？」出門口前，晴晴一手拎住溫度計，一手拎住手機，兩樣嘢同時展示俾Alex睇。



「點解？我想打golf。」

「咁鬼熱，隨時會中暑架，同埋一個禮拜打五次golf，你唔悶架？」

「唔悶。」Alex輸入文字，

「唔好去啦不如，反正你都唔係咁鐘意打高爾夫球啫，去少幾日都得啦。」晴晴繼續說服對方。

「我鐘意打呀。」

「無可能！你打嗰陣都唔笑，玩得一啲都唔開心，你根本都唔鐘意高爾夫球，求下你今日唔好去啦，真係好熱架。」

Alex無即時回應，因為佢被晴晴講中左。

的而且確，佢根本唔鐘意打高爾夫球，只係呢樣活動自己一個玩都得，又可以打發時間，所以佢先玩。



其實釣魚都係一樣，都係為左打發時間先釣。

「你應該揾自己真正鐘意嘅嘢去做，唔好打高爾夫球啦。」

Alex鐘意彈結他，問題係依家既佢想彈都無法子彈。

有時候有啲嘢唔係話你鐘意做就可以做嘅。

過左一陣，何管家都過嚟勸說，話天氣咁熱，唔適宜到戶外打波。

後尾綜合雙方意見，自己又諗一諗，Alex決定今日唔去打。

晴晴鬆左口氣，心諗今日終於都唔洗喺草地上暴曬幾粒鐘。
 


然而成日流流長，總要揾啲做嚟打發時間。

晴晴提議佢可以同豆豆玩，可惜隻貓食飽貓糧，就訓到豬咁，叫都唔醒。

之後佢諗住上房抹下黑膠，咁啱黑膠碟清潔液用曬，於是就叫晴晴車佢位於旺角嘅相熟唱片鋪買返幾樽。

晴晴喺清水灣呢啲偏遠地區揸車嗰陣，係幾穩陣，但一嚟到油尖旺呢啲車多人多嘅地方，就見真章。

遇到分岔路多嘅路口，佢好幾次都轉錯線，又兜錯路，仲有次轉緊燈嗰陣，無預先留意慢慢剎停，到見轉曬紅燈先急剎車。

咁樣dup一dup，架車chok一chok，嚇到車入面嘅Alex以為發生咩事。

佢遇過一次車禍，心入面有陰影，對於車入面少少波動，都感到不安。

行錯左幾次路，好不容易終於揾啱唱片鋪位置。



晴晴泊架車入停車場，然後同Alex一齊入鋪頭。